Ch'est grand pitchi qu'George fit sèrvi l'mot "sauvages" dé même...
Use of the word "sauvages" is regrettable in this George d'La Forge article
Buffalo Bill
(Conclûsion)
Chi-Chen Itza, Yucatan,
Mexico,
Lé 16 janvyi, 1971
Moussieu l'Rédacteu,
L'aîgue du janne Cody fut d'grand' valeu à l'armée. Deux ans pus tard les sauvages ne donnaient pon assez d'embarras dans chutte partie-là du pays pour continnuer la batâle contre ieux, et, en 1863, i' s'engagit soudard dans les rédgulièrs - lé Septième Régiment d'Caval'lie du Kansas. La Dgèrre Civile entre les Êtats, dêjà dêcliathée en 1861 (ou duthit jusqu'en 1865), en grand' partie viyant que l'Président Abraham Lincoln voulait aboli l'escliavage, engaûmait dé pus en pus les jannes hommes d'un côté comme de l'autre. L'Êtat d'Kansas 'tait du côté fidèle au gouvèrnément d'Lincoln, et contre les Êtats du Sud, et l'janne Cody, consèrvateur commes ses anchêtres, s'alîngnit auve les troupes du côté du Président. I' restit soudard jusqu'a la fîn d'la dgèrre et eut la chance dé s'en dêhaler sain et sauf.
La trantchilité des sauvages n'était janmais d'longue duthée, et y'avait des contrées tch'il' êprouvaient a d'fendre contre l'avanch'ment d'la civilisâtion tchi dêtruisait lus souche dé viande et d'nouôrrituthe - le buffl'ye. Lé Kansas Pacific Railway voulait continnuer san c'mîn-d'fé l'travèrs dé ieune dé ches contrées-là, et en 1867 William Frederick Cody, libethé d'l'armée, fut engagi par chutte compangnie-là pouor fourni d'la viande dé bufl'ye à ses empliyés duthant l'temps voulu pouor compliéter la lîngne-de-fé. Il est cèrtain qué Cody avait entréprîns eune tâche formidabl'ye, mais sa connaissance du pays et eune longue expérience dé lutte contre les sauvages lî vînt en aîgue. I' fut si au-fait à sa tâche qué san fournissage dé viande né rmantchit janmais. Ch'tait dans chu temps-là qué l'mênom d' "Buffalo Bill " lî fut donné - un mênom tchí l'suivit a sa tombe!
En 1868, sa tâche finnie auve lé Kansas Pacific Railway, i' s'engagit soudard eune deuxième fais pouor aîdgi à battre les tribus sauvages Sioux et Cheyennes et restit soudard jusqu'en 1872. Libéthé d'l'armée acouo eune fais, i' s'întérêssit dans la politique et fut êlu a la Chambre des R'présentants d'L'Assembliée Législative dé l'Êtat dé Nebraska. Appathemment, i' n'tait pon à s'n aise parmi les politiciens - i' dîsait tch'i' font un tas d'bargouaîchîn sans dithe grand' chose de valeu la maîntchi du temps!
En 1876 i' s'engagit soudard acouo eune fais - chutte fais dans l'Chînquième Régiment d'Caval'lie des Êtats-Unis, en dgèrre contre ses vièrs enn'mîns, les sauvages Sioux et Cheyennes. Il avait dêjà gangni eune fanmeuse èrnomée à s'battre contre ieux, mais à la batâle dé Indian Creek i' couronnit sa r'nommée En "combat-singulier" i' tuit lé Chef Main Jaune dé la tribu des Cheyennes! Ch'est bein seux qu'Main Jaune avait longtemps voulu lé "scalpe" dé Cody pouor en faithe eune trophée d'dgèrre, et tch'i' l'éthait "scalpé" s'il avait ieu la chance dé l'assommer atout san casse-tête. I' dgettit probabliément pouor li à l'arrivée d'la caval'lie sus l'camp d'batâle pouor sé battre auve li à san tout-seu. Malheutheusement pouor li, Main Jaune n'avait pon ouï pâler des Jèrriais ni dé Dgillieaume lé Contchéthant et n'savait sans doute pon tch'il avait affaithe à un dgèrryi d'chutte race-la! Quand deux braves comme "Buffalo Bill" et Main jaune lus rencontraient en "combat-singulier" ch'tait au pus fort la pouque et l'trépas pouor iun des deux!
Lé Sieur Cody 'tait un homme dé talent souos bein des rapports. En 1883 il êtablyit un espèce dé cirque tchi d'vînt fanmeux en Europe, comme en Améthique, souos l'nom dé "Wild West Show". Mais sa carriéthe dé soudard, dgide et "scout" contre les sauvages dé san pays natal n'était pon acouo finnie. J'lé r'trouvons dans la Milice dé Nebraska à s'quétilyi contre la tribu des Sioux en 1890 et 1891. Chutte longue carriéthe dans la caval'lie, ouaithe qu'înterrompue bein des fais, li'avait apporté l'grade dé Coronel quand la paix entre les sauvages et l's Êtats-Unis fut en fîn d'compte dêcliathée, mais ch'est acouo souos san mênom dé "Buffalo Bill" tch'il est l'mus connu en Améthique aujourd'aniet.
I' mouothit à Denver, dans l'Colorado, en mil neu' chent dgiex-sept, et fut mîns dans eune sépultuthe creûsée dans l'rotchi d'la montangne Lookout tch'est partie d'la rangie d'montangnes appelée Front Range, pas bein liain d'Denver. Touos les viageurs et touristes tchi vont là l'tou s'arrêtent à vaie san tombé.
La ville dé Cody dans l'Êtat d'Wyoming est nommée a s'n honneu, et les d'scendants dé Philippe et d'Martha L'Escaudé dé Beverly, Massachusetts, ont organisé eune association d'fanmile appelée "The Cody Family Association", pouor prêsèrver les r'cords, r'liques, identités et l'histouaithe dé la fanmile.
Lé couothage, l'întelligence et l'esprít aventuthi d'nouos anchêtres fûdrent don bein èrprésentés dans la pèrsonne du brave défunt Coronel William Frederick L'Escaudé. I' fit honneu à sa fanmile, à sa race, au p'tit pays d'ses anchêtres et à san pays natal. À nous d'faithe honneu à sa mémouaithe!
No comments:
Post a Comment