In Summer 1914 the Bailiff of Jersey had set out on a long-planned tour of the Far East but, only having got as far as passing through the Suez Canal, was recalled to Jersey on the outbreak of the First World War. He had a difficult and eventful journey to return to the Island. GW de Carteret used the Bailiff's safe return as a pretext for some lighthearted comment:
I' n'est pas probablye que Moussieu l'Bailli perde jamais une minute de san temps à liéthe le gnollin qui pathait toutes les s'maines dans chute colonne ichin, et faut pas s'en êtonner nittou avec tout l'travas qu'il a à faithe.
Mais enfin, qu'i' m'liaise ou pas, le pouore Caouain considéthe qu'i' manquethait à san d'vé si ch'est qu'i' n's'empressait pas, au nom des lecteurs de chute gâzette ichin, de lis souhaiter la beinv'nue et de lis faithe part du pliasi que je ressentons de le r'vaie sain et sauf parmi nous. Cheux d'entre vous qui liéthont le récit de ses aventuthes réalis'sont p't-être combein qu'il en a rêcappé près et qu'i' n's'en est pas fallu un rain qui n'fusse prins comme prisonnyi de djerre par les Allemands. Et v'là justement chein que j'craignais tout l'temps, mé.
* * *
Ou z-allez oquo me traiter d'imbécile quand j'vos dithai que ch'est justement l'absence du Bailli qu'a hâté la djerre, mais criyiz-lé s'ou voulez, il est donné au bête dé Caouain de connaître des choses qui sont au-d'sus d'la portée du public en général, et v'là longtemps que je savais, mé, que j'allions aver la djerre.
Si Moussieu voulait s'en aller hors pays pour un holiday, pas un mot de ses plians n'éthait deu pathaître sus les gâzettes.
Les puissances européennes ont tréjous lyi sus nous et i' font lus plians à l'accordant. Earl Kitchener et mé, j'avons tréjous 'tai d'accord sus chu point-là, qu'i' fallait souos toutes circonstances garder le secret le pus absolu. I m'en veur li acheteu, car i' crait que j'aithais deu empêchi tout chenna de pathaître sus les gâzettes, mais dame, je fis d'man mus, par exemplye!
Dès que j'su qu'il avait idée d'sorti Jèrri je m'en fu à toute vitesse ès bureaux des difféthents papiers pour lus d'fendre d'en dithe un mot, mais j'tais trop tard, les machines étaient dêja en allant, et l'même jour la nouvelle était publiée.
J'savais bein tch'est qui s'en allait s'arriver, mé.
Le Comte von Ludwig Zagornstein, que je djettais d'pis longtemps, était ichin à exercer le mêtchi de chiquetchi, rôdant la campagne avec un p'tit hernais à faithe la mîne d'accater des piaux d'lapin et du vier fé, mais je l'connaîssais, mé, pour iun des pus fins espions de l'ennemin. Eh bein, dès l'même jour il êcrivit à san gouvernement que l'Irlande était sus l'point d'un djerre civile, le Parlement Angliais était en dispute, le Bailli d'Jêrri s'en allait d'ans l's Indes, et la Seagull était toute dêmantelée dans la vieille cauchie. sa lette finissait comme chennechin: "S'ou voulez frapper, ch'est acheteu l'moment."
* * * *
I' s'sait tout-à-fait superflus de vos rêcapituler touos l's êvênements qui lus sont arrivés à la suite de chut-information-là, mais une chose qu'avait pour nous une sinistre signification était le fait que deux navithes de djerre allemands furent immediatement expédjés à a Mediterranée avec mission d'intercepter touos les navithes venant de la direction des Indes et faithe des prisonniers de lus passagiers.
Il est bein évident que l'Allemagne, en donnant de patheilles instructions, avait idée de nos enlever not' Bailli, et nou n'peut sinon féliciter que toutes lus machinations ont 'tai frustrées.
Mais man péthe béni! Tchil êcappée.
Je n'sis pas trop envieux d'ma sorte, mais comme souvenir de l'occasion, je s'sais bein ordgilleux d'entrer en possession du p'tit siex-sous qu'a survêtchu touos les périls du viage, car je compte que ch'est acheteu une pièche historique qui pathaitrait assez bein pendue attouo du co de l'illustre Caouain.
J'ose m'imaginer que iun des siens qu'étaient les pus contents du retour de not'e Chef Magistrat, était notre honorable Lieut-Bailli, le Juge Aubin, qui, i' faut dithe en passant, s'est atchitté de sa responsablye tâche d'une maniéthe à exciter l'admithation de toute la populace jêrriaise, et mé, Caouain, je veur li-en offri mes pus sincethes complîments. Mais je sis seux que par moments la tête d'vait lis touanner. Fallait à touos moments convotchi les membres ses Etats pour affaithes urgentes. Par touos les batcheaux il arrivait des proclamations. Ichin en Jêrri, i' plieuvait des pétitions de touos les côtés.
Les gardiniers voulaient saver pourtchi qu'i' n'pouvaient pas envier lus pommes et lus verjus en Angliéterre. D'un autre côté, certains fermiers avaient dans lus êtablyes des bêtes de valeur qu'étaient vendues pour l'Amethique et les Etats avaient décidé qu'i fallait les garder ichin pour, en cas d'besoin, en faithe des stêques et des sausiches.
Le Connaîtable et l'recteur de St. Vauseur, ieux, n'aimaient pas la réflexion que tchique jour i' pouorraient lus trouver l'hôtel de St. Brelade à participer dans la dévoration de iune des rouelles à Agatha's Noble.
I' fallait enfin distchutter à fond toutes ches tchestions-là, et comme je vos ai dit pus haut, tout l'monde était content de r'vaie l'Chef ervenin.
Mais i' y-a une chose par exemplye, je n'voulons jamais ersubi patheille êpreuve, alors i' faudra d'mander respectueusement à Moussieu l'Bailli de ne jamais nouos abandonner comme ch'la. En temps pus paisiblyes, je lis permettrons d'aller tchiquefais ès Mintchais et ès Ecréhos, et p't-être jusqu'en Sercq!
No comments:
Post a Comment