GW de Carteret, fearless(?) war correspondant:
Comme si j'n'avais pas dêjà assez d'occhupâtions à souogni d'mes affaithes et à vos garder renseignis sus les affaithes d'autrui, v'là-t-i' pas que nou voudrait oquo m'imposer une nouvelle tâche!
Un haut personnage me dit l'aut'e jour: "Caouain, té qui vais un mio partout et qui connaît tout l'monde, tu pouorrais p't-être rendre de grands services ès autorités en nouos baillant un coup-de-main à dênichi touos les espions allemands qui sont oquo restés dans l'Ile. Car, tu vé, le Chantnyi Luxon ne peut pas faithe tout tout seu et ch'est bein seux qu'i' te s'sait bein erconnaîssant si tu pouvais les signaler touos l's individus qui t'pathaîtraient un mio suspectes."
Je lis d'mandi tch'est qu'étaient les salaithes pour une job comme chette-là, mais i' fit tout d'suite une longue fache et c'menchi à pâler d'patriotisme et d'amour pour sa patrie, et ainsi d'suite.
Ou pouvez bein penser que je n'tais pas fort tchuthieux d'entreprendre un biznesse comme ch'tis-là sans être bein péyi pour. J'y viyais des risques, mé! J'étais prêt à admettre que je pouvais me faithe couvri d'glouaithe, si par chance que je résussissais à dênoncer tchique ennemin ambustchi parmi nous, mais, par exemple, i' n'tait pas d'mêtchi de s'tromper. I' n'y-avait pas vingt-quatre heuthes que je v'nais d'vaie un homme condamné à péyi chinq louis d'amende simpyiément pour avé dit qu'san vaîsin était un Allemand quand i' n'y-était pas pus qu'mé.
J'ai 'tai souvent dans la P'tite Cour, dans la galelie, dans l'banc des journalistes et même dans la bouaîte à témoins, mais jamais oquo dans l'banc des acchûsés et ch'est-là un honneur que je sais tout-à-fait bein qui m'est rêservé pour dans tchique occasion, mais j'espéthe bein que l'jour en est oquo bein êloigni.
Criyons que v'là qu'en f'thait une sensation, si l'brit s'rêpandait dans l'île que l'Caouain s'en allait être présenté à la barre? Jamais la Cour ne s'sait grande assez pour acc'moder tout l'monde qui voudraient y-entrer, et je crai bein que même le Juge Vaudin es'sait obligi de s'y trouver à neuf heuthes et d'mie pour être seux d'aver une pliaiche.
Mais dormez trantchilles, bouannes gens, chu jour-là n'est pas oquo prêt d'être arrivé. Je na'i pas idée d'aller m'mettre la corde au co par pliaisi.
Je dis alors à chu moussieu-là que je n'y tenais pas du tout à sa proposition, mais je lis donni ma pathole de Caouain qué, sans doute, si en faisant mes promenades je trouvais tchique individu à copper le câblye télégraphique, à endommagi les wiyeurs du téléphone ou à pliaichi un lopin de dynamite en d'sous la Bibliothèque ou d'la Musée Jêrriaise, je me f'thais un d'vé d'aller tout-d'suite en averti les autorités compétentes, à seule fin que l'coupable es'sait amené d'vant la Justice pour rêpondre pour ses mêfaits. I' pathu assez content de chute promesse-là et en me r'merciant bein sincéthement, i' s'en allit.
* * *
Je vai par les gâzettes qu'il est tout probablye qu'un contingent jêrriais s'en va être demandé de volunteerer pour la djerre.
Eh bein, garçons, je vos connais assez bein pour saver que pas iun d'entre vous ne hall'la driéthe quand chu moment-là veindra, et que ch'est bein seux qu'ou don'nez une bouanne accompte de vous-mêmes quand ou s'sez là-bas. Che ne s'sa pas si enniant comme d'être à faithe la garde dans les mielles de la baie d'St. Ou, ou dans les falaises du Nord. Mais afin que les gens d'ichin 'saient gardés renseignis sus touos vos mouvements, il est absolument nécessaithe qu'ou séyêtes accompagnis d'un journaliste d'un certain talent pour servi comme correspondant de djerre.
Deustreîs d'nous ont dêjà 'tai erquémandés pour la poste, mais jusqu'àcheteu i' n'y-a pas oquo ieu auchune décision sus l'sujet. I' y-a des gens qui disent qu'i' faut y-envié l'homme le pus capablye, d'autres trouvent que comme i' y-a un certain dangi que jamais i' ne r'veindra, i' vaudrait mus y-envier le sien de tchi que nou voudrait s'dêfaithe le pus vite.
A propos d'chenna, les uns voudraient que che s'sait l'maudit Caouain d'autres ont suggèré l'Editeur du Jerseyman, tandis que bein des pièches sont en faveur de ‘Querist' de l'Evening Post.
N'importe le tchel qui s'sa chouaisi, je sommes touos prêts à nouos mettre en route, et je vos asseûthe que n'y-étha raique les nouvelles en votre faveur qui s'sont enviées ichin. si ch'est qu'ou faites des bêtises ou qu'ou touannez l'dos à l'ennemin, eh bein, ou comprenez bein, nou n'en pâlela pas. Dans un correspondant de djerre la discrétion est une qualité des pus nécessaithes et i' faut un homme qui sait quand tchi s'taithe et quand tchi chanter les louanges de ses soudards.
Marie Hibou qui voudrait s'dêfaithe de mé, prie touos les jours que che s'sa mé qui s'sa chouaisi. Enfin, nou verra.
* * *
Raîponses ès Correspondants.
Tchéthetchi. - Ouest qu'tu as 'tai êlevé don, man pouore garçon? Tu veur saver tchest qu'ch'est qu'une lettre majuscule. Une lettre majuscule en est iune qui, - qu'a, - qu'est - bah! j'en oublie la définition pour le moment, mais je sis pus qu'êtonné que tu n'saches pas tchest qu'ch'est qu'une lettre majuscule.
No comments:
Post a Comment