New on Les Pages Jèrriaises

A number of texts by the Caouain have been added - topics cover a traffic case in court, a tunnel to Saint Malo, a threat of divorce, women for election, and a cattle show.

La séance de la Cour pour les menues dettes

Un avocat: "Avous sonné vot'e trompette dans l'carrefour?

"Oui moussieu."

Un témoin qu'était sus les lieux n'avait pas ouï d'trompette. l'Avocat hauche les êpaules, un geste hardi pratitchi par les avocats. Nous entend les témoins iun à iun. I' y en a un assortiment intérêssant. Un maître cherpentchi, un Chantnyi, un Vingtnyi, un aubergiste, un waiteur, une maîtresse de poste, un tchethetchi, deux îngénieurs, etc.

Iun avait m'suthé la route, l'autre avait êprouvé à servi d'anmin et avait 'té insulté pour sa peine, iun d's îngénieurs avait examiné les d'gats pour li aidgi à arriver à une conclusion quant au délinquant. I' devthait s'y r'connaître ch't-ichîn, car i' peut faithe descendre le mont du Pûlet avec un homme dans la side-car et personne sus la machine.

Lé Caouain et la tonnelle

D'abord chenna don'nait de l'empliai pour tchiques semaines à touos les siens qui sont sans travas.

Et pis toutes les chivethées d'robbidge que le creusage fournithait pouorraient servi pour remplyi le but de la vieille cauchie auprès du weighbridge, et i pouorrait même s'arriver que nou trouvethai une veine de bouan tcherbon ou même de l'or à une certaine profondeur.

La biâse et l'rude temps n'aithaient pus autchune terreurs pour les siens qui sont tréjou malades de la mé, comme, par exemplye, le Chef et mé.

Marie Hibou est diversement désappointée

Je sais bain que ch'est une affaithe de bain mauvais goût d'êcouter une conversation qui n'est pas intentionnée pour vos ouotheilles, mais j'eus la tchuthiosité de vouler saver tchie intethêt que Marie Hibou pouvait aver sus chute tchestion-là.

Et comme man nom fut mentionné deustrais fais duthant la conversation je pensi que j'étais parfaitement justifié de m'mettre ès êcoutes pour tâchi de dêcouvri de tch'est qu'i' s'agissait.

Et j'eus la surprinse de ma vie.

Craithious bain qu'ils 'taient à faithe un compliot pour prendre les m'suthes pour effectuer un divorce entre Marie et mé.

Lé Caouain et l'êlection mantchie d'eune femme

"Tch'est qu'i' y a en allant annièt don?" j'li d'mandi. "Ah!" qu'ou m'raîponni, "ch'est annièt l'grand jour! Ch'est annièt que Moussieu l'Bailli et Messieux les Juges s'en vont une feis pour toutes, nos donner nos drouaits. Ch'est annièt que l'Connaîtablye Piné s'en va être confondu, et qu'i' s'en va apprendre sa leçon, que nou n'peut pas s'motchi des femmes comme nou faisit l'temps passé!

Lé Caouain ès Shows d'Boeus

"Ergardez l'Bill! Est-che là la manièthe de m'ner un boeu? Donne-li pus d'corde, don!

Fraînque s'en va perdre le prumié prix par sa faute.

Baisse-li la tête, don, boufflye d'trouaîme! Oh! si ch'taît mé quétais a m'ner chu boeu-là!