How the Pains Saw the Hydroplanes!
Faudra vaie a s'moustré d'main au matin, que j'dis a nos gens Dimanche
au sé, apres que j'eûmes fini d'liéthe le Chapitre du sé. L's oroplannes
sont attendus d'bouonne heuthe demain, et Moussieu d'Rozé m'a d'mandé
d'allé dans l'ieau jusqu'au froutchet pour ètre yun des premiers a lus
souhaiter la ben'venue au nom d'la Cour. J'décidimes, ma femme et mé,
d'emné Lonore ov nous; l'docteu avait dit qu'l salin d'la mé lis f'thait
du bin, et d'la faithe pilvastchi jentiment dans l'ieau si y'avé moyen.
Lundi, j'fumes en l'heu par les qu'mins, et des preummiers sus l'sablion
“Par iou qui faut r'gardé, Pépée?” s'fit Lonore. Y s'envont s'en v'nin
dret en d'sus du chappé de ch't' houmme la, qu'tu vé la bas a torchi san
nez; et quand tu verras v'né eunne moniethe de grande mauve ov eunne
reue dans la tète et un houmme assés sus sans co - ch'est cheunna!
Ch'fut Laizé tchi fut la preumiethe a vaie l'Oroplane - l'sien qui s'en
fut s'assiethe dans l'ieau au bord de Bieaumont. Et pis, n'en r'véla
eun' autre qui touonne au d'sus d'nos tètes et d'sent endret le
Mont-ès-Pendus! J'nos minmes a couorre touos les très pour allé l'vaie
d'prés, quand tchiq'un criyi: “N'en r'véla un autre!” Et, ma fé vèthe,
y'en r'avait un autre! Mes deux femmes faisaient des signaux ov lus
mouochets. Lonore criyait: “Vive l'entente cordjalle! et mé, j'mins ma
chappé sus l'haut d'man paraplyie. Y d'cendit tout pres d'nous, et
j'couothimes dans l'ieau jusqu'aux j'nou pour être des preumiers a lus
châtchi la main. “Carr'ous d'la, espéce d'idiots!” qui criyites en
d'valant “J'os n'allons vos èsmaglyi!”
J'nos carrimes d'not' mus sinon Laizé qui choppi sus eunne touffe de
cliaque et s'èstravli d'san long dans eunne mathe; mais coumme
l'èsfriablye machine avanchait bouan rond sus nous avec eunne reue qui
touonnait en faisant un infernal bri, j'happe Lonore par la talle et
j'l'entraine hors de danji sans r'gardé driethe me.
Quand j'fumes ramontés jusqu'au “slip”, j'dis a Lonore d's'assiethe là
un mio tandi qu'j'érdévallais dèspieautchi sa méthe et chanté pouolle ès
aviateurs qu'avaient mantchi nos èsmaglyi.
Quand j'eut trouvé moyen d'm'faufilé parmi l'monde qu'était autouore
d'chu moniethe d'ouésé en bouais, et justement coumme j'm'n allais
c'menchi a lus dithe tchès que j'pensais d'lus condite, y s'adounnit
qu'je r'gardi en haut, et tchès que j'vit? Yun des orviateurs, ch'tait
l'sien a tchi j'avais fait créthe, a man dernié viage en France, que
j'm'en allais y'accaté un motor-car, et a tchi j'avais néglyiji d'renvié
très chents francs que j'avais empruntés la drenne fais que j'dini a
l'hotel a ses frais! Bigre! j'en èscappi bel! Par bounheu qui n'me
r'connut pon! J'm'en scoddi bin vite ramont la grève coumme un tchan
fouotté. J'r'trouvi Lonore assise sus le “slip” a s'amusée a faithe
r'bondi de p'tits gallots contre la pathé (ou'l est oquo un mio simplye
par bordées, mais v'la tchi s'passa ov le temps) J'nos en r'fumes siez
nous, yi et mé; et après avé bin diné et fait un p'tit soumme, j'dis a
Lonore: autant vaut qu'je r'descende sus la grève - l'oroplannes dévent
etre r'horts - vaie tchès qu'en est d'ta méthe. Mais j'n'avais pon fini
d'pâslé qu'né v'la deux policemen qui nos la ramnites par souos l'bras,
toute trempée, ses hardes en chiques, pas d'bonnet, mais d'bouone humeu
tout d'mème: dans y'eunne de ses mains ou t'nait sans livre d'cantiques,
et d'vant dithe mot, ou'l l'ouvrit au preummié flillet pour nos montré
ch'qu'ont avait gagnyi en s'estrueullant endrét la machine - la
signatuthe d'y'un des orviateurs! Et il est pour v'né béthe du tée siez
nous a sa préchenne visite, a ch'qui y'a dit! Lonore en saute de jouée.
Met'-avis qu'ou saut'a souvent d'vant qué d'le r'vaie!
PITEUR PAIN
Morning News, Thursday August 29, 1912
No comments:
Post a Comment