Les Saûciches
J'n'aime dgéthe les pânnais, nitout les radiches,
pouor stoffer s'lon man goût eune bouonne sannouiche;
et pouor du cresson, ch'est des mèrlifiches!
Nou-fait, j'aime mus eune câssetrolée d'saûciches,
toutes caudes et ensatchies dans lus breunes p'liches,
bein habilyies dans lus câsaques clioutiches.
Épis d'eune boutilyie dé sauce, j'êclyiche
eune êtrueûlée d'ssus. Bailliz-m'en eune dgich-
-onnée, eune assiettée, ou raîque tchiques miches,
et j'mange coumme un haut jutchi, coumme un riche.
Nou-s'en graie des bouonnes en Polongne, Autriche,
Allemangne et France. Et j'ai dans ma cabiche
qu'nou peut les graie atout d'la viande dé biche
(lé lard vaut mus, autant qu'i' faut qu'j'lé diche).
Si j'tais en Nouvieau Jèrri, ou en Mich-
-igan, en Vréginne ou Vèrmont, j'm'en fich'-
-chais d'bourgailles, d'bagels, dé tacos, dé knish...
mais des cauds tchians vont bein dans ma câniche.
J'aime-t-i' mus les cârottes ou les suidiches?
N'y'a pon d'miyeu fricot qu'lé monde dênichent:
ch'est qu'aniet j'm'en vais mangi des saûciches!
No comments:
Post a Comment