With the start of the Pope's state visit to Britain today, here are a few extracts of texts from Jèrriais writers. But since they count among themselves staunch Anglicans and Methodists, they're perhaps not always as respectful as they might have been.
Ph'lip aime san liet
Mais, Moussieu, la grande nouvelle ch'est que l'Pape s'en va visiter la Palestine, et y'en a tchi disent tch'y pouôrrait même v'nin en Jèrri, car il a entendu qu'ichîn à Saint Ou les natifs sont bein difficiles à persuader tch'ils ont tort. J'sais que l'Pape est un raide bouon homme, mais nou dév'thait li dithe qu'un vrai Saint Ouënnais est pûs difficile qu'un Juif, et une Saint Ouënnaise ocquo pièthe, à convaincre. Ch'n'est pas pour dithe tch'i' sont miyeurs que d'autres, mais tout simplyement tch'i' sont difféthents, surtout les Gris-Ventres.Toujours les mêmes!
Mardi, dé bein bouan matin, j'ervenais d'unne profonde rue, de chi, sus unne belle porte, qui v'nait d'avé unne nouvelle câsaque... de peinthuthe, j'vit tchique chose écrit.Lé Counnétablye d'la Trinité
Savous bein tchique qu'est-ce té! Oh! unne mauvaise nouvelle: I' tait meins: "Le pape est perdu, pas de lunch demain!"
Ah! si Rome n'tait pas si loin, j'éthaient tait vais si y'éthait 'ieu moyen d'li porté tchiques mûlets, bênits et des bloaters pour empêchi le pape de mouothi.
...j'm'en vais t'racounter la bordée qu'eun Counnétablye d'la Trinité dans l'dernyi siècle veint à êt' erchu par Sa Saintété le Pape. I 'tait en viage en Europe et s'trouvit en Italie, à Rome, et même qu'i' fûsse buoan Métodiste i's' mînt dans la tête qu'i' devrait payi eune visite de politesse à Sa Saintété, et d'même il écrivit eune lettre en Français au Pape, le priant de l'érchever.Cantorbéry et Rome
Bein seux, Sa Saintété ne lyiet pas toutes les lettres qu'il erchève - ses sécrétaires les lyient et passent au Pape rein qu'les siennes tchi li sount d'interêt et à tchiques qu'l dévrait rêpoundre. I 'taient d'avis qu'il devrait rêpoundre à la sienne du Counnétablye d'la Trin'té. Le Pape lus d'mandit pourtchi.
'Votre Eminence,' les sécrétaithes li dîtes, 'j'avouns fait des ércherches. L'île de Jèrri a douze parraisses, la puspart noummées pour des saints, par exemplye St Jean, St Martin, St Pierre et d'même, et ch'est les Counnétablyes qui les countrollent. Mais chteinchein est Counnétablye de, ch'est à dithe qu'i' countrolle, la Trin'té.'
'Le Buoan Dgieu blesse mén àme,' s'fit l'Pape, 'i' countrolle la Sainte Trin'té, touas les trais, le Péthe, le Fi's et l'Saint Esprit! I'faut certainement que j'lis dounne audience, et avec toute cérémonie, car si i' countrolle la Sainte Trin'té i'm surpâsse en autorité, et d'eun buoan but.' Et d'même le Counnétablye veint à l'Pape.
Sus la télévision d'nouos iours ichîn en Améthique nou vait les pélérinnages dé Sa Sainteté lé Pape Jean Paul II dans divèrs pays. À ches drein san pélérinnage a 'té dans lé Rouoyaume Uni et il a 'té r'chu partout (à l'exception d'eune pétite minnorité) à bras ouvèrts. Ch'est sans doute san charme pèrsonnel tchi l'fait êt' populaithe et beinv'nu.Henri VIII et l'Eglyise d'Angliétèrre
Ch'est dépis qué l'Pape Jean XXIII otchupit l'trône papal qué l'catholicisme Romain a pûtôt pèrdu la mêfianche qué l'peupl'ye protestant soulait aver quand j'tais mousse. V'là tchi n'veurt pon dithe tch'i' n'y'en a pon acouo un tas, d'mêfianche, parmi cértains, comme, par exempl'ye, lé Révérend Ian Paisley, lé minnistre Presbytérien dé l'Irlande du Nord. I' n'est sans doute pon tout seu d'sa sorte.
Mais i'tais ravi d'vaie la bouanne réception qué Jean Paul eut en Êcosse, où'est qué j'pensais tch'i' né s'sait pon si bein r'chu. L'attitude des Jèrriais en général vis-à-vis du Pape a changi hardi dépis qué i'tais mousse.
Ch'tait l'Pape Cliément VII (Pape dé 1523 à 1534) tch'était sus l'trône pontifical en 1534 quand Henri VIII tchestchionnit la r'cliâme d'autorité ecclésiastique univèrselle dé Rome, mais l'Pape, né fît autchun êffort pour faithe les fidèles tchitter à prendre les sacréments dans l'Églyise d'Angliétèrre. Si Henri VIII avait fondé eune nouvelle églyise ch'éthait 'té ch't'année-là, et l'Pape n'éthait janmais pèrmîns à ses fidèles dé s'en touoilli, Au contraithe, lé préchain Pape, Paul III (1534-1549), "promoteur" du Concile dé Trente, pèrmînt ès Catholiques dé continnuer à la hanter et y prendre les sacréments. La même chose continnuit souos l'Pape Jules III (1550-1555) et Marcel II, Pape pour 22 jours auprès s'n êlection en 1555. San successeur, Paul IV, régnit jusqu'à 1559 et fut rempliachi par Pie IV. I' mouothit en 1565 et 'tait l'siexième Pape dépis qué Henri VIII 'tait supposé aver fondé l'Églyise d' Angliétèrre. Les Catholiques Romains avaient 'té bâptîsis, confirmés, r'chu l'absolution et avaient prîns la Sainte Communion pour pus d'trente ans d'dans, et Rome n'avait fait autchun êffort pour dênoncer la catholicité d'la supposée nouvelle églyise ou empêchi les fidèles dé la hanter! Si ch'la n'est pon eune preuve qué l'Saint Siège n'èrgardait pon l'Églyise Anglyicanne comme étant eune nouvieauté fondée par Henri VIII, mais qu'oulle 'tait la vraie églyise nationale, Catholique et Apostolique du pays, comme l'était l'Églyise d'Italie (appelée Romaine), d'l'Espangne et d'la France, i' n'y en étha janmais!Vive la Forche!
J'sis Prêtre, - et n'permets pas que n'ou m'oppose.Eune lettre dé 1880
J'm'appell' Pape ou Calvin - chest bein même' chose. -
N'ou n'veut pas s'taire?...
O... j'sais qui faire!...
Je m'prévaut de mon droit, - chein du pus fort;
Marche, entêté, - au Bûchi, à la Mort!
Vive la Forche!
Sus votte gâzaitte d'la s'maine pâssais, j'ai veu que 600 pairsonnes ont assistai à unne confairance sus l'Pape ou quique chose d'la sorte. Si j'comprands bain i s'agissait d'unne expôsition dais Jaisuites: -
Hôla! je n'emvais pon prandre un côtai ni laûtre d'la question, car j'sis aussi ranségni sur l'affaithe, coumme la majeuritai des Jerriais l'sont. Chain que je sait chais qu'il existe unne Sociétai d'chu nom la à Paris ai ailleurs, ai qui paraît qui fait qu'les chains qui sont êtablis en France essaîme, ai s'en aillent.
No comments:
Post a Comment