We don't recognise the author of this piece.
Chein
qu'ou z'avêtes oublié
"Les
Carrièthes," St.-Jean
Moussieu,
- J'eunne sait pon pour tchi, mais dans vot' gazette d'agnièt,
Samedi, - rapport au présent et au dîné à not' Connêtab',
Mousieu Maugi, - ou z'avez fait d'z'oublis. Dé p'tits oublis, ch'est
vrai et j'n'en disconveins pas, mais qui valent bein la peine de
r'corrigi.
D'abord,
ou zéthiez deu dithe que Mess Williams avait prins soin que les
hèches fussent toutes ouvertes. Ch'tait, j'pense bein, pour
souhaiter la benv'nue à tous en arrivant, et en même temps pour
faithe le qu'min aussi large et aussi aîsi comme possib' pour yeux
en sortant d'la veue oprès l'diner : Messe Williams est un
homme qui methite bein d'être ermercié pour toute sa
considéthâtion, car il en a, Mess Williams, d'la considéthâtion.
La
précheine chose qu'ou z'aviez oublié ch'tait l'ambulance. Nou n'sé
jamais qu'est qui peut arrivé ; un mio d'pé d'orange sur
l'plianchais, et crac ! vos v'la allé sus l'fi du dos, ov,
p'têtre, un d'ghéthet rompu. Et comme les oranges ne mantchaient
pon, Mêcredi, et que l'plianchais du pavillon est déjà poli comme
un mousieu français, y'avait chance d'accidents – Et d'même
y'avait une ambulance. C'est autrement pus qu'mode qu'une hèche ou
qu'un us de ch'l'yi pour porté un estropié siez le docteu et pis
ch'est tout prêt ; n'ya pon à la dêpendre. N'ya qu'à la
bouler. Car, i faut bein l'dithe, ch't'ambulance ichin avait une reue
– une seule reue – et deux manchos, - dé nièt nou l'éthait, ma
fingre, prinze pour une chuvièthe. – Ou l'avait tè minze dans
l'grand shed – tout d'amain enfin.
Tout
d'même, tchi fricot ! j'm'en passe oquo la langue sus les
lippes. Ch'est d'tché bon qu'un maq'sé fricachi ov des nouvelles
patates mais las ! tch'est qu'est ch'là aupi du fricot à Mess
Williams ! Et pis, m'z'êfans, pas d'rêcauffin ! oh mais
nan d'ja. Tout sentait l'frais et nou sé s'sé quasiment rassasiés
reinque à senti l'odeu quand les waiteurs
passaient
ov les assiettes et les pliats. Mais nou s'rassassiait oquo mus à
mangi. Et pis yen avait à go-go. N'y'avait qu'à prendre. Le dîner
d'la Société, dans l'mais d'Mai, oprès l'show des ch'vaux, vaques,
gniches et beurre, m'avait tréjous pathu comme du tout miyeu, mais
j'avons yeu oquo bein pus bon Mêcredi.
Ou
z'aviez oublié, ètou, de dithe que y'avait des tas dé touffés de
gérèmiennes d'hivé – des siennes à long pé tout corlé –
dans des vases sus les tabl'yes.
Oquo
un autre oubli ! Ou n'aviez pon dit rein sus l'champan'. Y'en
avait pourtant qui passi ; et du bon. Pas d'vos bouteilles de
vier cidre ov un billet avec "Champan' " êcrit d'sus.
Ch'tait sans doute pour les santés, comme de raison. (S'ou criyis
qué nou n'devthait pon rein dithe du champan', rapport qué chest un
mio chi, brûlez chutte page ichin ; mais j'vos asseuthe que
chutte litcheu là valait la peine d'être mentionnée sus la
gazette. Enfin ou f'thez comme ou voudrez, ch'n'est pon à mé à vos
qu'mander).
J'comprends
pas pour tchi que nou bé la santé du Roé d'la monièthe nou l'fait
d'nos jours. – Si j'men rappelle quand nou z'allait ès montres et
qu'not sergent l'vait san verre à la vieille reine quand v'nait not
soupé, ch'tait tous comme un homme qui chantaient God
save the Queen. Achteu
ch'est comme oprès une élection, quand nou bé à la santé du sien
qu'est battu ! Pas un mot, ch'est comme à un enterrement !
Pâlez mé de loyauté !!
Savous
bein tch'est qu'jé r'mertchi ètou ? Que difféthens hommes ont
difféthentes manièthes de rapp'lé lus idées quand i s'en vont
faithe un speech.
Je r'mertchais Mercredi : Yun ergardétha l'verre de lampe endré
li, l'autre mettra une codrette (car yavait des codrettes ètou) sur
l'doubli et l'a r'gardetha d'temps en temps, l'autre f'tha "Hum,
Hum, Ahum, Ahum,"sept ou huit fais pour se cliergi la gorge ;
un autre attendra qui s'sait d'bu et pis i prendre, à san laizi, une
grand' pinchie de s'no – ch'là lis r'donne le temps de passé sans
muochet d'vant sa fache et p'têtre d'éternuer un mio. Enfin un
autre prendra san muochet – i faut que ch'en s'sait un blianc –
et quand i s'sa l'vé, i torchetha sans nez ! Ch'est tchuthieux
à r'mertchi est-che pon ?
Et
les speech !
I valaient quâsi l'diner, sinon que nou n'pouvait pon les mangi.
Comme
tous l'disaient : Not' Connêtab' essa ergretté par les
St.-Jeannais et par tout Jerri, car en fin d'compte il s'est montré
un buon Connètab' pour St.-Jean et pour toute l'île.
Si
j'avais yeu à faithe un speech
j'lus éthais dit chonna ètou.
Enfin
ou z'aviez oublié de dithe qué n'yeut pon d'accident. Nou se
s'pathi en heuthe respectab', tous comme i faut, en gens qui savent
vivre. Pas d' bagoul'lie à tort et travers, ni d'picangn'nie sans
faithe mîne
de rein. Tous d'accord que nou z'avait yeu une buonne séthée et que
nou z'allait perdre un buon Jerriais.
Vot'
serviteu,
LÉ
VI DU MONT-MADO.
P.S.
– I n'fut pon besoin d'la chuv …. èt ……. d'l'ambulance, et à
chein qui pathaît, ou resti dans l'shed.
J'cré bein qu'ou n'yest pus, car à la saison tch'est, l'monde ont
besoin d'lus chuvièthes et l'ambulance à Mess W. pourrait en servi
au besoin.
La
Nouvelle Chronique de Jersey 17/1/1906
No comments:
Post a Comment