1969: Nièr et blianc

 George d'La Forge attempted to explain 1969 race relations in the US to his Jèrriais speaking readers:

Nièr et blianc

Ottawa, Ontario,

Cannada.

Lé 10 d'mai, 1969.

Moussieu l'Rédacteu,

La vie est pus paisibl'ye, ichîn au cannada, qu'ou n'l'est è Êtats-Unis. I' s'y en pâsse dé toutes les sortes ches jours, en Améthique. Auprès un procès tch'a duthé un coupl'te d'mais, un homme a 'té condamné à mort pouor l'assâsinnâtion du sénateu Robert Kennedy, mais ses avocats d'mandent drouait d'appel et i' s'sa probabliément tchiques années à faithe lé tou des Cours d'Appel jusqu'à La Cour Suprème. Et l'Sénateu a 'té abattu à coups d'pistolet dans un appartènement pliein d'monde et en plienne veue d'tous!

Un autre homme pliaidgit coupabl'ye dévant la cour de l'assâsinnâtion du pasteur nègre Martin Luther King et fut condamné a nénante-neuv' ans d'prison sus l'coup, mais eune fais en prison i' change d'idée et d'mande à la Cour d'annuler sa condamnâtion et d'li pèrmettre un nouvieau procès! Y'a-t-i' d'aut' pays au monde tchi pèrmettent d'ité?

Lé Congrès à Washington a, en fîn d'compte, passé des louais pour forchi l'monde et l'industrie à donner les mèmes privilèges et opporteunités ès nièrs et bliancs - un drouait garanti par la "Constitution" d's Êtats-Unis. Et pis l'Congrès a passé d'aut' louais pour mêler nièrs et bliancs dans l's êcoles et collèges. Chu procédé n'est pon populaithe auve les nièrs ni auve les blians car i' faut souvent env'yer les mousses des longues distances hors dé d'siez ieux pour y donner êffet, viyant qué l's êcoles des gens couleuthés sont dans lus contrées, et l's êcoles pour les bliancs sont dans d'aut' parties d'la ville ou village. Et dépis tch'i' faut transporter les mousses par beusse d'une contrée à l'autre pour les mêler, lé transport couôte pus ès municipalité!

Dans l's univèrsités, l'affaithe est dév'nue tragique. Les nièrs, en minorité, sans doute - la proportion couleuthés est douze pour cent d'la population entchiéthe dé l'améthique - d'mandent des privilèges spéciaux, et i' prannent possession d'iun des bâtisses des collèges et êprouvent à l'otchuper - souvent armés auve arme, couté et pistolet, jusqu'à qué l'douoyen d'l'univèrsité lus donne chein tch'i' veulent. quand la police s'en mêle, un cri de "La brutalité d'la police" d'veint l'èrfrain d'la chanson d'touos les nègres du vaîsinné, et la police n'ôse presque pon l's arrêter pour les présenter d'vant justice! Ch'est vrai tch'i' faut pûtôt bailli d'l'avaine qué du fouet, mais un aut' diton nouos dit qué l'chein tchi s'fait brébis, lé l'loup l'mange, et né v'là justément chein tch'i' s'arrive - i' tapent sus la police et ou' s'fait brébis d'crainte d'êt' atchusée d'donner trop d'fouet!

Ch'est bein seux qu'l'appétit veint en mangeant. I' n'sont pon contents d'lus progrès jusqu'à ch't heu - un progrès tchi l's a mins dans une tout-à-fait millieuthe position dans la vie sociale et officielle du pays tch'i' n'avaient y'a mème deux-s'trais ans - et né v'chîn lus dreine démande, rapportée en dêtail dans la gâzette "Detroit News" du 5 dé mai, 1969. Lé directeur dé "La Conférence pour lé dêv'loppement êconomique des Nègres" entrit dans l'églyise "Riverside Church" à New York duthant l'sèrvice Dînmanche matîn, et înterrompit les louanges en d'mandant qué l's églyises et les synagogues des Êtats-Unis lus paient chîn chent millions d'dollars souos prétexte qué dépis qué l's Allemands sont acouo à payi compensâtion au pays d'Israël pour aver assâsinné siez millions d'Juis duthant la dreine grand' dgèrre, l'Améthique dait payi les 500 millions d'dollars à la généthâtion néthe actuelle pour aver fait péthi chînquante millions d'nègres en escliavage.

Mais ch'n'est pon la tout: I' d'mandit qu'l'églyise lus donne eune proportion d'san r'vénu, eune partie d'ses offices - auve pèrmission d'faithe sèrvi l'téléphone, l'ûsage dé sa stâtion d'radio (WRVR) pour douze heuthes par jour dans la s'maine et tout l'jour lé sanm'di et l'dînmanche, à l'exception des heuthes dé tchulte, et qu'l'églyise faiche sèrvi s'n înfluence pour collecter les 500 millions d'dollars voulus! Et i' donnit jusqu'à neuv' heuthes dînmanche tchi veint ès autorités d'l'églyise pour atchiêsci à sa d'mande! Ch'est don d'main l'jour dé l' "ultimatum", et ché s'sa întérêssant d'vaie tch'est tch'i' s'arrivetha!

Sans doute, la dgèrre n'y aigue pon, à tout chu tripot-là. Les nièrs èrcliâment qué pus qu'lus proportion d'douze pour chent d'la populâtion est env'yée au camp d'batâle. Vrai ou pon, la chose èrmèrquabl'ye est qu'nièrs et bliancs s'accordent comme des clioches eune fais dans l'armée et la marinne! La tragédie en est qu'les gens veulent sîncéthement aîdgiau nièr vaîsîn à trouver sa pliaiche et faithe san c'mîn trantchilment à côté d'ieux, mais v'là tchi n'peut pon s'faithe d'un jour à l'autre, et i' n'a pon la pacienche d'attendre.

Y' tant d'tîntamarre et d'êmeutes par les c'mîns en Améthique ches jours qué ch'est assez pour faithe un exilé comme mé aborder un navithe et faithe vaile pour lé havre trantchil dé Jèrri!

George d'La Forge