Another text from the Great War:
Some opinions on the Projet de Loi
"Avec tout chenna, tchès qui m'ditha d'en par ou-ès qu'j'en soummes avec la Loué sus la Milice?" s'fit Cliém R'non, en s'appiant sus sa have a crevette. "Pus j'èsprouve a comprendre et pus j'm'enphôtôme. Tchès qu'i' fait qu'l'affaithe n'avanche pon?"
J'taîmes chinq de nous, ensemlye, à bûsotchi pour de la crevette, souos la Cosnièthe, a la Roque; et coumme i' n'y'en avait djethe, j'nos taîmes assîs a mangi eunne bouochie ch'attendant qu'la mé dvallisse ocquo eunne demi-heuthe. Ch'fut quand la jougue fut viedde et qu'nous avait allumé ses pipes qu'la distchusson c'menchi. Piteur Langliais v'nait d'dithe que san fils 'tait a je-n'sai si fallait avanchi ou r'tchullé ses neuches souos les circonstances. Mé, j'lis dounni en avis d'mathié san mousse au pus vite, pa's'que, chose seuthe, le Coummité éthait d's èsgards pour les jeunnes mathiés quand vindrait l'temps d'fourni des extchuses pour ne pon marchi d'lavant.
"Ch'est coumme siez nous," s'fit Laîesse Bilo; "y'a déja tchq' mais qu'man fils hante la hardelle à Sam Podèstre. Coumme ou savez, Sam s'en va d'la consumption, et l'idée 'tait d'attendre sa fin (l'pouôre balloque toux a faithe cratchi l's'ozennes de f'nètre) pour que l'jeunne couplye s'minsse dans ses meublyes. Mais si ch'est vrai que ché s'a 'single men first,' l'amouotheuse est d'avis de s'mathié au pus tot; ou mouôrait d'm'zéspé d'vaie san gallant s'n'allé au Front."
"Mais tchès qu'a dit qu'ch'est 'single men first'?" s'fit Jim Rèsté, des Caches Crotchies. "J'n'en a pas veu mention dans l'Projet."
"Ch'est a dithe que nou n'y vé qu'bliu, dans lus Projet," s'fit l'houmme a Mélanie Hardi, en se l'vant pour r'quémanchi a pêtchi. "Mélanie et mé j'avons passé d's'heuthes a tâchi d'dèsmêlé l'fond du coupé d'la Loué, et au bu du compte j'finîmes par nos ent' baillyi des cliamûses. Mé, j'trouvais que je s'ais exempté souos l'Articlye VI., et yi prétendait qu'l'Articlye IX. me hapthait, et qu'ou en 'tait bin aise."
La d'sus j'nos èsgouffîmes a rithe! "Né t'gène pon," qué j'lis dîmes: "Mélanie est capablye d'allé té traîné par l'ouothelle devant l'Gouverneux si tu t'muche! Oul a dèsja cartchullé quy'avec sa boutique et la pension qu'ou r'chévtha siu tu-ès tué, ou pouorra s'grée numetho yun. Ché sa pas yi qu'îtha d'vant l'Coummité plieuthé pour exempté s'n'houmme..."
La d'sus tout l'monde se r'mint a pêtchi; et ché n'fut qu'en se r'trouvant siez Miss Le Vesconte que la distchussion r'cemenchi. Y'avait là un fliotchet d'petcheurs, et tout l'monde éxplyitchait l'Projet d'eunne monniéthe diffethente.
"Chose seuthe, que les cartes sont mêlées," s'fit yun, en èsprouvant a coaxé Miss Le Vesconte a payi eunne touônée pour eunne pinte de lanchon. "Nos Gros Bounnets hallent a Wog, l'Gouvernement halle a Bi-deouais, et ché s'a nous, au bu du compte, qu'attrapthons les laches de fouet. J'soummes tous ichin coumme un fliotchet d'brébis: Va coumme j'té pousse!! Et n'y'a persounne a nos d'mandé notr' avis, si j'îthons ou n'îthons pon."
La d'sus n'en v'la yun qui s'mârit tout rouoge. "Nos Estats sont des patriotes. Gas déouelle!" qui s'fit. "Et j'voudrais vaie l'preummi qui ditha l'contraithe! Ch'qui m'fait enragi, ch'est d'vaie que l'Gouvernement semblye voulé prétendre que nos Coummités n'lus fournithont pas assez d'soudards - que touôs l's'éxtchuses s'ont bons. Nos counnèstablyes et nos Chant'niers lus montréthont!"
Y'en eut du d'vis! Mais m'n'idée est que j'n'avons pas ocquo tout veu. L'affaithe né va pas du tout bin parmi nos Captaines! Ch'est halle ichin, pousse là; et not' pouôre bérque - et nous d'dans - n'sait pon d'tchi bord lovyié. Et persounne né nos consulte! J'soummes coumme l'argile entre les mains du potier; si m'est pérmins de l'dithe. J'îthons, j'n'îthons pas! Persounne né nos d'mandent notr' avis! Ch'qu'i' y'a d'bon, ch'est qu'la djèrre finitha p'têtre dévant qu'i' saient d'accord. V'la tchi n'mé surprendrait pas!
Piteur Pain
Jersey Weekly Post 7/10/1916
No comments:
Post a Comment