Dgilliaume lé Contchéthant - William the Conqueror

Dgilliaume lé Contchéthant, not' Duc, mouothit aniet en 1087. Aniet, l'9 d'Septembre, en Jèrri nou-s'atchil'ye des r'presentants d'la Grand' Tèrre pouor célébrer tchînze ans d'la Maison de la Normandie et de la Manche. Nou-s'a ouï des discours en faveu d'l'eunificâtion d'la Nouormandie et pouor la renforch'chie des lians (et chenna auve les lians lîndgistiques) entre touos les pays Nouormands du continent et dans l's Îles.

Né v'chîn eune partie d'eune pièche êcrite en 1966 par Amelia Perchard:

Not' Destinnée

Dgilliaume lé Contchéthant - en mille souoxante-six,
En mille quatre-vîngt sept, ch'tait Dgilliaume san fis;
Henri, lé préchain sus l'trône en onze chents,
Fut suivi d'eune liste deux fais longue coumme lé bras
D'rouais et d'reines qui fallait qu'nou-s-apprînsse par tchoeu,
Qu'nou répétaît en rînme pour s'en ramémouaither,
Quand nou-s-'tait a l'êcole - hélas, tchille embête!
Janmais jé n'pus, mé, les fouôrrer dans ma tête,
Sinon Dgilliaume, brave Duc dé Normandîe,
Qui d'vînt Rouai d'Angliéterre en mille souoxante-six.