Lé Mais d'Mai - 1874

Le Meis de Mai

Le meis de Mai, le meis de Mai,
Y-a-t-i' un mais preferablle?
Cllos et gardîn, côti et prè,
Y-a-t-i' rein d'pus agriablle?
Vive, vive le meis de Mai,
Vive l'amour et la biautè.

Le meis de Mai, le meis de Mai,
Rêjouit toute la nature;
Tout est charmant, tout est parfait,
Tout à l'envi s'transfigure,
Vive, vive le meis de Mai
Meis remplli d'amour et d'attrait.

Le meis de Mai, le meis de Mai,
Comme est que tout se rêville;
Tout est jouaie et gracieusetè,
Tout dans sen pus be s'habille:
Vive, vive le meis de Mai,
Vive l'amour et la gaitè.

Le meis de Mai, le meis de Mai,
Est tout remplli d'esperance;
Opres la fraid le biau solei,
Opres le deu la rejouissance,
Vive, vive le meis de Mai,
De le rveir qui n'a le souhait?

P.L.
10/5/1874