1954: La Tonnelle

 Eune articl'ye par Douard Lé Bro d'1954:

Housing crisis and major States building projects in 1954:

La Tonnelle

Quand l's'Etats siègent la Merrienne liet les rapports dans la gâzette mot par mot, épis, quand oulle a fini ou s'met à voulé savé pourtchi chonnechin, pourtchi chonna et pourtchi l'autre chose, et tréjous ou pathait craithe que j'peux donné une raiponse satisfaisante à ses tchéstchons.

Ou qu'menchit hier au sé par d'mandé si l's'Etats avaient absolûment pérdu la tête. Oulle avait liut qu'un certain comité avait d'mandé trais chents mille louis pour bâti des maisons pour louë, et ou n'pouvait pas en r'venin.

"Trais chents mille louis !'' ou s'fit. "Y'a tchique trompe, Ph'lip. Ch'est trais mille au tout pûs. La gâzette ne dév'thait pas faithe de patheilles mêprinses. J's'y bein à même de lûs êcrithe.''

"La gâzette n'a pas fait d'mêprinses,'' j'l'y dit. "Quand nou s'met à bâti des maisons au jour d'agniet y'a des couotage, épis n'oublie pas qu'les gens d'ach'teu veulent tchiquechose d'extra. Y lûs faut tout sortes de ramass'sie, et, sans doute un bathroom pour chaque maison, avec de l'iau bouillante à toutes heuthes du jour.''

"Des bathroom,'' ou s'fit. "J'n'en avons pas nous d'chu tracas-là, et pourtant je n'sommes pas des salopes. Le grand bashion a nier-beurre nos a tréjou fait, comme y faisait pour nos vieilles gens. Et une fais par mais est souvent assez.''

"Pas pour les gens d'ach'teu,'' j'l'y dit. "Ch'est iun par jour, et même tchiquefais deux.''

Et bein ch'est d'sales gens,'' ou dit. "Mais même ach'teu je n'comprends pas chutte ênorme somme-là. Combain don d'chais maisons tch'ils ont idée d'bâti ?''

"Je ne sais pas tout-à-fait,'' j'l'y dit, "et il est probablye que l'comité ne l'savent pas ieux-mêmes. Mais y n'se gènent pas car y savent tréjous que quand y n'réstetha rain dans l'coffrefort, nos charmants Etas s'sont tréjous prêts à le r'emplyi, ch'est-à-dithe s'y n'ont pas fait banq'route devant.''

"Ou s'y n'sont pas tout enfreumés à l'âsile,'' ou dit. "Mais y'a une autre chose que j'ai veu dans la gâzette, Ph'lip. Y pathait qu'nou s'en va bâti une ênorme tonnelle du Weighbridge jusqu'au bas du Mont d'la Trin'té. Dis-mé, j't'en prie, que ch'n'est pas vrai.''

"Ah, Merrienne,'' j'l'y dit, "si-fait ch'est vrai. Ch'est décidé, et l'travas est même qu'menchi. Y paithait qu'la djobbe prendra djais-huit mais.''

"Dis djais-huit ans,'' ou s'fit. "Mais ach'teu tchès qu'y s'en va arrivé dans la saison ? Comme tu l'sais toutes les patates de la Trin'té sont portées au bridge par chutte route-là. Pouorront-y continué d'même, ch'est-à-dithe pourront-y pâssé en d'sûs d'la tonnelle sans autchune crainte de s'trouvé dans l'fond d'un creux de vingt à trente pids ?''

J'l'y dit que j'n'avais pas ocquo yeu l'temps de prendre des renseignements, mais que j'pouôrrais y'en dithe pûs long une fais qu'j'éthais tait en ville. "Y'a une chose," je continuit, "et ch'est qu'si la route du bas d'la Trin'té jusqu'au weighbridge n'est pas ouvért ès férmiers, y'étha un drôle de pité dans l'haute d'la saison.''

"Che s'sa pièthe qu'un pité,'' ou dit "Che s'sa, comme dîsait l'prédicateur aut'fais, un vrai patafais. Mais p't'être tch'y creûs'sont avant assez pour que les lorries et les vans pâssé en seuz'té.''

"Vèthe,'' j'l'y dit, "et p't'être étout qu'les fondâtions des maisons le long d'la route, et les muthailles craq'thont, comme ils ont déjà fait à pûs d'un bord. Si chonna s'arrive, ma fille, y'étha bétôt des Remontrances d'vant la Cour Royale, mais y faut craithe que l'ingénieurs emplyiés par le Comité d'la Santé Publique savent tchèsqu'y font. Dans d'pathéilles djobbes y faut s'fié sûs l's'expérts.''

"Eh bein,'' ou dit, "quant à mé, j'n'ai autchune fouai dans chais expérts, et j's'y pôsitive que d'vant qu'chutte tonnelle-là s'sait finie, l'Comité d'la Santé Publique voudra la vaie tu sais bein iou.''

Eh, Moussieu, ch'est-là m'n'opinion étout.

PH'LIP

1/5/1954