Lettre Jerriaise Samedi l'4 d'Octobre 2003.

 Lettre Jerriaise  Samedi l'4 d'Octobre 2003.

 

Aniet Samedi l'4 d'Octobre 2003, et chais un pliaisi acquo une fais, pour mé, Clifford Laisney d'vos addrechi.

 

Nos v'la arrivées à la saison d'tempêtes. Souvent l'mais d'Octobre s'announce comme le c'mmenchement d'hiver. Vos r'app'lous du 4 d'Octobre 1964, et pus dernierement l'11 d'Octobre 1987. Deux dates que nou's aime mus r'oublier et éspèther que nou ne r'vètha pas.

 

J'tais en ville la s'm'naine passée dans une boutique a cartes, une chose que j'faisons assez souvent étant que j'avons une grand fanmillye, et acquo tchiques amins, et j'pouvaits pas craithe mes iers de vaie l'étalage de cartes d'noué. Oui, trais mais d'vant les célebrations et les boutiques sonts a nos tempter d'acater. Quand j't'aimes a acater les provisions d's'm'naine Vendredi passé, les ais du supèrmarchi 'taits remplyis pour noué, galettes, chocolats, pôdins etc. Même les hotels et restaurants onts deja lus menûs d'noué publiées en orde de nosfaithe souv'nin d'faithe nos réservations. Est-che que chais pas un signe des temps dans tchi que j'vivons. Même les saisons ont appathence d'etre a la tchulbute.

 

Prennez pour examplye le fermage. Tch'Est qu'authai janmais penser d'vais l'temps que d'la bouonne terre agricole authait 'tait utilisée pour les jeus d'sport. Oui j'allons vaie l'jour que des clios sonts vonts dev'nin terrains d'golf et d'cricket. Ch'est p'tre mus que d'vais les clios a pêtre es coucous, quouaiq'u malheuthesement nou c'mmenche a vais l'abondonnement d'terrains agricole.

 

Ouaiqu' sonts les temps quand tout terrain 'tait utilisé pour le craissage de recoltes, que j'fusse patates, herbages ou fremont. Ah, le bouons viers temps quand les gens s'entre aidgais dans l'temps des batt'ties. Tchi bouonnes memouaithes que nou's a d'la grand toun'ni, les tchêthues a quatre et siez ch'vaux, et pus tard le tracteu et tchêthue a simplye raie, auve un homme a chaque carre a fouit l'pitchage. La joug'gie d'cidre a la carre du clios, et sus l'point d'giex heuthes nou's attendait la danme d'la maison tch'arrivait auve la bouch'hie, de bouon fromage et gaches toutes caude. Dans l'temps d'la batt'tie, sustout l'otchupation, étant jeuine auve bouonne appetit, nou's attendait fête d'aidgi a son vaisin sachant trejous que le r'pas et cidre doux pus que recompenser pour le dû travas d'la moisson. Ch'tait un pliaisi de sont'aidgi, i'n y'avait pas telle chose que recompense, le mot Argent n'avait pas d'significance. Mes chiers anmins, chais temps la sonts qu'une memouaithe.

 

Malheutheusement, je d'meuthons dans un tout a fait different temps. J'en viyons la preuve dans l's'évènements de chès drein. Prennez pour examplye le cas tch'a otchupé les lignes en tête du journal du sé, radio et television des dreines semaines.

 

J'pointe a l'affaithe des ércliames d'la Seigneurie d'la Fosse envers le bord au large. Comme chais donmage que les gens responsablyes n'onts pos ieu la connaissance de r'donner a l'ile chaiq'u tchi les a mins dans une position envieuse du tout c'mmenchement. Une érconnaisance p'tre par un monument ou obelisk érécté en memouaitthe de lus génerosité authait servi a montrer és génerations a suivre les bountées génetheuses de nos anchetres. Je sis presque tempté d'élargi sus mes pensées envers chû sujet si prés du tchoeu des habitants, sustout le jerriais, mais la politic est mus restée dans les mains des proféssionels en tête, et d'même j'menvais changi sus un sujet pus cordiale, un p'tit acompte de L'Annuel Génerale de L'Assembliée Jerriaise tch'eut lieu Vendredi passé le 26 d'Septembre.

 

Le Président ouvri l's'affaithes ont invitons les membre presents d'lus l'vé en memouaithe de deux membres tch'avaits mouothi d'pis la dernier reunion. La Danme Hilda Syvret, une danme populaire tch'avait rendu grand service a L'Assembliée avaut bein d's'années, ayant tint postes d'conmité auve respé, et L'Sieur Leonard le Marquand, un autre bouon jerriais, un redgûlyi és assembliées. Sa presence setha mant'chie. Le president etout envyi les pensées et bouons souhaits des membres a Madanme eileen le Sueur tchi s'trouve présentement un mio suous l'temps.

 

Dans l'absence du ségretaithe, le president lieu les minutes et rapports des reunions tch'avaits passé duthant l'année.

 

Le rapport du trésoryi certifyi une balanche acceptablye en faveur de l'Assembliée.

 

Suivant l's'élections d'officiers et membres des differents conmités, les septante membres presents s'rejouites d'un magnifique souper, suivit par un discours et portraits livrés par le Sieur Winston le Brun.

 

J'vos r'mertcie pour vot intêthet d'écouter la lettre jérriaise, et j'vos souhaite tous, jouaie, bounne santé et toutes bénedictions dans la s'm'naine tchi suit.

A LA PRECHAINE.

 

Clifford Laisney