Des Memouaithes De Ma Jeunesse

This is the script for a Lettre Jèrriaise broadcast on BBC Radio Jersey, late 1990s/early 2000s. This was written by Clifford Laisney, not for publication but as a script for reading, so spelling, punctuation, typing is not "corrected" or standardised.

Des Memouaithes De Ma Jeunesse.      

Bein des gens chi m’ecoute a matin aurorons pus d’recollections du temps passé que j’puisse offri, mais j’voudrais quand meme addrechi mes pensées es pus jeunes chi prends un intethet dans n’out vieille langue et coutoummes.

Mes pathents avais fermé dans la paraisse de St.Jean pour 29 ans, et chais la que j’avons ‘tait el’vees, mes deux freres et deux soeurs. Quand j’t’aimes mousses, et j’pasle des années 1930-45, la vie n’tait pas toute pour les pourres fermiers, y n’avais pas d’aige des Etats cououmme chi qu’ils ont qu’jour d’aniet. Ch’tait necessaire de gratté et bein des fais nos pathents lus d’mandais de ou’est qu’el prochain sou s’aller v’nint pour garder la famille et payi les comptes. A chute raison, coumme mousses j’t’aimes aprins a donné un coup d’main ou’est que j’pouvaimes.

Quand vlnair Le Samedi ch’tait pas le cas d’aller j’oué la football coumme bein d’nos camarades ch’in n’tais pas en farme, fallait grate les raves et navaits pour soigni les bestchaux le Dinmanche. Au Samedi fallait soigni d’netti l’bel et arrangi l’s’affaithes le tou des batisses. Quand v’nait la saison d’la pliantie, au r’venant d’l’école ch’t’ait toute suite au clios pour aidgi a charge lescasses a patates et rentrer les betes a l’établye. Un travas que j’trouvais detestablye ‘tait quand v’nait la saison d’la deffouithie. Aupres que les tach’rons avais defoui toute la s’mnaine et mins les patates en restais, pour l’evelane e’les couchons, une tache pas bein interessante j’vos garantie, surtout quand y faisait caud, et que les p’tites patates etais ratatinées a cause du sole. Aupres que’l clios avait ‘tait cliargi d’vignes et que pepée avait griffone et harchi en preparation pour la prochaine recolte ch’tait acquo les mousses ch’avais l’travas d’guener les patates ertrouvées, et les metre en bouaites pour s’mence. Duthant l’été j’avaimes pas bein d’s’opportunitees d’aller sus la gréve coumme chi que’l efants ont au’jourd’aniet. Nous attendait trejours fete le jour de la sortie d’l’ecole du Dinmanche. Ch’tait vraiment tchique chose d’aller pour une promenade dans les vainnes et pus tard dans les wagons. Quand n’out viager d’un but d’l’ile a l’autre y r’s’emblait que nou s’aller dans un pays etrangi.pour les St Ouennais, viagi j’us’qua Gouray ‘tait une vraie entreprinse. Dans mon jeune temps, la majorité d’fils fermiers restais sus la ferme quand y chittais d’l’ecole, et par chu temps la nous avait une bounne idée du travas. La grand partie d’la cultivation d’terre se faisait auve les ch’vaux et pus tard le tracteur fit s’n’apparence. J’men r’appelle tellement quand le tracteur a rouelles de fé, le Fordson, ‘tait vraiment tchique chose a vais. Mon pethe nos a raconteur souvent coumme tchique quand une fais il avait engage un contracteur pour tourné la terre au c’menchment que’l tracteur fit s’n’apparence, le ‘deuxieme jour de tournie, y trouvites toutes sortes de fourbi que les vaisins avais enfoui, esperomt qu’el tracteur n’aurait pas la force de passer l’travers. Quand nou tourné le terre, c’h’tait pas une affaithe d’arrivé au clios auve une tchêthue a quatre rais coumme au’jourd’aniet, c’h’tait une tchêthue a trein,auve un houmme a t’nin, et un autre houmme a chaque but du clios a fouit le pitchage et r’habbilyi a m’surs. Aupres qu’el betchet ‘tait tourné fallait fouit les carres a la bêque et remplyi les raises, et tchique fais quand nou s’vait tourné l’clios a deuchté, y’avait une bounne raie a remplyi dans l’miton du betchet. J’ai veut auprés avait travaillyi bein du a remplyi auve l’aidge d’un bouon choeu que nou s’avait laissi, pepée vendrait vais l’travas et insisté que y’avait trop d’fias et acquo une fais fallait remmencer d’la terre pour faithe le miton pus uniforme.

Dans doubte les gens avaient pus d’forche et d’energie dans mon jeune temps ch’il ont au’jourd’aniet. Aupres que les patates etais l’vée et merqués l’iron, fallait les griffoné a bras, une tache assez duthe. Y fallait les r’passé toutes a la pliatte houette, pas d’arros’ris pour empéchi la serc’lye dans chais temps la, et pour en fini tout ‘tait houetté a bras. Si nous avait un ch’va chi marché d’pres la coutoumme vinc de son faithe servi pour griffoné et houetté, un grand amendement. Bein seux la saison la pus pliasante ‘tait quand v’nait la moisson. J’men rappelle quand l’avout ‘tait toute siée a bras, et les femmes gerbées, et pis tout ‘tait montait montait en binots, et malheur si les binots n’taits pas pliachis en ron drait. Quand v’nait l’temps d’battre, tout ‘tait charge en vethuthes, et chi spectaclye de vais une douzaine de vainnées de froment en route pour la machine a batter. Les machines a batter ‘taits gouvernées a la vapeur, et c’hais’un portrait que j’noubli’thai jamais. Le grans engine soigni au tcherbon, chi donné des pouffées d’fumée. L’odeur de la vapeur et la grand chaine chi connecté l’engin a la machine. Ch’tait vraiment une pliaiche d’activité, des bounhoummes partout, chachun a sa poste, les uns passais les gerbes de la vethuthe a la machine, d’autres soignées d’la grenelle et finallement y’avait l’étrain a charge. Naturrellement y’avait trejous un bounmoumme chi faisait l’tou auve le jougiee d’cidre, une tache bein importante surtout quand y faisait une chaleur. Chais ch’la que nous app’lé les bouons viers temps.

Chai’que naturelle que amsuthe que l’temps s’passe les affaithes change, chais forchi qui’l es necessaire de suivre le temps modern, mais j’em demande tchique fais si les gens n’taits pas pus heutheux dans l’temps passé. Tchique quos’ont criyis?

 

Clifford Laisney