La preunmié partie d'eune séthie d'articl'yes entouor la Mexique par George d'La Forge
1st part of a series of articles about Mexico
En Mexique
San Antonio, Texas, U.S.A.
Lé 23 d'janvyi, 1971.
Moussieu l'Rédacteu,
J'veins d'passer eune tchînzaine dans un aut' monde - en Mexique. J'y avais 'té d'vant - en 1934, et comme dans touos les pays y'a ieu du changement d'pis chu temps-là. Y'a pus d'tîntamârre, pus d'monde, dé pus grand' villes, pus d'motos et pus d'empouaîsonnement d'l'air.
Ma preunmié visite fut parmi l's Astèques. I' d'meuthent dans la pus grande êtendue du pays, la partie tchi longe la rivièthe Rio Grande tchi lé s'pathe des Êtats-Unis d'Améthique au nord, et lé Guatémala au sud. Ciudad Mexico est la capitale. J'allînmes là (ma fille et s'n homme et lus fille et mé) par avion à rêaction. Dé là, un aut' dé ches avions-là nouos portit à Mérida et dé là à St. Miguel à Cozumel, touos les deux dans la péninsule dé Yucatan, lé pays des Mayas.
L's Aztèques, arrivés dans la vallée du Mexique en 1325, sont, nou peut dithe, les Mexitchains d'à ch't heu. Il' avaient eune magnifique civilization dévant l'arrivée et l'pillage dé lus pays par les Espangnos souos Cortès en 1520. Lé solé, tchi fait craître les récoltes, 'tait lus bouan dgieu, et i' bâtissaient des pyramides pour monter sus l'haut à seule fîn d'êt' pus près d'li. Quand les récoltes 'taient faillies il' êprouvaient à li faithe pliaîsi. I' m'ttaient un homme sus san dos sus eune carrée pièrre tch'il' appelaient la pièrre dé sacrifice, et i' lî copaient l'estonma ouvèrt et li'arrachaient l'tchœu vivant dé d'dans l'corps et l'portalent en procêssion amont la pyramide! Arrivés sus l'haut, il' ouffraient l'tchœu au solé.
Tout chennechîn, sans doute, sé faîsait atout un tas d'cérémonie et d'mûsique. Jé n'sai pon tch'est tch'i' faîsaient du tchœu auprés tch'il avait 'té présenté au solé car i' faut craithe qué l'solé né d'scendait pon l'ramâsser! La pyramide est supposée êt' d'eune pus grande êtendue qu'autcheune des pyramides en Êgypte. Y'a quand mème eune grande difféthence - l's Êgyptiens bâtissaient lus pyramides pour êt' en mème temps lé tombé et monument historique dé lus Pharaöns.
Aujourd'aniet, la cité Ciudad Mexico, capitale du pays, est, auve sa population d'sept millions, la siexième pus grand' ville du monde. La population d'l'entchi du pays est dans les 45 millions.
Ch'tait à Veracruz, un port (et ville) sus la côte dé l'êst dé la grande êtendue du pays, qué Maximilien, Archiduc d'Autriche, auve sa femme - la prîncess Belge Charlotte - d's'embèrtchit pour êt' Empéreur du Mexique. I' d'meuthidrent dans l'mangnifique Châté Chapultépec - dans la capitale - et l'gouvèrnément actuel a prêsèrvé l'châté et lus meubl'yes comme il' 'taient dans l'temps tch'i' l'otchupîdrent, et j'allis l'visiter en 1934. I' n'eut pon d'chance, lé pouorre Maximilien. Comme ou l'savez s'ou-s-avez liu l'histouaithe du pays, i' n'duthit pon longtemps sus san trône. Il' 'tait consciencieux et voulait gouvèrner bein et auve justice pour tous, mais les Mexitchains n'en voulaient rein. Un dgèrri et patriote tch'avait nom Juarez mènagit à organîser eune armée contre li et i' fut arrêté à Queretaro et fusilyi en 1867, Lé Rouai Napoléon Trais d'France tchi l'avait pèrsuadé d'aller en Mexique, li'avait promîns l'support dé l'armée Française, mais i' n'fit rein pour li sauver la vie.
La pouorre Charlotte s'en 'tait allée en Europe tâchi d'pèrsuader Napoléon d'env'yer tchitch'un à san s'cours. Oulle allit mème à Rome vaie l'Pape, mais i' n'y pouvait rein. J'ai liu dans tchique dêtou qu'oulle arrivit tard au palais du Vatican et qu'ou fut oblyigie d'y passer la niet et qué v'la tchi fut gardé ségret pour bein d's années qu'eune femme avait couochi dans la d'meuthe du Pape! Quand ou sut qu'Maximilien avait 'té tué, i' pathaît qu'oulle en pèrdit l'esprit. Ou s'èrfugyit dans un châté en Belgique et oulle 'tait acouo là en 1914 quand l's Allemands envahîdrent l'pays. I' la laissîdrent trantchile dans san châté et ou mouothit vielle en 1927.
Dé Veracruz nou travèrse lé Golfe dé Mexique pour aller au Yucatan, eune péninsule dé l'aut' côté du golfe, tch'est partie du Mexique. J'crouaisînmes lé golfe en avion et j'attèrrînmes à Mérida, eune ville dé deux chents mille habitants fondée par l'Espangno Don Francisco de Montego en 1542. Dé là, j'continnuînmes par avion jusqu'à l'Île de Cozumel tch'est dans la Mé Caraïbe à eune douzaine dé milles dé la côte dé l'êst du Yucatan. Oulle est pus grande qué Jèrri, ayant 23 milles dé long et huit mille dé laîze. Oulle est fanmeuse comme étant la pliaiche où'est l'Chrêtchienisme fut êtablyi en Mexique. Ch'tait là qué l'fanmeux Cortès mînt l'pid à tèrre dans la baie dé San Juan Cozumel lé 19 dé fèvri, 1519, pour quémenchi sa contchête du Mexique, et l'prêtre Catholique Romain tch'était auve li y célibrit la Sainte Cène. Un p'tit monument sus l'empliaichement èrcorde l'êvènement, et, en langue Espangnole, lé discours dé Cortès à ses soudards dévant entreprendre la contchête.
(À siéthe)
No comments:
Post a Comment