Friday 12 February 2016

Johnson's Cough Mixture

Eune poésie (eune annonche en poésie) par Mathilde de Faye d'1898:

A poem (an advert in verse) by Mathilde de Faye from 1898:



Y n'ia rein d'miyieu souos l'soleit,
Que "Johnson's Cough Mixture" pour un freit.

Et ma pououre Betsy, mon doux ! t'eschque q'tuas ?
Tuaus l'air bein geîneai, et dans l'embarras ;
Ah! j'sis amaintchi morte d'un maouvais freit ;
J'ein sait pas t'chi faithe, j'ai jusque l'nez enfiet.

Je sis si malade, j'sis quâzi daisrangie ;
Et pis yia étout m'homme et tuous les p'tits,
J'avons tous attrapet eun bein maouvais freit,
Vraîment, j'dévaithmes être tous au yiet.

Où n'aveais ni besoin du docteu, ni du yiet,
Si où vouleais faithe justement comme j' ai fait,
Alleais dans David Place, siez de Faye l'Pharmacien,
Pour Johnson's Cough Mixture qu'a l'y seul appartient.

Il en a des bouteilles de différents prix ;
Pour toutes les âges, pour les grands et les p'tits ;
V'la qu'est bon pour la toux et pour l'asthma,
Pour l'bronchitis, l'enrouement et l'influenza.

Y fait des pastilles qu'il appelle Pate Pectorale ;
Y sont bons quand n'ou chante où quand n'ou va en bal ;
Yia man bouan homme de Pèthe qui n'voudret pas être sans,
Sans Johnson' s Cough Mixture y c'sait mort yia longtemps

Il avet tréjous l'bronchitis dans l'hivé,
Devant q'nou susse chu r'miède là, ni yiou allé;
Mè étout, j'eu du freit, j'tais presque ocksis eunne faix,
Toute suite j'men allit siez Mousieu de Faye,

Y'm donnit une dose de Johnson's Cough Mixture,
Good Gracious!! j'ly dis, I'm another creature .
Chest merveilleux comme v'la qui m'fît du bein ;
J'en prins deux-streis doses, et j'tais bein mus l'endmain.

Preneais m'navis, ne siyiz jamais sans,
Gardeais n'en dans la maison d'peuex d'accidents ;
V'la qui vos saouvtha bein des comptes de docteurs,
.Chest par expérience que j'pâsle en sa faveur.

Y garde tout ; pour gennes, viers et êfants,
N'ou l'appelle Docteu, il est si erconnaissant;
Y vend des bouteilles de bouanne yieau d'cologne ;
Il en envie partout, même jusqu'en Boulogne.

Y fait étout de fameuses " Ginger Beer,"
" Ærated Waters" not to be compared;
Il eût une médalle à l'exhébition,
Chest là eunne preuve qui vend du tout bon.

J'sai bein qu'les gennes hommes ont envie d'onné
Eun cadeau à lus fille pour le jour de Noué ;
Ouè-que qui yia rein d'pus nice à lus donné,
'Qu'eunne bouteille d'yieau d'cologne pour les ravigoté.

Alleais siez de Faye dans David Place,
Si où vouleais du bon and with good taste ;
Où pouveais faithes toutes vos empiettes là ;
Et où s'ceais bein contents de votre achat.

J'vos souette à tous eun bouan Noué,
Et n'oubliyiez pas yiou allé.

Georgie

No comments: