Monday 22 February 2016

1936: Horsing about

I'y a des gens qu'ont une telle confiance en ieux-mêmes et qui s'craient capablyes de faithe aussi bain, si pas mus, que les siens qu'ils ont veu lus distindgi dans autchune forme de "sport."

Le Bill Gromette en est iun d'cheux-là.

Toute sa vie il a ieu un divérs goût pour les ch'vaux et a tréjous ieu une si haute opinion de li-même qu'i' prétend que personne ne peut li apprendre rain.

Eh bain, au show du mais d'Aout i' fut à Springfield ouest qu'i' vit la démonstration par les "Iniskilling Dragoons."

Les fermiers qu'étaient alentou d'li furent naturellement êmervillyis de vaie tch'est ches gaillards-là pouvaient faithe avec lus ch'vaux et i' dirent comme chenna. "Eh bain, tch'est qu'tu en craie té, Bill?"

"Oh!" qu'i' s'fit, "quant à mé je n'y vai pas rain d'extraordinaithe."

"Oh bon," iun d'ieux dit, "tu pouorrais sans doute en faithe autant, té!"

"Ah, ma fé vaithe dja, avec un p'tit mio d'pratique."

"Touos l's autres s'êgouffirent à rithe et i' li dirent: "Eh bain je voudrethions t'y vaie y êprouver! Che s'sait oquo pus interêssant que chein que j'avons veu annièt!"

V'là qui pitchi l'Bill un mio et i' dit à li-même, "Je verrons don si ch'est que j'peux l'faithe ou pas!"

Et le lendemain au matin, opprès aver dêjeuné i' dit à ses garçons, "Ous alle v'nin avec mé dans l'clios du pignon arrangi siex rangies d'fagots à la distance que je m'en vais vos dithe."

"Mais pour tchi faithe, pépée?" que iun li d'mandi.

"Ous allez vaie pourtchi faithe! J'allons vaie si ches imbéciles-là que j'rencontri hier au "show" s'en vont lus fichi de Bill Gromette!"

Quand les fagots furent en pliaiche, à siex marches entre châque rangie, i' dit au grand d'ses fils, "Va mettre le bridot à la Bijou et amène mé la ichin."

Le garçon criyait que l'bouonhomme avait perdu la tête, mais il obéi quand-même.

Tandis qu'il 'tait à ramasser la jument, san péthe, qu'était dêterminé d'imiter les soudards dans touos les détails, s'en fu à la maison pour cherchi un sâbre, mais comme i' n'y avait pas un tel articlye sus les prémisses, i' r'vint avec un manche de bringe, disant que v'là qui pouvait faithe la même chose.

I' monti sus sa jument et pis i' dit à ses garçons, "Là, allez vos assiéthe là sus l'fossé, ch'est vous qui r'présentez le Gouverneux et sa suite et je m'en vais v'nin vos saluer dé que d'c'menchi m'n exhibition."

Mais la Bijou ne comprenait pas la situation, lyi. Bill, qui n'avait qu'une main pour manier les brides, l'autre étant otchupée à t'nin san sâbre à l'êpaule, i' n'pouvait pas maîtrisi la jument. Il avait biau li talonner les fliancs et tâchi d'la dirigi dans la direction du "Gouverneux," la pouore bête cherchait tréjous le c'min pour s'n êtablye.

A la fin i' rêussi de l'amener en pliaiche mais quand i' s'mins à faithe des fleuriches avec san sâbre, Bijou s'imagini qu'ou s'en allait aver des ouapes dans la tête et ou r'vithi d'bord aussi court que l'pouore Bill bindi l'tchêne et fut alouogni sur l'herbe.

Mais i' n'perdit pas couothage. I' rattrapi sa bérisse et l'engambi oquo une feis en li touanant la tête dans la direction des rangies d'fagots.

"Hue! Bijou!" i' s'êcriyi.

Et la Bijou se mins à trotter mais au prumier obstaclye ou s'arrêti tout court.

La pouore bête ne savait pas qu'oulle 'tait supposée de sauter par dessus les fagots. Ou n'avait jamais 'té au "Drag Hunt."

Bill la fit r'touâner pour li bailli de l'avo et chute feis il abandonni sa postuthe militaithe et avec san manche de bringe vos l'y asseni deustrais ouapes dans les fliancs.

V'là qui réussi, et la pouore bête, êpouvantée par un traitement si extraordinaithe, franchi touos les fagots comme une héthonde.

Bill en était enchanté.

I' en fît répéter l'exercice un couplye d'fais et pis il entreprint le préchain itême sus l'programme.

Chennechin consistait de couorre le long d'la Bijou allant au pliain galop et à un moment donné, li sauter sus l'dos comme il avait veu les soudards faithe.

Tout chenna 'tait bouan en théorie, mais Bijou n'était pas accouôtumée à être ramassée d'la sorte et quand Bill fît san prumié saut, ou fît un êcart et Bill mantchant sa gaffe li roûli par-sus l'dos et resti êbaubi sus pliaiche. La jument prins l'vo' hors du clios et sen fu paître dans l'gardin à pommiers.

Les garçons couothirent au s'cours de lus péthe, comptant qu'il avait attrapé de ma, mais i' n'souffrait qu'du choc et i' se r'butti en lus disant, "Je n'sis oquo pas vaintchu! Tandis que j'sis à attraper la jument, allez dans la boulang'thie ramasser l'tro à pêtri et pis ous allez le pliaichi dans l'mitan du clios. Opprès chenna ous allez cherchi châtchun votre arme et vos acclioutchi souos châque but du tro. Je m'en vais faithe la jument sauter par dessus l'tro mais quand ou la verrez faithe san saut ou tithethez vos armes en l'air."

"Mais pépée," le grand se fit, "j'allons faithe peux à la jument et tu t'en vas faithe des bêtises!"

"Mêle-té de tes affaithes, et fais comme je t'dit!" li raîponni l'bouonhomme.

Quand tout fut prêt, Bill, avec une badgette d'orme à la main, en baîlli deuxtrais ouapes sus les fliancs d'la jument qui s'en vint le ventre-à-terre dans la direction du tro.

Mais les garçons dans lus excitation tithirent lus armes un moment ou deux trop vite avec le rêsultat que la Bijou s'arrêti tout court et Bill fut êlindgi par sus sa tête et tchi en travers sus l'tro, ouest qu'i' resti êtendu sans connaissance.

Missice Gromette lyi, qu'avait ouï les détonations, s'en vint couothant pour vaie de tchi qui s'agissait, et quand ou vit s'n homme êtendu sus l'tro et les armes qui fumaient oquo entre les mains d'ses garçons, ou pensi tout-d'suite qu'i' v'naient de tither lus péthe et ou poussi un brai et s'êvanni raide.

Par chu temps-là tchiqu'uns des vaisins arrivithent sus les lieux et nou téléphôni pour un docteu et pour le Chantnyi et finalement Bill fut porté à l'Hôpita dans l'ambulance, ouest qu'i' trouvithent qu'il avait treis côtes de rompues chein quoi s'en va le garder- pour un mais.

Et che n'est pas tout.

La Bijou, à la maintchi folle d'épouvante s'êcappi hors du clios en franchissant l'fossé et s'en fut galvander dans les tomates à Douart Bambou ouest qu'ou fit un saccage abôminablye si bain que Douard attend que Bill es'sait r'dgéthi pour li faithe un procès pour vingt-chinq louis d'dommages.

Le pasteur à Bill à 'té li payi une visite et opprès aver sympathisé avec li dans son prédicament i' li fit un p'tit sermon et finit par li dithe qu'il aithait deu se rasouvenin d'la fablye de tchi la morale est -

"Chacun à san métier, et les vaches seront bien gardées."

Cahouain
Les Chroniques de Jersey 19/9/1936

No comments: