Eune lettre du Bouanhomme George
Si l's anciens r'vénaient!
Le Ménage ès Feuvres,
St. Ouen
Lé 26 d'août, 1978
Moussieu l'Rédacteu,
En liêsant les gâzettes ches jours nou veint enn'yés d'vaie un acompte des mêmes événements d'crînmes, vols, vandalisme et mêchanceté que nou vait d'jour en jour, et nou n'aime pon continnuer à la mentionner dé peux qu'les lecteurs déveinnent enn'yes d'lièthe la même turlutte dé s'maine en s'maine. Mais nou n'peut pon sénon penser ès changements qué l'pâssage du temps nouos a apporté en Jèrri.
Tout est boul'versé d'nouos jours. L's anciens du temps pâssé éthaient d'la peine à r'connaître lus p'tit Jèrri s'i' pouvaient r'vénîn l'vaie. En marchant les p'tites rues i' vèrrait les fôssés tch'il' avaient aidgi à bâti dans l'temps jadis c'menchi à s'êcrouôler à m'suthe qué les pièrres déveinnent êlouaîssies. Il' éthaient à marchi ches p'tites rues au péthi d'lus vies à ch't heu. Ché s'sait à peine s'i' pouôrraient êcapper d'aver lus c'mînses dé molleton happées dans les reues des motos tchi les f'thaient quâsi lus cliuter ès fôssés pour lus donner du run à bouler à quarante milles à l'heuthe.
I' s'saient êtonnés et probabliément êpeûthés par la machinn'nie tch'i' vèrraient par les c'mins, les tracteurs, les machinnes à dêfoui, les "harvesteurs'', les rouelles tchi touannent, lé camas d'engîns – et l'brit assourdissant d'avions en l'air. I' lus faudrait du temps, sans doute, pour réaliser qu'un tas d'ches avions pouorraient p't'êt' tchique jour dév'nîn engîns înfèrnals dé destruction en orbite lé tou du monde dans l'espace tch'il' avaient pensé êt' lé domaine dé solé, d'la leune et d's êtailes.
L'encombrément des rues par les motos et l'empouaîsonnement d'l'air par l'odeu d'pétrole les f'thaient penser qué la fîn du monde n'est pon liain, car i' n'y'a qu' deux odeurs mentionnées dans la Bibl'ye – l's odeurs d'enchens et d'soufre – et ch'est bein seux qué l'gaz tchi sort des tuyaus d'êcappe en driéthe des motos n'a pon l'odeu d'enchens ! Et pis l'Angliaîchinn'nie d'touristes, chicannes dé gens et folletéthies d'toutes les sortes les f'thaient craithe tchi'i' sont dans un pays êtrangi.
Quand i' vèrraient les jannes par les c'mîns i' créthaient probliément vaie eune race dé gens d'eune aut' plianète. Dans lus temps il' 'taient accouôteunmés à vaie l's hommes en braies d'bâthîn et c'mînses dé molleton et les femmes en cotillons tchi lus couvraient les gambes jusqu'à la g'vil'ye du pid. Ché n'tait qu'par lus mathier ou des ouï-dithes tch'i' pouvaient saver tch'est tchi couvrait les gambes là-d'ssous. Un bouan exèrcice pour l'înmaginnâtion ! A ch't heu ? Auve les filles en braies et les g'veux copés, et les garçons auve lus longs g'veux, il' éthaient d'la peine à discèrner tch'est tch'est homme ou femme !
Les anciens lus trouvethaient êbliouis par lé nombre d'maisons et grands bels macadamisés tch'ont rempliaichi l'hèrbe et les récoltes bein des grands clios. Accouôteunmés à lus maîsons et caumines en granit et couvèrtes d'glyi, et à vaie la feunmée sorti d'lus cheunm'nées, i' sé d'mand'daient si ch'est eune chorchellelie modèrne tch'a înventé eune architectuthe d'appathence faîtelle. Et i' r'gardéthaient en vain pour vaie la feunmée des cheunm'nées. Et pis en viyant les vaques êcônées i' créthaient p't-êt vaie eune nouvelle race dé bestchiaux en Jèrri.
Il' éthaient cèrtainement d'la peine à vivre souos les conditions d'a ch't heu, l's anciens. Accouôteunmés à travailli dû et couoyer en toutes choses, i' trouvethaient qué bein les travailleurs dé nouos jours gaspillent lus sou mal à propos, et tch'i' gaspillent lé temps des cheins tchi lus donnent du travas, et qué dans bein des cas i' gângnent bein pus qu'ieux.
I' trouvethaient ch'la drôle, l's anciens, qué la grand' partie des gens n'craient ni au Bouan Dgieu ni au Dgiâbl'ye, et qué l's églyises sont quâsi vièdes et l's aubèrges tréjous pliennes.
J'vouos asseûthe qué j'voudrais pouver r'gouôter la sîmplyicité d'la vie des vièrs temps. Les règl'yes 'taient aîsies à comprendre et à siéthe. I' fallait s'comporter comme i' faut, honorer péthe et méthe et respecter l's anciens. Ch'tait la disciplinne dé l'êpoque et i' n'y'avait pon tchestchion dé sé r'bînfrer contre. J'avons grand bésoin dé r'touanner à chutte sorte dé disciplinne là !
No comments:
Post a Comment