Eune êlection en 1954
The outcome of an election:
Siouville Gagne
Ph'lip donne les raisons
Moussieu l'Editeu,
Eh bein, l'êléction est passée, et, à la grande surprinse de hardi d'monde, et partitchulièthement des villais, le Sieur Le Mérquand s'trouvit en d'sous quand l'résultat fut annoncé.
J'nos en fûmes voté, bras-d'sus, bras d'sous, la Merrienne et mé, quand j'nos trouvimes près d'la salle pârouaissiale, et que j'l'y d'mandait s'oulle avait fait sa décîsion, ou m'dit de taithe ma varvette, et même ach'teu je n'sais pas tchèsqu'ou fit. Ou d'veint d'pûs difficile en vieillissant, la bouonnefemme,
Tard au sé, un vaisin, r'venant d'la ville, vint nos annoncé le résultat. Y pathaissait tout joyeux, et je n'm'en êtonnais pas, parsque j'l'avais veu dans la matinée avec une bliue et blanche rôsette. La Merrienne ne dit mot mais ou n'offrit pas seulement une tâsse de tais, sans pâslé d'une goutte de tchiquechose pûs fort. Quand y fut hors et que j'fit des r'proches à la vieille, ou m'dit tch'il en avait dêjà yeu assez, et tch'y dév'thait avé grand honte, avec la dgaingue de mousses tch'il a.
Enfin, à matin, comme j'tiomes à dêjeuné, ou m'a d'mandé comment chonna s'faisait qu'un homme si p'tit connu comme le Sieur Siouville avait put battre le John Le Mérquand, tch'a dêjà tait dans l's'Etats tchiques années, et tch'est l'Président du Comité d'Educâtion. 'Ch'est une chose,'' ou s'fit, 'que je n'peux pas comprendre.''
'Eh bein, Merrienne,'' j'l'y dit 'à ma veu y'a plusieurs raisons. A qu'menchi, l'John Le Mérquand n'a pas la populathité d'san pèthe, yun d'mes grands amins, et un homme réspecté partout. Y n'se fait pas si affablye, et dans d's'êléctions chonna s'conte. Il a hardi d'bouonnes qualités, et il a fait d'bouon travas dans l's'Etats, mais y m'semblye tch'y veur allé un moi trop vite, et il a la réputation d'voulé tréjous avé sa tête, et chonna fait d's'enn'mins.
'Epis,'' j'continuit, 'hardi d'êlécteurs viyaient tchi n'tait pas tchéstchon de l'expédié d's'Etats. Y réstetha là, et sans doute, y s'sa ré-élu comme Député à la fin de l'année. Une chose tchi n'l'y fit pas d'bein dans les pâraisses, ch'tait la cértitude que s'y gâgnait chu coup, y s'sait rempliéchi par un villais, et les campagnards en ont pliein l'dos d'chais Villais.''
'Vèthe,'' ou dit, 'mais n'oublie pas qu'les villais étout n'ont pas grand-chose de bouon à dithe des campagnards. Ch'est comme cat et tchan dans l's'Etats d'nos jours par chein qu'j'en vait.''
'Tu n'en est pas d'lien,'' j'l'y dit, 'mais ach'teu y'a une autre chose. Le brit avait couothu que l'Sieur le Mérquand tait en faveur d'une louai tch'empêchait un homme de prendre pour Sénateur s'y n'avait pas tait dans l's'Etats pour au mains trais ans, et l's'êlécteurs n'aiment pas chonna.''
'Bein seux tch'y l'aimaient pas,'' ou dit, 'mais je crai que ch'tait un tâs d'gniolin. Un Le Mérquand n'éthait jamais fait ditet.''
'P't'être bein,'' j'l'y dit, 'je n'sais pas, mais comme je vais les choses, chein tchi fit pûs d'ma ès rouoges et biancs ch'tait l'attitude de la Poste. Ch't'articlye-là, Mardi au sé fit hardi d'monde mârri et valut bein des vouaix à Emile Siouville. Et chu brit-là dans l's'Etats l'y fit du bein étout.''
'Ch'est pûs qu'possiblye,'' ou dit. 'Quant au Post, j'ai r'mértchi d'vant qu'autchun candidat tch'a l'support de chutte gâzette-là peut êcrithe à ses pathens. Quand l'jour veindra que l's'électeurs se laiss'sont m'né par le nez y s'sa temps d'patchi ses télles.''
'Damme vèthe !'' j'l'y dit, 'mais chu temps-là n'est pas ocquo v'nu, Dieu mérci !''
6/3/1954
No comments:
Post a Comment