Buffalo Bill
Merida, Yucatan,
Mexico.
Lé 9 janvyi, 1971.
J'mé sis souvent d'mandé combein tch'i' y'a d'Jèrriais tchí savent qué l'fanmeux "Buffalo Bill" Cody 'tait en réalité un L'Escaudé, d'scendant dé Philippe L'Escaudé, né à St. Pièrre, en Jèrri, d'eune fanmíle St. Ouënnaise, lé 23 d'août, 1668, tchi s'en allit à la Nouvelle Angliétèrre dans sa jannèche et tch'était êtabl'yí à Beverly, dans L'Êtat dé Massachusetts, en mil siex chent nénante-huit. Ph'lippe né fut pon l'seul dé sa fanmile à s'en aller en Améthique. San fréthe Jean (1678-1742) mentionne dans san journal qué ses fis Jean et Philippe viageaient à la Nouvelle Anglietèrre, et il est probabl'ye tch'i' visitaient lus oncl'ye Ph'lippe là-bas.
Les L'Escaudés 'taient des gens d'bein et d'êducation. Lé mème Jean tch'êcrivit un journal 'tait Lecteur et Maître d'Êcole à St. Ouën en 1715. I' remplyit les mèmes fonctions dans les pâraisses dé St. Hélyi et d'St. Pièrre, et avait 'té chouaîsi pouor êt' Lecteur et Maître d'Êcole à St. Brélade étout, mais sa pâraisse natale étant St. Ouën il avait voulu y rester - et san fis Samuel lé rempliaichit comme Lecteur à St. Ouën quand i' passit l'pas.
La fanmile avait vêtchu dans les pâraisses de l'Ouest pouor trais chents ans ou pus. Philippe, né à St. Pièrre en 1668, 'tait fis Philippe, fis Abraham, fis Nicollas, fis Jean, fis Raulîn, fis Guillaume. Guillaume est mentionné en mil chînq chent quarante-huit dans les Rôles des Assises d'Héritage. Raulîn 'tait "Acquisiteur" d'héthitages à St. Brélade en 1572. Jean fut probabliément né à St. Brelade, car ses fréthes Raulîn et Hélier 'taient propriêtaithes dans chutte pâraisse-là. Il est tout probabl'ye qué Nicollas 'tait d'St. Brélade étout - mais l'péthe et l'grand-péthe dé Philippe 'taient d'St. Ouën, ioù qu'la fanmile s'était en fîn d'compte êtablyie et y restit généralement jusqu'au mains mil huit chent souoxante. Lé fait qué Philippe li-mème fut né à St. Pièrre n'est pon drôle - sa sœu Sara et san frethe Jean mathyîdrent des St. Pièrrais, et il est tout probabl'ye qu'y'avait d's anmîns et d'la pathenté dans chutte pâaraisse vaîsinne.
Êtablyi a Beverly, Massachusetts, en 1698 ou d'vant, Philippe sé mathyit tout problabliément là-bas, car lé mathiage n'est pon mentionné dans les r'gistres en Jèrri. Malheutheusement, lé nom d'fanmile dé sa femme n'est pon mentionné dans les r'gistres en Améthique, et tout ch'tch'est connu à s'n êgard est qu'san nom d'fille 'tait Martha. Lé nom L'Escaudé est enregistré à Massachusetts comme "Le Cody", étant évidemment êcrit phonétiquement par des scribes tchi n"savaient qu'l'angliais. En fîn d'compte lé "Le" dispathut et l'nom fut r'cordé tout simpliément "Cody".
William Frederick Cody, pus tard Coronel, fut né dans lé Comté de Scott, dans l'Êtat d'Iowa, lé 26 d'févri, 1846. Il 'tait d'la chînquième généthâtion née en Améthique, étant fis Isaac (1811-1857), fis Philip (1770-1850), fis Philip (1729-1808), fis Joseph (1700-1756), tch'était l'fis d'Philippe L'Escaudé, né à St. Pièrre (dé fanmile St. Ouënnaise), en Jèrri, en 1668. Ch'ti-chîn 'tait don lé grand-grand-grand-grand-péthe dé "Buffalo Bill".
I' faut penser qué William Frederick Cody fut êl'vé comme fèrmyi, et tch'il 'tait à j'va tout janne. En 1860, quand i' n'avait qu'quatorze ans, lé sèrvice des postes 'tait à peine êtablyi, et eune compangnie fut organisée souos 1'nom de "Pony Express" pouor asseûther la portéthie d'lettres à j'va entre St. Joseph, Missouri, et Sacramento, en Califournie, eune distance dé mille neu chents chînquante milles, et i' fut chouaîsi pour êt' iun des porteux d'lettres. Des bureaux d'postes et d's êtabl'yes à j'va fûdrent êtablyis à châque distance dé septante-chînq milles sus toute la distance de 1,950 milles, et l'porteux d'lettres faîthait ses 75 milles à j'va par jour, et un êchange dé c'valyi et dé j'va s'faîthait à chaque "poste". À cause du mauvais tèrrain, idéal pour l'embuscade à bein des bords, et dé l'enn'mité des sauvages ("Peaux Rouges"), lé trajet et ch't'otchupâtion-là 'taient d'un dangi încompréhensibl'ye d'nouos jours, mais l'janne Cody survêtchut l'dangi et s'fit eune èrnommée comme c'valyi et batilleux d'sauvages tchi gangnit l'respect d'ses compatriotes et des sauvages étout!
Sa carriéthe de porteux d'lettres né duthit qu'un an, viyant qu'en 1861 la télégraphie fit s'n appathence dans chutte contrée-la, organisée par la compangnie "Pacific Telegraph Company", et lé Pony Express fut abandonné. Les sauvages 'taient a donner tant d'embarras qu'l'Armée fut appelée à s'en mêler, et ouaithe que Cody n'eûsse qué tchînze ans à ch't'êpoque-la il 'tait dêjà connu comme c'valyi întrépide, et il avait eune si bouanne connaissance du pays que l'Armée des Êtats-Unis l'engagit comme dgide et "scout" dans sa dgèrre contre les sauvages.
(À siéthe)
No comments:
Post a Comment