1963: Les élections, le casino, les révélations et les patates

 Les élections, le casino, les révélations et les patates

 

à Portinfé, Saint Ou.

Vendredi au sé.

 

Moussieu l'Editeu.

Partout ouèsque nou va chais jours nou n'ouait pâsler que d's élections, pour président d'la Sociêté Royale, mais étout pour Sénateurs. Le Fred Dorey, yun d'mes pathens et un grand amin, se r'tithe, mais j'ai dans l'idée que si ch'tait seulement pour trais ans i' r'êprouv'thait, car à s'n âge neuf ans est trop longtemps. Ch'est grand domage, car le Fred est un caractèthe, comme i' n'y en a pas hardi, mais, ȧ ma veue, i' fait bein de se r'pôser. A sa plièche j'éthais fait la même chose.

À ch'teu pour les candidats : Le Sieur Perchard et le Ph'lip Rom'thi de Saint Jean sont certains, mais i' n'peuvent pas espéther d'y v'nin sans oppôsition, car si je n'me trompe pas - et j'l'ai fait pûs d'une fais! – i' n'éthont pas, ni yun ni l'autre, à y v'nin sans travaillyi. Nou ouait que bein vite nou s'en va entendre de tchiques autres canididats. tchi n'ont pas ocquo 'té mentionnés dans la “Post”. Nou-s-a tchique fais yeu de grandes surprînses dans d's élections, et nou pouôrrait en vais chutte fais. J'ai ouï qu'un certain Moussieu, tch'est bein connu, est prêt à prendre des gages et offre chent louis à autchun tchi peut nommer les quatre premiers en ordre. Mais je n'crais pas pour un moment que ch'est la véthité, car, à qu'menchi, je n'crais pas tch'il a les sous, épis il est bien finaillyi. Les candidats qu'ont la miyeu chance sont les siens tchi s'en vont oublier tout l'restant et donner tout lûs temps à ramâsser des vouaix.

Ou-s-a-vez veu, sans doute, Moussieu, que y'a l'projet d'êtablyi un casîno sûs l'haut du Fort Régent par des partitchuliers. J'lûs souhaite jouaix d'lûs enterprînse. Mais j'si content de n'aver pas un sou dans chein que j'considèthe une folie. Le temps ditha tout, Moussieu, mais ma réflection est que notre p'tit Jêrri ne sait pas ouèsqu'ou s'en va.

R'venant pour un moment à l'élection pour Sénateurs, chein qu'la Merrienne r'grette, ch'est que n'y a pas une seule femme parmi les candidats. Mais le brit couort que y'a une vielle fille tchi d'meuthe pas bein lyien d'ichîn tch'est ocquo à considéther la situâtion. La Merrienne n'veur pas en ouï pâsler, car, comme tout l'restant d'la pâraisse, ou n'est pas sans saver que si la garce n'a jamais trouvé un homme, oulle a yeu pûs que sa share d'amouotheux.

Mais, Moussieu, pâslant d'ature chose, tchèsque nou peut dithe des révélations du Docteur Bentlif. Tch'ont appathu dans la “Post“? Si tout ch'qu'i' dit est vrai, et nou n'peut pas en douter, ch'est têrriblye, mais ouèsque est le r'miède?

Paslant d'patates, ch'est certain à ch'teu' que y'en a bein trop dans l'Ile. Et qu'les fermiers tch'en ont cru en deuxième récolte ne peuvent pas s'dêfaithe de lus surplus sinon à grôsse perte. Ch'est la preumié fais que chonna s'était arrivé, mais chein qu'est seux et certain ch'est que l'prix au moment ne paie pas d'un bieau but pour le couôtage.

J'espèthe, la s'maine tchi veint, d'aver tchiquechose à vos dithe du grand “show” d'bêtes en Ville, mais en v'là assez pour agniet. Vos souhaitant, la Merrienne et mé, tout ch'qu'i' y'a d'miyeu.

Ph'lip

Jersey Weekly Post  19/10/1963