Here's today's text by our author of the month, Amelia Perchard:
Tchi Vie
J' trouve-t-i qu'la vie est duthe, tout d'même
Pour un garçon comme mé!
N'y a jamais eune minute d'êpaine
Du matin jusqu'au sé.
Quand man carillon d'bouan matin
Mé rêville auve san brit,
J'sais bein à tchi m'attendre du jour
Qui n'fait que de c'menchi!
La preunmièthe chose - i' faut m' laver.
Comme si ch'est nécéssaithe!
Et pis faut biatchiner mes bottes -
Ne r' ve'la mes mains naithes!
Faut les laver! - Faut déjeuner!
Faut soigni mes lapins!
Et vite m'en aller à l'école -
Ch'est d'même touos les matins!
Et là, faut m'y r'mettre de pus bouon,
Auve livres et crayons;
Mais l'jour se passe, et à la fin,
J'peux m'en r'aller siez nous,
J'm'en r'vais tout djai, à raide brache,
Mais ch'est pas tout hélas!
M'mée m'dounne des pais à êcaler -
Ch'en r'est là du travas!
Auprès l'thée faut faithe mes leçons;
Je n'peux pas en fini;
Et d'gette l'hô-louoge qui touânne tout l'temps
I' faut qu' j'alle me couochi!
M'mée n'm'êcoute pas, quand j'avis qu'j'veurs jouer
Que je n'sis pas lâssé;
J'm'en vais gronnant amont les d'grès -
Vrainment j'sis dêgouoté.
No comments:
Post a Comment