Monday 3 August 2020

1910: La pêque dé nouvelles - Fishing for news

J'pensais d'vos dithe daeusse-treîs mots sûs chein qu'j'ai veu et ouï ès Minquiers, où'est qu'l'assembyaie des Gouvernaeux, Bâilly et Juges a acatèt un châté pour vin'-chinq souvérains, mais ché s'sa pour eunne aoute feîs, car pour vos dithe, j'ai l'intention d'y'allé tchique grand' mathée à la pêque à basse ieau.

Un caouan tchi s'en va à la pêque peut vos pathaître un mio drôle, bouannes gens, mais chutte pêque, ch'n'est pas pour ramassé un fricot d'crabes ou d'bainits, ni pour cherchi à fouilli pour de z'anjulles dans des houles, mais ch'est simpyiément à la pêque de nouvelles, de ouï-dithes, et pour veîs mé-maîme chein qui s'passe sûs chès rotchiers de temps en temps coumme nou z'entend.


Sav'ous, bouannes gens, tout chein que nou dit du caouan ? Sav'ous tout chein qu'nou voudrait m'faithe présent ? Créthaîtes-'ous bein qu'y'en a qui tremblle dans lûs pé quand nou met sûs la gâzette que le caouan a tèt se diverti un mio dans lûs pâraisse.

N'en v'chin un exemplle. Eunne feîs, un moussieu qui cré avé hardi d'influence dans sa pâraisse – je n'pense pas tchi y'en reste fort ach'teu – entri dans l'office et dis que si l'caouan pâslait d'li, i' dithait à touos ses anmins qui prennent la gâzette de discontinué.

Mais chu moussieu n'en fit rein, et j'vos assaeuthe que ch'fut tant mûs pour li, car ou' viyîs le caouan en connaît long, et si s'met dans la tête de pâslé, nou z'a bein d'la painne à faithe se taithe.

Un aoute feîs, un moussieu dèshali sa bourse et offrit un ch'lin pour péyi eunne feîs à bèthe au caouan ! Tchi l'affront. Et mé qui sîs teetôleur. Mais en maîme temps, j'cré bein que ch'tait bouan tcheu.

9/7/1910

No comments: