1961: Ph'lip et les finances

 Ph'lip et les finances

Merrienne et une heutheuse vie

 

à Portinfé,

Saint Ou.

 

Jeudi au sé.

 

Moussieu l'Editeu.

 

J'veins justement d'entendre que l'Comité des Finance ont perdu dans l's Etats par vingt-ieune vouaix à djaix-neuf. Ch'est bein appréchi, mais ch'est une mâjorité que nou n'peut pas ignorer. Si ch'avait 'té quarante vouaix, ch'éthait 'té la même chose. Lé Comité ont perdu et dans m'n opinion, i' dév'thaient être rempliéchis sans autchun délai, mais, par chein que j'en comprends, chonna n'a pas ocquo 'té fait. Sans doute, j'en séthons pûs long bein vite.

 

J'me r'souveins que l'grand Baillyi Vernon d'aut'fais, une bordée, dans d'pathelles circonstances, avait dit que l's Etats n'pouvaient pas être sans un Comité des finances, même pour une heuthe, et ch'tait un homme tchi savait tchèsqu'i' disait, mais agniet tout est changi et les Comités font pûs ou mains comme i' veulent. Avec chonna j'maintcheins que l'Cyril Lé Merquand, ayant perdu la confianche d'eune mâjorité des membres, s'en va s'trouver dans un drôle de pôsition s'i' n'abandonne pas en faveur d'un autre, et pas seulement li, mais l'restant du Comité. I' faut admettre, Moussieu, que je n'm'attendais pas à chein tchi s'est arrivé, car i' m'semblye que l'Cyril a fait sa djobbe comme-i'-faut.

 

J'en avons pâslé un mio, la Merrienne et mé, et, en nos couochant hier-au-sé, ou voulit saver tchèsqu'était chu Code dé 1771, et pourtchi qu'nou-s-éthait voulu l'changi après tant d'années.

 

"Jé n'peux pas t'en dithe bein long," j'li raîponnis, "mais quand j'tais mousse man pèthe m'en montrit une copie, et j'me r'souveins ocquo de tchitchunes des drôles dé provisions. Y'en avait yunne, par exemplye, tchi forchait touos l's hommes tchi n'taient pas en mal santé d'aller au templye pârouaissial tous les dînmanches, et d'être dans lûs sièges devant qu'la clioche eusse fini dé sonner. Y'avait une amende pour la preumié fais tch'i' n'taient pas là en temps et une pûs forte amende pour la deuxième fais. Dans chais jours-là, les Méthodistes n'avaient pas 'té inventés, et ch'tait l'Recteur tchi 'tait la personne la pus importante dans la pâraisse."

 

"Mais," ou s'fit, "tandis qu'lûs hommes 'taient au tchulte, tchèsqu'arrivait à lûs femmes?"

 

"Pour bein que l'dîné fusse prêt quand l's hommes r'venaient de l'auberge - et souvent ch'tait dans l'mitan de l'arlévée - tout allait comme-i'-faut," j'lis dis. "Mais n'oublie pas que quand l'Sieur de Quetteville, dé Saint Martîn, 'tait en vie, et quand l'John Wesley vînt dans l'Île hardi d'gens né considéthaient pas que les femmes avaient d's âmes à sauver."

 

"Et," j'ajouôtis, "y'a pûs d'yun d'nos vaisins tch sont fortément de ch't'opinion à ch'teu sinon que les pouôrres balloques n'ont pas l'couothage de l'dithe ouvertement, sinon p't'être ès parchongniers tch'i' trouvent en Ville au samedi."

 

"Mais," j'continuis, "ch'n'est pas tout chu gniolîn-là que l'Comité des Finances voulait aboli, mais la provision tchi dit que personne né peut chergi pûs d'chînq du chent pour des sous prêtés. Les banques savent la louai, et sont forchies dé l'obéi, mais ils ajouôtent yun du chent pour chein tch'ils appèlent lûs commission."

 

"Mais," ou dit, "quand tu fus en Ville chu samedi-là pour tâchi d'emprunter chent louis d'la banque, ou r'fûsit de t'prêter un sou."

 

"Vèthe," j'li dis, "car ou voulait une doublye garantie, ch'est-à-dithe, j'éthais veu à trouver deux bouons amîns à garanti chent louis châtchun, et à chu moment-là je n'savais pas iou les trouver, car j'n'avais pas péyi man rât pour trais ans et l'Connêtablye m'avait envié une lettre mé disant tch'i' s'n'allait faithe arrêt, Je n'sais vraiement pas comment que j'm'en deshallis chutte bordée-là, et pourtant j'avais la maison et une trentaine dé vrégies d'têrre."

 

"Vèthe, man pouôre Ph'lip," ou dit, "j'avons yeu à en enduther de pûs d'eune sorte dépis l'jour que j'décidîmes d'nos mathier et d'vivre en espéthance, mais j'avons pâssé à travers quand-même et la pliupart du temps j'avons té en santé."

 

"Pas tréjous," j'li dis: "as-tu oublié les rignons?"

 

"Et té, tan ma dans l'dos, ch'est-à-dithe la pièrcheusêté?"

 

"Et té, avec tes r'fredeuses et tes gambes enflyiées?"

 

"Et té, avec tes indigestions, quand tu'avais mangi trop et la djobbe à ramonter les d'grès apres une Assembliée d'Pâraisse?"

 

"Et té avec tes trais livres de tais une semaine?"

 

"Ch'n'est pas vrai," ou dit, "i' n'y en avait que deux livres et d'mie, mais Ph'lip si j'continuons comme chonnechîn, j'allons nos trouver en brit et je n'sais pas pourtchi. Si j'avons yeu une touche de mal santé par bordée j'avons yeu bouonne santé étout, et i' m'semblye qu'à notre âge, j'pouvons nos conter bein chanceux. I' n'y en a pas hardi par ichîn tch'ont fait mûs qu'nous. Tchèsqu-tu dis d'une tranche de lard fricachi avec deus-trais patates et tchiques pais-d'mai?"

 

J'ai tréjous ouï, Moussieu, que la preumié chose qu'une femme mathiée dait faithe pour garder s'n homme dé bouonne humeur ch'est d'li donner un ventre plein. Et j'pouôrrais applitchi chonna ès femmes étout, car quand lé soupé fut prêt la Merrienne avalit une bouonne maintchi dé chein tchi s'trouvait dans la cas'trôle.

 

Changeant un mio d'sujet, quand au mais d'Novembre les Etats éthont à considéther l'Aperchu des dêpenses et des r'chettes pour l'année tchi veint, i' m'semblye que l'Chancellyi éthait à s'gratter la tête un mio pour tâchi d'balanchi, car y'étha des d'mandes comme l's Etats n'ont jamais veu, et les dêpenses extraordinaithes s'en vont être hardi pièthes que jamais.

 

Quand j'dis chonna à la Merrienne ou d'mandit tchèsque chais dêpenses voulaient dithe et j'fis d'man mûs pour lyi explitchi.

 

"Y'en a tréjous yeu," j'li dis. "Ch'est pour des sous tchi n'ont pas ocquo 'té votées, mais comme de règlye i' sont assez raisonnablye. Chutte fais, à chein qu'nou-s-en comprend, ch'est un total ênorme que l'Comité des Finances éthont à trouver tchiquebord. Mais la vraie situâtion nou n'sétha pas d'vant l'Budget, au mais d'Avri. Touos l's ans l's Etats sont près dé s'trouver en banq'route à la fin d'Novembre, mais, par tchique mithaclye, quand veint l'mais d'Avri, y'a tout plien d'sous dans l'coffrefort. Mais j'dêpensons bein trop chais jours, et si chonna continue j'ne s'sons pas longtemps d'vant nos trouver dans l'embarras."

 

La Merrienne d'mandit si y'éthait autcheune chose de fait pour les fermiers. "Autrément," ou dit, "y'étha bétôt des fermes à vendre."

 

"N'té gêne pas," j'li dis, "y'étha étout des millionaithes à l's accater."

 

Ph'lip

EP 23/9/1961