Nicholas Bott (1797 - 1870)

Nicholas Bott fut né aniet en 1797.

Nicholas Bott was born on this day in 1797.

Born in Alderney, he wrote some of the few surviving poems in Auregnais, his native tongue. However, he lived for many years in Jersey and also wrote in Jèrriais (and also Guernésiais). Here's an example of one of his Jèrriais pieces:

Le Renfrouangniy

Un jour Jupiter sus not terre
Jetti un regard scrutateur
Vit un couochon dans une orniere
Et fut frappait de sa laideur
Qu-est donc q-chest que chut bete immonde
Qu-est à s'vouotrer dans chu bourbi
Ah Sire Jupin ben à not honte
Certain mortel li réspondit
Chest un couochon qui tréjous gronne
Et qui ne fait d'bein à personne
Hon-hon - Hon-hon, grond le couochon

Hé! dit Jupin j'en f'rai un homme
Pour vée comment qui s'comport-ra
Mais qui garde sa vilaine troinne
Et qui pus est tréjous grondra
En outre qui garde ses p'tits yers
Souos de gros sourcilles ben muchis
En le r'tirant hors des aviers
Je veur en faire un renfrouangniy
Qui sait couochon qui tréjous gronne
Et qui' n'faiche de bein à personne
Hon-hon Hon-hon, grondra l'couochon

Ainchin v'la donc le renfrouangniy
Qu-est lanchi sus not motte de terre
Nul-part n'on le trouve qu-en Jerri
Et combein qui cause de misère
Car faites li tout l'bein qu-ou pouvais
Vous n'en r'chev-rais que d'la houannie
Ainchin y faut qu-vous patientais
Puis-que tait y s'ra toute sa vie
Y s'ra couochon qui tréjous gronne
Et qui-n f'ra de bein à personne
Hon-hon, Hon-hon grondra l'couochon

Vous r'connaitrais le renfrouangniy
Car il est bouru comme un ourse
Il à un mauvais r'gard dans lliy
Va comme si l'diantre était à sa trousse
La tète baissie tréjous cappait
Y'n peut pon vos r'garder en fàche
D'une humeur neire tréjous boudait
Ne fait rein de bouan que n'ou sàche
Car ch'est l'couochon qui tréjous gronne
Et qui'n fait de bein à personne
Hon-hon-Hon-hon, l'vilain couochon

Quand vous trouvais un renfrouangniy
R'gardais ben à chen que vous dites
Car y n'erra que du plaisi
A vos réspondre par des piques
Si vous li d'mandais une question
Au-liy de réspondre comme un homme
Y réspondra par un Hon-hon
Vos touan-na l'dos et grondra comme
Un vrai couochon qui tréjous gronne
Et qui ne fait d'bein à personne
Hon-hon, Hon-hon, vilain couochon

Comme le couochon le renfrouangniy
Ne f'ra du bein qu-aprés sa mort
Y faut ésperer pour Jerry
Que sa race ne s'etend pon fort
Car avec de l'éducation
Touoilliys avec gens comme y faut
Ils apprendronts de la raison
Et s'corigeronts de lus defauts
Qu-aulieu d'couochon qui tréjous gronne
Pour faire du bein à quic personne
La raison les f'ra dev-nîn bons