1962: L'Excursion en Nouormandie

 L'Excursion en Nouormandie

 

La traisième fais s'prouvit la "bouanne" pour 63 membres dé L'Assembliée d'Jèrriais sam'di passé, l'18 d'août. Vendrédi matîn, quand l'excursion en Nouormandie fut dêmînse pour la deuxième fais pour ieux, bein des membres fudrent hardi dêchus, mais duthant la matinnée, quand les nouvelle vîntent qué l'affaithe 'tait ermînse au sam'di, lus esprits lus r'levîtent tout-d'suite. Ch'tait damage qu'eune dgiézaine né pudrent pas v'nîn quand même.

 

Sam'di matîn tous 'taient d'bouanne heuthe pour lé baté dé siex-heuthes et d'mie, la traversée fut bein calme, et nou-s-arrivit à Granville à dgiex minutes dé neu', et tout d'suite en charabanc l'travers dé la campagne, iou qu'i'y a hardi d'herbage et d'vacques, jusqu'à Coutances. Ichîn i'y eut eune arrêt pour vaie la vielle cathédrale, prendre un portrait d'la dgaîngue, et auprès vaie les bieaux gardîns. Lé prechain arrêt, à Isigny, fut bein apprécié, car tous avaient grand faim, mais i' fudrent bein rêcompensés pour aver arrêté, car un superbe r'pas fut servi à l'Hotel dé France. La seule pliainte ichîn 'tait: "I'y en avait pus qu'nou n'pouvait mangi!"

 

Arromanches

 

Justément auprès eune heuthe nou' r'était en route pour St. Laurent-sur-Mer. Ichîn nous-s-arrêti pour vaie l'grand chîm'tchéthe Améthitchain, qu'est si bein gardé. Le bâtisse en mémouaithe des siens qui perdîdrent lus vie en libéthant la Nouormandie d's All'mands fut bein admithé, aussi bein comme la veue des grèves iou qu'les troupes alliés atèrrîtent en 1944, qué nou fut r'vaie dé pus près auprès, comme Arromanches, qu'est tout-à-fait eune pliaiche ernommée pour les touristes à ch't-heu'

 

Acouoe eune fais en route, pour Bayeux, pour vaie ichîn les tapis'sies et l'ancienne cathédrale, et auprès l'travers d'un canton iou qu'i'y a pus d'avou d'cru, et pis l'ong des pot'ties à Noron. I' font acouo des pots à lait, des bros et des tèrrinnes par ichîn et toutes sorte d'ornéments d'gardîn. Lé préchain arrêt fut St. Lô pour les siens qui voulaient faithe tchiques achats. St. Lô est eune ville avec dé nouvieaux bâtisses, car presque rein y resté auprès les bombardéments.

 

Le temps s'avanchait et fallait aller bouan raide pour le dîner à Coutanches à la Grand Hotel.

 

Ermèrciement

 

À la fîn du r'pas l'Sieur J.N. Richard ermercyit l'Sieur Raymond Le Liard et les siens d'l'office siez Boutin pour aver arrangi un si bouan jour, et prîncipal'ment pour tout l'embarras qu'ils avaient prînt à arrangi tout si bein en grand' vitesse vendrédi matîn. La Dlle. Le Boutillier ermercyit l'trésôryi et la ségrétaithe pour lus partie d's arrang'ments étout, et l'Sieur Le Liard et l'trésôryi dîdrent tchiques patholes en rêponse.

 

Fallit tout-d'-suite sé r'mettre en route pour Granville et l'baté pour Jèrri. la mé 'tait "comme eune planche" à r'vénîn, et tous, p'têtre un mio lassés, pathaissaient divèrsément contents d'lus jour en Nouormandie.

 

L'Assembliée d'Jèrriais

Jersey Weekly Post 1/9/1962