1918

Mil neu chents dgiêx-huit

À touos les lecteurs d'la Gâzette,
sans distînction d'âge ou d'forteune,
Elie, dé bein bouan tchoeu, souhaite
tout bonheu dans l'année quémeune
Mil neu chents dgiêx-huit!



Qu'les grounneurs apprengent à souôrithe,
qué les pièrcheurs èrbrachent lus manches;
qu'les mauvaises langues tchittent à mêdithe,
et qu'à la dgèrre, nos hoummes avanchent
en Mil neu chents dgiêx-huit!

Qu'nos Êtats, quand i' délibéthent,
né manquent pas d'considéthâtion;
et qu'dans not' mangi et not' baithe
nou-s'augmente un mio not' râtion,
en Mil neu chents dgiêx-huit!

Qué touos les fèrmièrs saient prospéthes,
qu'il' apportent des sou en ville;
qu'j'ayons des taxes êgalitaithes
tchi n'êcrâsent pas les grandes fanmil'yes,
en Mil neu chents dgiêx-huit!

Qué l's annonches nos veinnent à gogo;
ou vèrrez qu'ch'est avantageux;
et qu'nos modestes boêtes à sno
né saient pus volées d'sus l'compteux,
en Mil neu chents dgiêx-huit!

Elie