Saturday 12 May 2012

Hors Jèrri - Abroad

Carteret journeyTchiques buts entouor des viages hors Jèrri:
Some snippets from texts about experiences abroad:

Enfin nouos v'là landès en Angliéterre;
Samuel accati tout ch'qui nouos fallait,
Et pis il engagi deux bouans bateliers
Pour nouos condithe à travers du Dêtrait.

Y'en a plusieurs au Canada,
Même y'en a qu'ont lus siez-yeux là;
Chest un payi fré, mais bein sain,
Les siens qu'y sont lus y p'yaisent bein
Et né r'vennent pas souvent:- T'chique fais
I restent là, ne r'vennent jamais.

J'm'en vais pour ne r'venin jamais
J'ne r'verrai pus nos clios ni notre êtabl'ye;
J'ne r'mettrai pus les pi'ds ichin;
La loué m'le d'fend. N'est-che pas abominabl'ye?

Souvent de la Côte au Dêtreit,
Et du Dêtreit en Amérique,
Dans sen p'tit cruchot il allait;
Ch'était du temps d'la république.
Quand les Anglliés et les Français
S'entre-faisaient souvent la guerre;
Et quand sus leux siège ben des roués
Trembllaient à la vouex d'Robéspierre.

Sous l'ciel brulant de l'Italie,
Et sus la mé du Canada;
Allant par chin, r'venant par là,
I m'faut parti gagni ma vie.

La pouorre hardelle 'tait en d'sespé,
San chièr Jerri dispathaissait,
Ac'h'teu tchi faisait presque niet.
Personne à terre ne la verrait.
A san galant tant haut ou criyiait
Si tu'm laisses ichin je m'en vais nier.

L'idèe d'être tout fin seu' là-d'dans, sans route dé mertchie,
Par la né presqu' aveuglyi, et en dangi d'ma vie,
M'affolait à maintchi, mais jé cachais tout l'temps,
Né et gliaichon drière mé, - gliaichon et né en d'vant,
Nord coumme man compas pointait, tréjous du maîme bord,
Sans touôner ichin ou là - j'allais Nord, tréjous Nord.

Et av' vous prins bain d'la mouorue,
- Nenn'cy donn' nous le schurier,
Pas là, il est sus l'ais d'en d'sus. -
J' espèr' qu'ou n's'ra pas chièrr' ch't'hivé,
L'autr' an oull' 'tait d'un divers prix.
- Et t' an Captainn', t'en trouv' tu bain?
Et, dis mé, as tu ieu l'avis
Dé nos apporter du " capplain"?

J'lé r'gardit en fache, et ov unn' air tout honteux,
Jé r'connnut l'couôsin Frainck, qué j'comptais au Canada;
Jé sis seûre qué j'en rouôgi jusqu'à la rachinne des qu'veux,
Quand j'vit qué ch'tait li qué l'avais traitè coumme ch'la -
Lé brave garçon, là bas, avait tout tchittè
Sans en dire mot à ses pus près parents,
Et ov tant d'autres Canadiens i sen'tait allè
Aidji à exterminer les peûles d'All'mands.

Je voudrais pouver navidgi
Pour visiter un grand pays,
Mais pepée dit qu'des mousses comm mé
De tchèque il' ont dèvent lus contenter.

Quand j'es'sai grand j'ithai én Australie,
Garder des mille et des mille brebis;
Et quand ma fortune j'éthai fait
Ch'est en Jérri que j'erveindrai.

Au liain dans touos ches payis,
Ou'est le solé trèjous lîs,
I' pensaient auv' bein d'l'envie,
A lus Jèrri;
Ses plyies si douoches du r'nouvé,
Brizes fraîches qui veinnent de la mé,
Louangez les bieauté de chu coin d'terre béni.

Yavai don unn fais un vier homm qu'allait en mé;
I s'appelait Jacques. San fî viageait dans l'mêm' batté:
J'crai qu'il avait nom Thomas, - j'n'en sis pas bain soeux;
J'l'appel'lons d'même, pour qu'il aient des noms touos les doeux,
Pour trente ans Jacques avai stiqui à san captaine,
Qui de l'perdr' érai yeu, ou pouets crair, bain d'la peine.
"Tom" n'yavait tet qu'chinq ans mais kmenchait à s'y fair';
Il tait bain souoegneux, et paraissait t'nin d'san père.

JOHN me dit, che n'est pas une paralizie,
Car chétait dans la ghierre des Etats-Unis,
Une balle d'un gros cannon, un ricochet,
Jétai en dessous du genou qui fut tapai.

Dé Saint Louothains, des hommes hardis,
Et eune douzaine dé Sainte Mathie
Ont ieu l'idée dé s'faithe fèrmièrs,
Au Su' d'l'Afrique parmi les nièrs.

Dé Saint Brélade nou peut compter
Hardi d'gaillards qui sont en mé ;
Nouvelle Zélande veurt pus d'familles -
V'là les Trin'tais, garçons et filles ....

Quand j'viagons au liain, dans un tas d'autres payis,
Pour admither les bieauté de pliaiches qui font envie,
Nos pensées souvent touônent à notre petit Jèrri,
Qui n'a pon d'pathelle dans tout le monde entchi.

Pourtant ch'est bé que de viagi,
D'vaie les bieautés d'un autre pays,
Lacs et riviéthes, des grands hauts monts,
Crouaîsi les prairies, les vallons, .
Et sus des bieaux hauts ponts passer
Et vaie tout chein qu'i' y'a d'pus bé :
Tout d'même, m's amins, j'dis chein qu'est vrai :
Où'est qu' nou s'trouve le mus, ch'est d'étre siez sé.

No comments: