Here's today's text by our author of the month, Amelia Perchard:
Man Segret
Ergardez-mé, ichîn au liet,
Êgrînfié des pids à la tête!
Man bouanhoumme - j'en ai êcappé
Quand le vièr boeu à Mess Le Maistre,
Fitchi sus l'herbe blianche de mergots,
A êrachi san gros paîsson,
Et galvaudé l'travers du clios,
Coumme s'il avait perdu raison!
J'm'en r'venais de siez un anmin
Ou'est qu'j'avais 'té passer man jour,
Et j'crouaisais l'clios à not' vaîsin,
Pensant de coper man c'min court;
Lé boeu, m'viyant, i' drèche la tête
Et môtrant rein qu'le blianc d'ses ièrs
S'est mins à côner dans la biête,
M'ergardant salement de travers!
Prins d'envie de l'êtibotchi
Auv' eune badgette, à londgeu d'bras,
J'l'ai digotté et catouoilli
Sus l'dos, souos l'ventre, et sus les fliancs;
Auv' d's êlans dans ma direction
I' sautait hors terre, pus d'un pid,
Si bein qu'j'ai veu que san paîsson
En'tait dév'nu tout êlouaîssi!
Je n'tais pas hardi liain de li,
Et quand j'ai veu ch'qu'i' s'arrivait
J'ai prins la paque dans un clyin d'yi,
En route pour le pus près fôssé!
J'n'ai janmais d'vant ieu eune telle frousse!
J'couothais, j'vos garantis j'couothais
Auv' ch't anima si près d'mes trousses,
J'sentais s'n haleine sus l'fond d'mes braies!
Vithant à gauche, pour un pommyi,
J'ai joué l'boeu qui n's'y'attendait pas;
La s'gonde ou deux qu'il à perdu
M'ont donné l'temps de grimper d'dans!
Eune heuthe auprès i' m'ont trouvé,
Coumme un marmouset, dans man bouais,
Le boeu en d'sous, pus rasseûthé
Mais espéthant qu'j'm'en allais tchaie!
Ch'est qu'i' m'en fait, des affaithes,
N'se doutant dgéthe d'la véthité!
Mais, j'vos promets que j'm'en vais m'taithe
Car j'n'ai pas envie d'être fouôté!
J'ai l'temps ichîn, à man tout seu,
De réfliéchi sus mes péchés;
Et m'n aventuthe auvec le boeu,
M'servitha d'leçon à janmais!
No comments:
Post a Comment