1960: L'Assembliée d'Jèrriais

 L'Assembliée d'Jèrriais

Rêunion mensuelle

 

 

La dreine rêunion pour ch't année eut lieu sam'di, l'17 dé décembre, dans la Salle Parouaîssiale dé St. Brélade, et au mains 110 membres lus y rêunitent. Ch'fut eune raide bouanne séthée et la salle, qu'avait 'té décorée, pathaisait divèrsément bein.

 

L's affaithes pour la séthée fudrent courtes et auprès qué l'rapport du mais d'novembre fut liu et accepté et chînq nouvieaux membres d'êlus, la ségrétaithe liut des salutations dé deux membres hors pays. Lé Président annoncit l'restant d'la séthée dans les mains du Conmité Dramatique.

 

Divèrtissement

 

L'Sieur B. Amy, l'président d'chu souos-conmité 'chin, prînt chèrge, et Moussieu Ph. Ahier, B. ès S., avait arrangi plusieurs competitions qui 'taient bein amusantes. I' y eut dé raide bouannes gammes étout et quand vînt un temps les plus vièrs 'taient tout aussi animés commes les jannes! Tous pathaisaient lus y pliaithe hardi. Duthant la séthée i' y eut eune ercitation par la ségrétaithe et eune belle chanson bein chantée par Ruth Amy.

 

Raffraîchiss'ments

 

Dé vièr dgiex heuthes, les danmes dé St. Brélade et les siennes du Conmité Dramatique nos servîtent lé bouan souper qui nos avaient prepathé et, auprès, touos jouaingnidrent à chanter des bieaux cantiques dé Noué.

 

Ermêrciements

 

Lé Président, l'Sieur H. M. Gibaut, ermercyit l'Connêtablye pour nos aver prêté la salle, les membres du Conmité Dramatique pour aver arrangi eune si bouanne séthée et les danmes pour lé bouan souper.

 

L'Président annoncit qué l'dîner annuel éthait lieu vendrédi, l'17 dé janvyi tchi veint, à La Belle Etoile, mais qué reinque les siens qu'avaient payi lus souscription pour 1961 pourraient y v'nîn. Ch'est pourtchi payis la au pus vite si ou' n'lavez pon dêjà fait!

 

Un Bouan Noué à Tous!

 

1960