1910: D'pis tchique temps, j'voulais allé faithe eunne touânnée dans la pâraisse à 'Douard

D'pis tchique temps, j'voulais allé faithe eunne touânnée dans la pâraisse à 'Douard et quand l'aoute jour j'vit des cârosses près d'la Cohue et qu'j'entendit iun des cabbies dithe que ch'tait la visite royale à Saint-Louothains, j'pensi à mé-maîme : Caouan, dèspêches-té, et vite mé v'là en route pour le parish hall, iou qu'il est tréjous douze heuthes et tchiques minutes d'pis qu'la belle parisienne est paralysée.

Quand j'arrivi dans l'parish hall, je'm muchi dans une cârre du foyi.

J'vit que touos les cheins qu'étaient là avaient mins lûs câsaque du dinmanche, et j'sis bein saeux que pûs d'un pèrrutchi ou d'un barbi fit des sous, car nou viyait que presque tous avaient fait grande toilette pour chutte occasion, mais les haouts collets en gênaient hardi qui n'pouvaient pas quâsiment touânné l'co.

L'bouanhoumme By Jim 'tait là avec sa belle médaille.

Le Lundi de d'vant, il avait èspîlet sa médaille à sân veste, mais Walteur l'î haili pour l'î mettre sûs sa câsaque, du côtèt gaouche, et i' fît bein.

Les mêssieux d'la Cour arrivirent et furent s'assièthe mêli-mêlo alentou d'la table.

Le boss de la pâraisse lûs présenti le seul houmme en Jèrri, pour chu poste là, qu'ait ieu l'drouèt de porté une médaille, et i' fît tchiques ermerques bein à propos.

Les mêssieux d'la Cour ergardirent chutte médaille et adressirent des compyiements au vièr serviteur de la pâraisse.

L'avocat-général déshalli ses lunettes pour l'examiné et la touânni d'bord pour veîs l'inscription.

Nou z'éthait deu môtré à touos les Messieurs le biau pot-à-thée tchi fut douné avec la médalle. J'crai que s'fut un oublyi.

Ou viyîs, garçons, j'vos avez bein dit, mé caouan, que quand i' l'éthaient la visite royale dans chutte pâraisse, pour seux les Messieurs de la Cour f'thaient des compliments à m'n'anmin. I' peut êtes bein orgiyieux de la mettre sus sa câsaque et coumme i' s'faisait le jour qu'nou a mouoyi la médalle :

Oh ! mais, c'n'est pas tout. J'sis le seul en Jerri qui peut môtrer unne telle médalle.

J'vos dit, bouannes gens, que chutte médalle a tèt mouoyis. V'là qu'est la pûthe véthitèt.

Ch'tait le Lundi sièz Mess Jarnet. Un grand houmme fit la r'merque : Il faout la mouoyi ou bein ou la perdrèz Vendredi.

All right, coumme s'fit By Jim, d'sendèz à bas, garçons. J'pense qu'unne fais d'gin vos f'tha pliaîthi.

Les garçons n'aiment pas l'gin et i' y'en avait qu'éthaient voulu du champagne. Y prinrent un tas d'choses et nou pâssi unne boëttèe d'cigars. Tchi qu'a payi pour les cigares. J'nen s'ai rein, mé, mais si ou voulèz savé, d'mandèz au Seigneur des Montagnes. Il tait là.

La médalle fut bein mouoyis, ch'est pour chouna qu'ou n'fut pas perdue le Vendredi ni les aoutes jours.

La suite au préchain numétho, coumme nou mèt au bas d'la littératuthe.

Caouain

23/7/1910