George d'La Forge published 3 articles about the Russian troops in Jersey 1799-1800 in newspapers. The first article was in Les Chroniques de Jersey 6/3/1948. He returned to the subject in 1967 and in 1974, each time recycling and adapting the 1948 article for the Jersey Evening Post. The framing differs: in the 1948 article George as narrator explains the history to his fictional son, whereas in the later articles George as narrator is the grandson to whom the grandfather explains the history. This account was also republished in the 1976 book Histouaithes et Gens d'Jèrri. To complement the text of the 1948 article, here are the 1967 and 1974 articles now transcribed. One can note how George's style develops and the changes in spelling pre-Dictionnaire and post-Dictionnaire. There is also at least one noticeable grammatical variation: in the 1948 text George uses the -îtent 3rd person plural preterite ending; in the later articles he uses the typical Saint Ouënnais -îdrent ending.
Les Russes en Jèrri
"P'pée," Frankie m'dit l'aut' sé: "Un mousse m'a dit à l'êcole aniet qu'san p'pée l'y'a dit qué l's'armées Russes avaient otchupé Jèrri, - mais qu'y'a longtemps. Est-che vrai?"
"Eh bein, man garçon," j'li dis: "Ch'est vrai qu'à un moment donné, i'y'avait un tas d'soudards Russes en Jèrri, mais ch'n'tait pas eune armée d'otchupation, Maît' Fraînque Le Maistre tchi s'èrconnait hardi dans l'histouaithe de Jèrri, tait à m'en pâler un Jeudi au sé quand j'tions assis auprès du feu dans sa tchuîsinne quandis qu'sa bouannefemme tait à nouos faithe eune tasse de café."
"I' pathait qu'y'avait eune armé Anglo-Russe en Hollande en dgiex-sept chent nonante-neuf, et que l'gouvèrnément Angliais s'décidit d'les faithe èrvénîn passer l'hiver en Angliétèrre. Mais quand les grosses-têtes du gouvèrnément vîntent à y r'fliéchi, i' trouvîtent tchique louai qui n'lus permettait pas d'garder des soudards d'aut' pays en Angliétèrre, et i' fallut trouver tchique pliaiche pour les louogi."
"Comme l's'Angliais pensent tréjous à Jèrri comme eune bouanne pliaiche à d'meuther, i' pensîtent tout d'suite que ch'es'sait justement la pliaiche pour y met' les Russes à passer l'hiver, et comme i' n'y'éthait p't'êt' pas assez d'run pour les met' tous en Jèrri, i' fut décidé d'en env'yer en Dgèrnési étou."
"Mais iou qu'i' les mîntent à d'meuther, touos ches soudards-là, p'pée?" Frankie mé d'mandit. "Eh bein, man fis, i' faut penser que ch'n'tait pas aisi d'trouver assez d'maisons dans not' pétit Jèrri d'eune minnute à l'autre," j'lî dis: "Il' en mîntent dans l'Fort dé St. Aubin, dans l'châté d'Mont Ordgi à Gouoré, dans l'châté Lisabé, l'Probytéthe de St. Brelade et l'Manyi d'St. Ou. Mais n'y'avait pas acouo assez d'run pour tous, et i' fûtent oblyigis d'bâti. I' pathait que ch'tait dans chu temps-là qu'les bèrraicks d'la Grève-de-Lé fûtent bâties, et que ch'tait pour y met' des Russes. En attendant qu'y'ieusse assez d'run, les soudards restîtent à bord des navithes."
"Iou qu'étaient les navithes, p'pée?" Frankie mé d'mandit. "J'pense bein tch'i' taient dans la cauchie, eu en rade," j'lî rêponnis: "J'crai qu'y'avait dans les vîngt mille Russes ichîn entre dgiex-sept chent nonante-six et dgiex-huit chent deux, bieau qu'y'a ieu d'difféthents opinions quant au nombre. Certains êcrivains nouos disent qu'y'en avait siex mille, d'aut' nouos disent huit mille, - mais les Rôles de Régiment de chu temps-là, de tchi Mess Le Maistre en a eune copie, donnent le neunmétho comme étant vîngt mille. Dans autchun cas, ch'est seux qu'y'en avait eune racachie."
"Quand tu verras t'n'amîn à l'êcole demain, tu pouorras lî dithe de dithe à san p'pée que Jèrri n'a janmais té otchupé par les Russes. I' taient seulement louogis ichîn en attendant d'êt' r'env'yés siez ieux."
"I' pathait étout, qu'y'avait des Cosaques parmi les régiments Russes. Les Cosaques sont des soudards-à-j'va tchi sont èrnommés partout dans l'monde, et il' ont des supèrbes j'vaux. Quand i' lus laîssîtent en Jèrri, d'ches j'vaux-là, et j'ai ouï dithe que le j'va Jèrriais, - (i' n'y'en a pas acheteu, touos les j'vaux en Jèrri sont v'nus d'France ou d'Angliétèrre) - en n'tait d'scendu. J'n'crai pas qu'bein des piéches en Jèrri aujourd'aniet ont ouï ch'là!"
George d'la Forge
Les soudards Russes en Jèrri
San Antonio, Texas,
U.S.A.
Lé 21 d'janvyi, 1967
Moussieu l'Rédacteu,
"Papa," j'lî dis eune séthée auprès l'thée quand j'tions au pid du feu, "Té tch'as navidgi, as-tu janmais 'té en Russie?".
"Nannîn, man garçon," i' m'dit, "J'n'ai janmais ieu la chance d'êt' dans un navithe tch'allait d'chu côté-là. Quand j'navidgeais, ch'tait dans des navithes tch'allais à La Côte ou à Tèrreneuve la grand' partie du temps. Mais, tch'est tch'i' t'fait mé d'mander ch'la?"
"Eh bein, Papa," j'lî dis, "J'avons c'menchi à apprandre la géographie à l'êcole, et la maitrêsse nouos a apprîns les noms d'difféthents pays du monde à matîn, et La Russie en n'tait iun. Quand j'avons sorti d'l'êcole, un mousse m'a dit tch'il a un oncl'ye tch'a navidgi tch'i' dit à san p'pèe l'aut' jour qu'eune armée Russe avait otchupé Jèrri. Est-che vrai?"
"Eh bein, man garçon," Papa m'dit, "Ch'est assez r'mèrquabl'ye qu'tu mentionnes la Russie, car un moussieu tchi connaît hardi bein l'histouaithe d'un tas d'pays m'en pâlait l'aut' jour dans la forge quandis qué j'tais à féther les reues d'san hèrnais. 'Si j'tions en Russie,' i' m'dit, 'J'n'éthions pon bésouain d'aver d'reues sus quèrre ni hèrnais! I' pathaît tch'i' fait si fraid dans chu pays-là, tch'i' font sèrvi l'traîné à la pliaiche de la vouaituthe à reues viyant qué l'pays est couvèrt dé né et d'gliaichon tout l'hiver!' Quant à ch'la," m'dit Papa, "I' font sèrvi l'traîné étout à La Côte dans l'hiver. Mais pour èrvénîn ès Russes: Ch'est vrai qu'à un moment donné y'avait un tas d'soudards Russes en Jèrri, mais i' n'taient pon eune armée d'otchupation!"
"I' pathaît tch'i' y'avait eune armée y'avait eune armée Anglo-Russe en Hollande en 1799 et pout tchique raison qué jé n'connais pon, l'gouvèrnément d'Angliétèrre sé décidit d'faithe les soudards, les Russes aussi bein comme l's Angliais, èrvénîn passer l'hiver en Angliétèrre. Mais quand les grosses-têtes du gouvèrnément vîndrent à y r'fliéchit, i' dêcouvîdrent qué y'avait tchiquechose dans la louai tchi l's empêchait d'garder des soudards d'un aut' pays en Angliétèrre. I' fallait don trouver tchiqu'aut' pays conv'nabl'ye pour louogi les Russes!""
"Comme l's Angliais pensent tréjous à Jèrri quand il' ont bésouain d'tchiquechose houors du commun, ou eune bouanne pliaiche à d'meuther, ch'est naturel qué Jèrri lus vînt à l'idée comme étant justément la pliaiche pour y' mett' les soudards Russes à passer l'hiver. I' pensîdrent tout d'mème tch'i' n'y éthait p't êt' pon assez d'run dans l'Île pour les y mett' tous, ch'est en tchi i' fut décidé d'en env'yer en Dgèrnésy étout."
"Mais ioù les mettre à d'meuther, Papa?", j'lî d'mandis. "N'y a pon d'run dans les maîsons pour un tas d'soudards!"
"Eh bein," Papa m'dit, "L'gouvèrnément Angliais sé d'mandit la mème tchestchion étout! Ch'n'est pon aîsi d'trouver du run pour des soudards dans autcheun p'tit pays sénon dans des bèrrexes, et les nôtres 'taient otchupées par les rédgulièrs Angliais. Eh bein, il' en mîndrent dans l'Fort dé St. Aubîn, dans l'Vièr Châté Mont Orgueil à Gouôrray, dans l'Châté 'Lisabé en ville, dans l'probytaithe dé St. Brélade et mème dans l'Mangni d'St. Ouën. I' n'y'avait quand-mème pon assez d'run pour tous, et l's autorités fûdrent oblyigis d'bâti pour en faithe. I' pathaît qué ch'tait dans chu temps-là qu'les bèrrexes dé La Grève de Lé fûdrent bâties, et qu'les soudards Russes fûdrent les preunmièrs soudards à d'meuther d'dans!"
"En attendant tch'i' ieûsse assez d'run pour tous ichîn et là à tèrre, les soudards restîdrent à bord des navithes tchi l's avaient apportés ichîn."
"Où-est tchil' 'taient, Papa, les navithes?" j'lî d'mandis.
"J'pense bein tch'i' y'en avait d'amathés dans la cauchie, man garçon," i' m'dit, "Mais la cauchie n'était pon si grande dans chu temps là comme oulle est à ch't heu, et i' d'vait y'aver d'ches navithes-là tchi restaient en rade."
"I' pathaît tch'i' y'avait dans les vîngt mille Russes ichîn entre 1796 et 1802 en Jèrri, mais y'a d'difféthentes opinions au sujet du nombre. Cèrtains êcrivains nouos disent huit mille, mais i' pathaît qu'les rôles de régiments d'chu temps-là existent d'tchiquebord dans l'Île acouo aujourd'aniet et qué l'nombre est montré d'dans comme étant vîngt mille. Dans touos les cas, ch'est seux tch'i' y'en avait eune racachie!"
"Quand tu vèrras t'n'anmîn à l'êcole démain au matîn, tu pouorras lî dithe pour seux qué s'n oncl'ye s'trompe quand i' dit qu'Jèrri fut otchupé par l'armée Russe. Ches soudards-là fûdrent seulement louogis ichîn en attendant d'êt' r'env'yés siez ieux!"
"I' pathait étout, tch'i' y'avait des Cosaques parmi les régiments Russes. Les Cosaques sont des soudards-à-j'va tchi sont èrnommés partout l'monde, et il' ont des supèrbes j'vaux. Quand i' lus en r'allîdrent en Russie il' en laîssîdrent en Jèrri, d'ches j'vaux-à, et j'ai ouï dithe qué lé j'va Jèrriais - i' n'y en a pon à ch't heu, touos les j'vaux en Jèrri sont v'nus d'France ou d'Angliétèrre - en n'tait d'scendu. Jé n'crai pon qu'bein des pièches en Jèrri aujourd'aniet ont ouï ch'là!"
George d'La Forge
Les Russes en Jèrri
Le Ménage ès Feuvres,
St. Ouën.
Lé 20 d'juilet, 1974
Moussieu l'Rédacteu,
"Papa," j'lis dis eune séthée auprès l'thée quand j'tais mousse, "iun des garçons à l'êcole m'a dit à matîn qu'san p'pèe li'avait dit qu'eune armée Russe avait otchupé Jèrri, mais tch'i' y'avait bein longtemps. Est-ch' vrai?"
"Eh bein, man garçon," i' m'dit, "ch'est vrai qu'à un moment donné y'avait un tas d'soudards Russes en Jèrri, mais ché n'tait pon eune armée d'otchupâtion. En 1799 y'avait eune armée Anglo-Russe en Hollande et l'gouvèrnément Angliais s'décidit d'la faithe èrvénîn pâsser l'hiver en Angliétèrre. Mais quand les grôsses têtes du gouvèrnément dêcouvîdrent eune louai tchi l's empêchent dé garder des soudards d'aut' pays en Angliétèrre i' fallut trouver tchique pliaiche pour les louogi.""
"Comme l's Angliais pensent tréjous à Jèrri comme étant eune bouanne pliaiche à d'meuther, i' pensîdrent tout d'suite qué ch'tait justément la pliaiche pour les mettre à pâsser l'hiver. I' n'trouvîdrent pon assez d'run dans l'Île pour les mett' tous et il' en env'yîdrent en Dgèrnésy étout. I' pathaît tch'i' restîdrent en Jèrri jusqu'au mais d'juîn d'l'année 1800."
"Mais où'est tch'i' les mîndrent à d'meuther, touos ches soudards-là?", jé d'mandis à Papa.
"Eh bein," i' m'dit, "i' faut penser qué ché n'tait pon aîsi à trouver assez d'maisons en Jèrri tch'avaient du run pour des soudards d'eune minnute à l'autre. Il' en mîndrent dans l'Fort dé St. Aubîn et dans l'Châté Êlizabé en ville. Et pis dans l'Vièr Châté à Gouôrray, dans l'Probytaithe dé St. Brélade et dans l'Mangni d'St. Ouën. Mais i' n'y'avait pon 'couo assez d'run dans ches pliaiches-là pour les louogi tous, et i' fûdrent oblyigis d'bâti, et ch'tait dans chu temps-là qu'les bèrrexes dé la Grève de Lé fûdrent bâties. Ch'tait pour y mett' les soudards Russes. Mais nou n'peut pon bâti des bèrrexes dans chîn minnutes, et en attendant tch'i' fûssent prêtes à les r'chéver, les soudards restîdrent à bord des navithes."
"Où'est tch'étaient les navithes?" jé d'mandis à Papa.
"Ch'est seux tch'i' y'en avait dans la cauchie en ville," i' m'dit, "mais y'en avait probabliément pus d'eune cauchie. P't-êt' à St. Aubîn et à Gouôrray, ou même à La Grève dé Lé. I' fallait sans doute aver les navithes d'amain à tèrre pour les fourni d'provisions. J'ai ouï tch'i' y'avait dans les vîngt mille Russes ichîn entre 1799 et 1800,mais i' y'a ieu d'difféthentes opinnions quant au nombre. Cèrtains êcrivains nouos disent qué ch'tait siex mille, d'aut' disent huit mille, mais les rôles du régiment du temps donnent lé nombre comme étant vîngt mille. Dans touos les cas, ch'est seux tch'i' y'en avait eune racachie."
"I' pathait tch'i' y'avait des Cosaques parmi les régiments Russes. Les Cosaques sont des soudards à j'va tchi sont r'nommés comme c'valièrs dé preumiéthe ordre, et il' ont des supèrbes j'vaux. J'ai ouï dithe qué quand i' tchittîdrent Jèrri pour lus en r'aller en Russie, il en laîssîdrent dans l'Île et qu'lé vraie j'va Jèrriais en n'tait d'scendu. Mais i' n'y'en a pus d'chutte race là en Jèrri à ch't heu. Les j'vaux d'à ch't heu sont v'nus d'France ou d'Angliétèrre. Quand tu vèrras t'n'anmîn à l'êcole démain, tu pouôrras lî dithe dé dithe à san p'pèe qu'Jèrri n'a janmais té otchupé par les Russes, et tch'il' taient seulement louogis dans l'Île en attendant d'êt' r'env'yés en Russie."
"Pouortchi qu'les soudards Russes et Angliais 'taient ensemblye en Hollande?", jé d'mandis à Papa.
"Eh bein," i' m'dit, "jé n'pouorrais pon t'en dithe en bouan français, man garçon. J'ai 'té trop embarrassé à gangni nouot' vie dépis m'n âge d'onze ans pour aver ieu l'temps d'êtudier for d'histouaithe des pays. Mais lé Tsar Paul preunmyi d'la Russie duthant l's année 1796 à 1801 s'associa auve l'Angliétèrre at aut' pays contre Napoléon, tch'était en train d'êprouver à faithe la contchête dé toute l'Europe. À m'n idée, dépis qué ch'tait en 1799 qué les soudards Angliais et Russes 'taient alliés et en Hollande, i' s'pouôrrait qu'v'la tch'avait tchiquechose à faithe entouorre ls d'fense dé la Hollande contre lé dangi d'învâsion par les armées d'Napoléon. Mais jé n'sis pon un expert sus l'întèrprétâtion d'l'histouaithe dé chu temps-là et ch'n'est qu'eune idée tchi m'veint à l'esprit. Ch'est seux qu't'en vas apprendre tout chenna à l'êcole pus tard."
"Moussieu L'Brun t'dit l'aut' jour dans la forge qué san p'pèe avait veu les Russes à l'exèrcice à l'arsénal dé St. Martîn. V'la tchi veurt-i' dithe tch'il en est r'vénue en Jèrri?", jé d'mandis à Papa.
"Nannin," i' m'dit, "Ch'est un mênom tchi fut donné au Régiment d'La Milice Rouoyale dé St. Martîn et d'La Trinneté. Y'a eune volée d'chenna, et jé n'sai pon pourtchi. P't-êt' qué lus uniforme dé chu temps-là èrsembliait à l'habit d'soudard des Russes. Tch'est tchi sait?"
George d'La Forge
No comments:
Post a Comment