Monday 24 February 2014

1915: L's Allemands ès Blianches Banques - Germans at Les Blanches Banques (1)

BBC Jèrri a eune côssée d'son entouor l'camp ès prisonnièrs d'dgèrre ès Blianches Banques. Né v'chîn chein qu'lé Caouain en êcrivit en 1915:

BBC Jersey has an audio feature "Les Blanches Banques, Jersey: A Prisoner Of War Camp". GW de Carteret wrote a description (in his familiar style) in 1915:


Dimanche passé je resti au lièt pus tard que d'habitude, car j'avis ieu une rude nièt et n'avais pas dormi un d'gout. Ou viyiz je fus obligi d'être sus pid toute la nièt à faithe des poussots pour Marie Hibou qui dépis tchique temps a dêveloppé deustrais gros frouets.

Je me l'vi justement en temps pour dîner et je m'décidi, dès que j'eus dîné, d'aller faithe une petite promenade dans la ville. Tchi crowd de monde qu'i y-avait par les qu'mins! Jamais j'n'avais veu ditèt au Dimanche, et i' s'en allaient tous dans la même direction, tous du côté du Ouest. Je me d'mandi: Tch'est qui peut y-aver en allant don? Nou dithait que ch'tait l'jour d'la grand' r'veue ou bain les courses de St. Ouen.

Quand vint un temps, j'avisi un homme que j'connaissais, dans la procession, et je m'appréchi d'li et lis d'mandi: Où-est qu'ou vos z-n'allez tous don d'chu pas-là?

- J'nos z-n'allons ès Bianches Banques vaie les Germans; t'y-en vains-tu?

Je lis raîponni que je voudrais bein y-aller, mais que je n'pouvais pas pour le moment m'êloigni de d'siez-nous, car Marie Hibou n'tait pas trop bein.

Mais j'avais ouï tant pâler des prisonniers allemands, que j'étais bein tchuthieux ettou, de vaie tchi sorte d'monde que ch'tait, alors je m'décidi de voltigi jusque-là tchique nièt quand tout es'sait bein trantchille et qu'i n'y-aithait pas tant d'monde par les qu'mins. À mié la s'maine, Marie Hibou quémenchit à se r'faithe un mio et not'e vétérinaithe dit qu'il 'tait temps de tchitter les poussots. Chenna me donnit un mio pus de liberté de sorti au sé, ch'est pourtchi une belle séthée que l'temps 'tai cliai et qu'i' n'y-avait pas d'biâse, je starreti d'la ville pour m'en aller jusque là-bas. Opprès aver passé St. Aubin, je m'dirigi sus l'Pont Martchet et dès que j'avisi les bouais opprès de la ferme du Général Don, je savais bein que je n'tais pas bein liain d'ma destination. Je fus bein ravi quand je franchi l'haut des monts de vaie la scène qui sa'dêrouolit en d'sous d'mé. Ch'était justement comme une ville, et l'effet d'la lune sus tout chu corrugated était bein tchuthieux.

(à siéthe)

No comments: