Picasso

J'avais siêx ans quand Picasso mouothit

J'avais siêx ans quand Picasso mouothit:
j'tais siez ma grande-méthe - ch'fut sus les gâzettes.
Jé scriblyis, griffouoillis, mèrtchis, douothis
atout d's ièrs d'travèrs et d'la chai d'chitchettes.

Des pièches à gofiches, des faches en piéchot,
l'apothéose dé picots sus l'papi:
j'avais siêx ans à la mort d'Picasso -
la mémouaithe d'eune bouoche ichîn... là, un yi.

Avaû les pages fliottent eune tête dé touauthé,
des cônes en lampions, un r'gard dé bueûl'lie:
nou-s'êchitchèle lé ciel en blianc et né.
J'avais siêx ans quand Picasso mouothit.

À la Gal'lie Nâtionnale dé Portraits, Londres: à l'exhibition d'portraits d'Picasso, 20/12/2016