Les
vielles fanmil'yes Jèrriaises
Le Ménage ès Feuvres,St. Ouën.Lé 26 d'juîn, 1976
Moussieu l'Rédacteu,
En r'gardant les noms des bouannes vielles fanmil'yes dans L'Armorial dé Jèrri par J. Bertrand Payne, nou n'peut sénon êt' chagrinnés d'èrmèrtchi la dispathition d'ches vraies fanmil'yes Jèrriaises dépis 1859, année d'publyicâtion d'la preunmié partie d'L'Armorial. C'menchons par lé nom Anquetil, dé grande vielléche en Jèrri, d'originne Nouormande et mentionné par Wace dans san Roman de Rou. Lé Docteu Frank Le Maistre, OBE, nouos dit dans l'Bulletin d'L'Assembliée d'Jèrriais d'Noué, 1965, tch'i' n'y'en qu'eune seule fanmil'ye dé restant. J'mé rappelle qué ch'tait un Sieur Anquetil (nou prononçait l'nom "Anqu'tîn") tch'était porteux d'lettres à St. Ouën quand j'tais mousse.
Un aut' vièr nom dans L'Armorial est Anthoine. L'Armorial nouos dit qué William Anthoine 'tait natif dé Colongne en Allemangne mais qu' san fis Diricke 'tait à Londres et au Portûnga pour un temps et finnit par s'êtablyi en Jèrri vèrs la fin du règne dé la preunmié Reine Élîzabé. L'Docteu L'Maistre nouos dit dans l'Bulletîn tch'i' n'y'a qu' eune seule fanmil'ye dé restant à ch't heu, à St. Sauveux, tchi d'scend d'chette-là. D'aut' du nom n'sont pon d'souche Jèrriaise.
La fanmil'ye Bandinel tchi, d'aprés L'Armorial, était nobl'ye, mentionnée dans l'année 1040, probabliément d'originne Italienne ouaithe qu'ou pathaît pus tard à Aix en Provence et êventuellement en Jèrri, est péthînmée.
Lé nom Boudier, qu' nou prononçait "Boudgi" en Jèrri, tch'était d'eune fanmil'ye dé Nouormandie anciennement, est quâsi péthînmé étout. I' pathaît tch'i n'y en a qu'eune fanmil'ye dé restant à ch't heu. Y'a ieu pas mal dé minnistres dé Églyise Anglyicanne dans chutte fanmil'ye là. Iun, lé Révérend John Boudier 'tait Recteu d'St. Ouën dé 1785 à 1794.
Nouos v'chîn arrivés à eune fanmil'ye illustre et r'nommée en Jèrri, en Angliétèrre et en France étout, la fanmil'ye d'Auvergne. L'Armorial nouos dit tch'i' y'a des dotchûments authentiques tchi prouvent qu' oulle existait comme fanmil'ye nobl'ye dé la France dans l'année 800. Lé nom est bein connu d'nouos jours en Jérri étout. Quand j'tais mousse j'allais vaie la Tour du Prînce à La Hougue Bie, bâtie par l'Amitha et Prînce Ph'lippe d'Auvergne, Duc dé Bouillon. Et ch'tait Moussieu Henri Philippe d'Auvergne tch'était Connétabl'ye dé St Ouën quand j'allais à l'êcole. Né v'la eune aut' fanmil'ye Jèrriaise péthînmée étout.
La fanmil'ye de la Garde, cèrtainement en Jèrri en l'année 1500 et alliée par mathiage ès Collas, Lemprièthe, Benest et Le Hardy, est péthînmée étout.
La fanmil'ye de la Place a dispathu étout. D'après L'Armorial, ouelle 'tait provenue d'la Provînce d'Angoulême en France. Lé Révérend Pièrre de la Place et sa preunmié femme lus sauvîdrent dé France à cause dé lus réligion et s'êtablyîdrent à St. Ouën en Jèrri. I' fut Recteu d'St. Ouën dé 1576 à 1598. Il avait mathié Mdlle. Lîsabé Dumaresq en deuxième neuches.
La fanmil'ye de la Taste, distîndgie, originnaithe dé Saintes, près d'Bordgieaux en France, et êtablyie en Jèrri dépis tchique temps auprès la Révocâtion d'l'Êdit d'Nantes en 1685, a presque dispathu étout. I' n'y a qu' eune seule fanmil'ye dé restant. Quand j'tais en Jèrri dans man janne temps, j'ouiyais pâler des Démouaîselles de la Taste.
Né v'chîn eune aut' vielle fanmil'ye: La fanmil'ye de Quetteville. L'Armorial nouos dit tch'l' y'en avait iun tch'était Connêtable'ye d'St. Martin dans les 1330, et j'ai examinné la liste des Connêtabl'yes dé chutte pâraisse là dans l'Bulletin d'La Société Jersiaise dé 1907, mais i' n'est pon d'dans. L'preunmié Connêtabl'ye mentionné d'dans est Jean Nicolle à la date dé 1490 à 1496, mais Edmond de Quetteville est mentionné comme Connêtabl'ye de St. Martin dé 1587 à 1597, Elie de Quetteville dé 1770 à 1773, et Frédéric Nicolle de Quetteville dé 1883 à 1886. Quand j'tais mousse y'avait un de Quetteville tchi gardait boutique à La Hauteur dans La Rue Freûle. Ou'est tchi'i' sont tous à ch't heu, les de Quetteville? Y'en a-t-i' d'restant en Jèrri?
Deux fanmeuses vielles fanmil'yes en Jèrri d'vièr temps 'taient les de St. Martîn et de Vaumorel. I' sont êteintes dépis longtemps. Les de St. Martîn 'taient Seigneurs du Fief Haubert et Seigneurie dé La Trinneté, et Philippe Chouët de Vaumorel, lé preunmyi du nom en Jèrri, avait mathié en 1755 la Dlle. Constance Charlotte Le Hardy, fille dé John Le Hardy tch'était Protchuleux-Général dé L'Île en 1729.
Et la fanmil'ye Dumaresq? Lé Bulletîn d'L'Assembliée d'Jèrriais d'La St. Miché, 1965, nouos dit tch'i' n'y en a pus. L'Armorial nouos dit qué bein p'tit d'fanmil'yes peuvent lus vanter d'un lîngnage pus ancien ni pus distîndgi qué l'chein d'chutte fanmil'ye là. I' pathaît qué l'preunmyi du nom, v'nant d'Nouormandie, vînt en Jèrri au c'menchement du treizième siécl'ye, et Jordan du Maresq 'tait Juré Justicier d'l'Île en 1292.
Hélas! J'pouôrrais continnuer à vouos en pâler, d'ches vielles fanmil'yes Jèrriaises dé distînction tch'ont presque ou entchiéthement dispathu, mais i' faut qué j'm'arrête. Mais ou pouvez en vaie bein pus dans l'Bulletîn d'Noué, 1965, dé L'Assembliée d'Jèrriais.
No comments:
Post a Comment