1968: D'èrtou en Améthique - Back in America

George d'La Forge dêcrivit sa crouaîs'sie d'l'Atlantique en avion en 1968:

George F. Le Feuvre described his transatlantic flight in 1968:

D'èrtou en Améthique

Trenton, Michigan,
U.S.A.
Lé 23 d'novembre, 1968

Moussieu l'Rédacteu,

Chutte fais, ch'est d'Améthique qué j'sis à vouos êcrithe. Ch'est un fichu but d'Jèrri, mais j'sis siez man fréthe Fraînque et j'pâlons l'Jèrriais quand j'sommes touos seurs. I' m'sembl'ye qué les mais d'êté qué j'veins d'passer dans l'Île sont dêjà bein liain dans l'passé - comme si ch'tait un rêve et qué j'veins dé m'rêvilyi en Améthique!

M'n anmîn, l'Académicien Fraînque Le Maistre, mé gliainit au Ménage ès Feuvres mêcrédi matîn à un quart dé huit et m'portit dans san moto au camp d'aviation à St. Pièrre. Là, j'trouvînmes lé Connêtabl'ye Edgar Mouothant d'La Trinneté et sa charmante fille Brenda, et l'Sieur Le Ruez, fils d'Moussieu Henry Le Ruez d' "Homestead" à St. Pièrre - un anmîn qu'j'éthais deu aller vaie d'vant m'en r'vénîn en Améthique. Hélas, y'a un tas d'anmîns qu'j'éthais deu vîsiter d'vant tchitter Jèrri. Ch'est tréjous là l'cas! I' s'arrive tréjous tchiquechose tchi mé r'tèrge ou m'empêche dé faithe tout ch'qué j'dév'thais faithe à la dreine munute. Chutte fais, ch'tait la dreine maladie, l'décès et l'entèrrement d'ma couôsinne Lîsabé d'Aubèrt dé La Baie d'St. Brélade, tchi fut prînse malade au c'menchement d'mes dreins dgiez jours en Jèrri. Enfîn, l's anmîns qué j'mantchis d'aller vaie n'sont pon oubliyés, et j'îthai sans doute les vaie au r'nouvé d'l'année tchi veint si L'Bouan Dgieu m'prêsèrve, comme dîsaient l's anciens!

"Et trouvis-tu l'temps long dans l'avion en t'en r'allant en Améthique?" es'sait la tchestion qu'nou mé d'mand'dait si j'tais en Jèrri! Eh bein, d'Jèrri à Londres j'eus l'honneu d'êt' assis à côté du connêtabl'ye Edgar Mouothant, et i' n'm'ennyit pon du tout car j'baillînmes dé nouot' becque en Jèrriais san arrêt tout l'long du c'mîn. J'connaissais l'Connêtabl'ye quand j'passis l'êté d'mil neu chent dgiex-neuf siez l'défunt Juge Francis Vibert Le Feuvre au Mont auy Prêtre en attendant pour un passage au Cannada auprès dêmobiliasâtion d'l'armée Britannique ch't année-là, et jé n'l'avais veu qu'eune fais d'pis chu temps-là. Nouos v'la don à bagouler entouorre lé temps passé au Mont au Prêtre, et l'viage a Londres sé passit vite. Arrivés-là, fallait filer bouan rond. l'Connêtabl'ye pour Windsor, où'est tch'il avait rendez-vous auve lé moussieu tchi s'otchupe des bestchias Jèrriais d'Sa Majesté La Reine, et mé pour trouver l'transport tchi mène à une aute partie d'l'Aérodrome dé Londres pour m'embèrtchi dans l'avion à rêaction des Pan American World Airways pour la travèrsée en Améthique.

À bord du Pan American Clipper (un Boëing 727), i' n'y avait pon d'aut' Jèrriais qu'mé, et jé m'contentis d'm'assiéthe à man tout seu et êprouver à reunminner et r'vivre - dans m'n idée - l's heuthes passées heutheusement en Jèrri, prîncipalment les cheinnes passées à l'entou d'l'âtre au sé auve lé Sieur Fraînque Le Maistre au Ménage ès Feuvres en d'vant d'un bouan feu, comme lé faîthaient sans doute nouos anchêtres au temps jadis! J'tchittînmes Londres à onze heuthes vîngt, et jé n'feûnmes pon longtemps à monter en l'air jusqu'à la hauteu dé 33 mille pids. Justément comme j'tais à freunmer l's ièrs pour faithe un p'tit somme, né v'la-t-i' pon eune belle janne fille tchi veint mé d'mander si j'voulais prendre tchiquechose - voulant sans doute dithe eune fais à baithe! Comme jé n'bai janmais d'litcheu à bord d'un avion, jé m'contentis d'eune raide bouanne tassée d'thée!

Quand vînt l'heuthe du dîner, j'eûnmes un supèrbe r'pas. Du saumon feunmé comme hors d'oëuvre, d'la viande, des patates, des pais d'camp et des champîngnons, des galettes et du fronmage, et un mêlange dé gâche et d'crème ("trifle" en Angliais) pour finni. En liâsant un livre et dormillionant d'temps en temps, l'temps s'passit raisonabliément vite. Lé ciel 'tait parfaitement cliai et l'solé r'lîsait en d'ssus des nuages où'est qué j'tions, et nou n'vîyait rein qu'ieux souos sé - comme si ch'tait un blianc tapis d'laine. Nou ouïyait l'ronnement d's engîns à rêaction, mais ch'tait pûtôt un son comme lé soûffliément du vent qué comme l'âpre ronnement d's engîns à hélices et pistons. Les chent chînquante passagièrs sé passent lé temps d'eune mannièthe ou d'l'autre. Y'en a tchi dorment et tchi ronfl'yent somme s'il' 'taient à ramonter touos les galots d'Frémont, et y'en a tchi dorment trantchilement. Y'en a tchi liêsent des livres. D'aut' èrgardent par la f'nêtre.

Mais nouos v'la arrivés près d'Boston. J'avons 'té sept heuthes en l'air dépis Londres. L'avion d'scend un mio à la fais et jé c'menchons à pouver discèrner les rues et les maîsons d'chutte fanmeuse cité d'La Nouvelle Angliétèrre, capitale du Massachusetts, patrie d'Benjamîn Franklin et pays des gens d'êlite. Ch'est l'pays d'naîssance dé l'ambassadeur John Cabot Lodge, homme d'êtat et d'scendant des Cabots d'Jèrri. ch'est ichîn tch'i' faut passer l'Offici d'Immigrâtion, étant l'preunmié pid à tèrre en Améthique dépis qu'j'avons tchitté Londres.

Auprès eune attente d'eune heuthe à Boston, nouos r'véla en l'air en c'mîn pour Detroit dans l'Michigan, et eune heuthe et d'mie pus tard j'eus l'pliaîsi et la jouaie d'vaie la fache souôriante dé man fréthe Fraînque tchi m'attendait à l'aérodrome. Né v'la un aut' viage arrivé à sa bouanne fîn!

George d'La Forge