Choses et autres...
Le Ménage ès Feuvres,
St. Ouën.
Lé 10 d'juilet, 1971
Moussieu l'Rédacteu,
J'viyais dans la gâzette l'aut' sé qué cèrtains St. Aubinnais n'sont pon seux qu'ch'est eune bouanne chose dé continnuer lus fête annuelle. Iun disait qu'ouaithe qu'oulle 'tait à sa porte i' n'y pranait autcheun întéthêt, et un autre sé d'mandait si l'marchi en valait la chandelle, car lé profit n'était pon assez d'rêcompense pour les travaux d'prépathâtion et d'organisâtion. Et pis y'a tréjous l'problème du stationnement des motos tchi s'atchumulent là pour l'occâsion.
Quant à mé, né d'meuthant pon dans l's envithons et étant arrivé à l'âge d'aimer mus rester siez mé au sé qu'd'aller m'faufiller dans tout chu tîntamarre-là, j'n'ai autcheune idée d'la valeu d'la fête point d'veue municipal. J'ôse penser qu'oulle a p't êt' raison d'être, sustout comme distraction pour les touristes, et qu'oulle est un bénéfice pour l'Île dé chu point d'veue-là. J'y allis eune séthée, ma fîngre, y'a deux-s'trais ans, viyant qu'j'avais iun d'mes fréthes d'Améthique tchi voulait la vaie, et j'm'abûsis à r'garder les sou atchumuler dans la pouchette d'un îndividu tch'avait l'jeu dé "Crown and Anchor" en allant. Les cheins tch'ont 'té soudards connaîssent bein chu jeu-là. I' n'y a qu'un gangnant en fîn d'compte, et ch'n'est pon l'chein tch'y met ses sou - ch'est l'chein à tchi qu'la "Crown and Anchor Board" appartcheint et tch'organise lé jeu. Nou-s-y jouait souvent quand j'tais soudard à la dgèrre dé 1914-18. Dans chu temps-là nou n'sé gênait pon trop d'pèrdre deux-s'trais cappeurs, car nou vivait au jour lé jour - la mort nouos suivait d'si près!
Eune chose qué j'trouve alarmante en liêsant la gâzette est l'nombre dé motoristes présentés d'vant Justice pour aver cachi souos l'înfluence dé drogues ou d'la bouaisson. L's amendes èrprésentent des p'tites forteunes compathées au temps qué j'tais Commis Vicomte et l'Commis Dénonciateur n'étaient pon salariés. Il' avaient drouait à eune commission dé chînq ou dgix pour chent (jé n'm'èrsouveins pom si ch'tait chînq ou dgix - né v'là eune preuve qué jé c'menche à pèrdre la mémouaithe!) d's amendes împôsées par lé Juge Vaudin quand ch'tait nouot' sémaine à siégi. Nou siégeait chatchun eune démaine à la fais, tou à tou. J'vouos asseûthe qué nou n'y vivait pon gras, sus chutte commission-là, car lé Juge né pouvait pon condâmner pèrsonne à pus qu'dgiex louis d'amende dans chu temps-là. Si l'condâmné en méthitait pus, i' fallait l'env'yer d'vant La Cour Rouoyale. À ch't heu, l's amendes sont formidabl'yes: i' m'sembl'ye d'en aver veu ieune dé chînquante louis!
Et pis l'docteu pathaît y faithe bein étout. J'vai qué l'condâmné a à payi tchiquechose comme onze louis et chînquante pennîns pour les frais du docteu. J'pense bein qu'ch'est pour l'analŷse dg'ieau gâtée. Ch'est couôteux! Enfîn, la pèrsonne tchi cache souos l'înfluence dé la bouaisson méthité la peunnition. En Améthique, nou vait d's affiches lé long des grand' routes tchi dîsent: "S'ou b'vez, n'cachiz pon et s'ou cachiz, né b'vez pon!" I' dév'thait y'en aver d'même en Jèrri étout, mais ch'est probabliément eune affice tchi né s'sait pon populaithe siez l's aubèrgistes!
J'vai dans des temps qué l'Juge donne pèrmission ès condâmnés d'payi lus amendes au taux dé tant par sémaine, et tchiquesfais il' ont jusqu'à eune cèrtaine date à payi l'entchi. J'pense bein qu'ch'est viyant qué l's amendes sont si hautes qué l'chein tch'a à payi n'a pon souvent un montant si considéthabl'ye d'amain. Mais l's autorités finnissent-i' par èrchéver toutes ches amendes-là? Tch'est tch'empêche un îndividu, par exempl'ye, dé dêcamper et d's'en aller hors Jèrri d'vant aver finni d'payi? Dans l'temps du Juge Vaudin i' fallait payi sus l'coup ou aller en prison, mais j'pense bein tch'i' n'y a pon assez d'run dans la prison pour faithe dé mème à ch't heu!
Ch'est r'mèrquabl'ye tch'i' n'y a pon pus d'visiteurs tchi s'droquent avaû nouos falaises. Y'en a ieu deux chutte sémaine, et eune danme sé drotchit à Gros Nez ieune des aut' sémaines. J'espéthe tch'i' s'en vont tous lus r'faithe. I' sont dangéreuses, nouos falaises, et j'ai eune fichue peux d'en appréchi mé-mème. J'né f'thait janmais un falaisyi! Quand lé c'mîn l'long des falaises entre Gros Nez et Pliémont fut fait y'a tchiques années, y'en avait tchi voulaient pèrmission d'y aller à j'va. Jé n'peux pon m'înmaginner comment qu'autchun c'valyi voudrait aller dans ches p'tits c'mîns-là lé long des falaises. Si lé j'va éthait soudainement peux d'tchiquechose et faisait un var du mauvais côté, ou pranait l'mors ès dents, nou frémit d'penser tch'est tch'i' pouorrait s'arriver. Viy'ous j'va et c'valyi au galop en direction du haut d'la falaise? Ch'est assez pour vouos faithe rêver la rouoge trie seulement d'y penser!
No comments:
Post a Comment