L'Assembliée d'Jèrriais dans la Cour Rouoyale
Les affaithes - lé rapport dé la dreine rêunion, qui fut accepté, et l'êlection dé qut'e nouvieaux membres - futent faites preunmiéth'ment. Lé Président fit étout la beinv'nue au Sieur George Le Feuvre, ervénu en Jèrri acouo eune fais, et en rêponnant chu moussieu dit qué bieau qu'i' y avait ieu des chang'ments, i' 'tait bein content d'être ichîn acouo eune fais.
(...)
Un honneu
L's affaithes finis, lé Député Quérée fut rencontrer Moussieu R. H. Le Masurier, D.S.C., l'Bailli, qui' avait dêjà donné ermission pour chutte visite întérêssante, et, en lî faîthant la beinv'nue, dit tchi honneu qué ch'tait pour L'Assembliée qu'un moussieu si embarrassé avait ieu la compliaisance dé donner d'san temps pour explyitchi des points dans l'bâtisse et comment qu'la Cour siégeait pour difféthantes raithons.
Ch'tait dans l'rêgne dé la preunmié Reine Elizabé qué l's Etats et la Cour dé Justice siégîtent s'pathêment. I' y a ieu un Bailli en chèrge, ou pus tôt à la tête dé l'Île, dépis l'12ième siéclye, et ch'tait lé Rouai Jean qui donnit l'ordre pour 12 personnes capablyes à être nommées pour aidgi au Bailli à garder la justice et pour l'administration d'l'Île; pus tard les Recteurs et Connêtablyes y fûtent nommés étout.
L's Assises d'Héritage
I'y avait l's Assises d'Héritage, quand au temps passé, ch'tait eune grand' occasion. Les soudards dans l'Île y étaient en forche et touos les Seigneurs dé fiefs s'y trouvaient en grande ténue, mais i'y a bein des gens qui craient à ch't heu qué l's Assises d'Héritage n'ont pas d'valeu.
I'y avait étout la Cour du Billet et la Cour du Câtel, qui n'siége pus d'nos jours, et la Cour du Sam'di, pour les contrats, jugi des causes criminelles, etc., mais sans soute à ch't heu ch'est au vendrédi qué ches affaithes ont lieu.
La Cour comme oulle est à cht' heu' fut bâtie en 1872, par des Jèrriais, et n'avait pas 'té r'painte sinon l'année passée. Bein des choses ont changi d'pis chu temps là, et la Cour compliéte (le "Nombre Supérieur") siége seul'ment pour jugi d's appels, et pas si souvent dépis qu'l's Îles ont uni pour considéther bein d'ches cas. Sans doute pour les Assises, quand les douze Juges sont à lus pliaiches, et qu'un jury dé 24 personnes sont à servi pour jugi les causes d'vant ieux. Les Juges né donnent pas lus opinion, mais ch'est eune vielle couôteunme qu'i s'saient tréjous là.
Les Connêtablyes et l'Jury
Ichin l'Bailli ermertchi qué les membres du jury sont chouaîsis des noms donnés par les Connêtablyes des parraisses, comme des gens capablyes dé servi, et qué sus toute l'Îles i'y en a eune bein p'tite proportion à compathaître au nombre des habitants.
Pour des causes criminelles autrément, deux Juges siègent auve lé Bailli, pas necéessaith'ment d's hommes dé louai, mais des mêssieux capablye d'êcouter l'evidence donnée par les preuves et l's atchûsés ieux-mêmes. dans bein des cas ch'n'est pas tréjous la véthité, mais quand-même ches mêssieux, êlus comme Juges, sont tréjous capablyes dé faithe lus idéé si l'atchûsé est coupablye ou pas.
L'divorce
Dé nos jours l'y a l'divorce, et ch'est souvent eune tâche bein difficile dé jugi ches cas.
Auprès, Moussieu Le Masurier donnit des détails des portraits, et d'la Mace, presentée par lé Rouai Charles II. Les noms sus l'pliafond sont des mêssieux qu'ont êcrit sus la Louai Normande et d'Jèrri.
Ch'tait damage qué nou n'pouvait pas visiter la Chambre des Etats, mais à cause dé r'pathations i'y a des chauffaux partout et pas d'veue pour lé temps.
Ermerciements
Lé Député Quérée ermercyit l'Bailli pour nos aver explyitchi tout si bein, les détails des bâtisses et toutes les activités d'la Cour même.
1965
No comments:
Post a Comment