A Piteur Pain story from 1916:
Piteur reports on the bull show
"L'Editeu a dit d'vos dithe d'allé lis pâslé dans s'n'office," que m'dit un clerque l'aut' matin.
"Bon!" que j'me fit. "Chose seuthe ch'est pour pâslé d'hauchi mes gages coumme il a fait a touos ses autres homme dépis la djerre; i' nos a prins en amiêtchi; il a r'mertchi not' Lonôre, la fache a Laïzé y'etha fait impression; sans doute i' s'en va m'hauchi d'un louis la s'maine."
Mais nouffet dja! Ch'tait simpliément pour me dithe d'allé au show d'boeus et faithe un articlye la d'sus.
"Sans doute," qu'i' s'fit, en me r'gardant par en d'sus des leunettes; "sans doute ou vos r'counaissis en boeus?"
"Si j'me counnais en boeus! Mé qu'ai 'té forgeux tchinze ans d'temps dans l'nord de l'Ile! Mé qu'ai féthé pus de ch'vaux que je n'pouorais dithe! Mé qui fit assitchi toutes les vaques a man bieau-frethe la bordée qui fûtes eunne pôse sans servante et que j'lus baillyi un coup d'main! Si j'm'y r'counnais en boeus!"
Mé v'la don dans d's alentours d'la Fethe-a-bêtes et du Marchi-ès-Français. Si jommais j'ai yeu r'grét d'avé sinné a temperance, ch'fut Mèscredi passé!
"Dis mé, Piteur," s'fit Jim Lenfèsté, sitot qu'i' m'vit; "tu pouôrrais pe't'être en mettre un p'tit bu sus la gazette entouôre man boeu 'Jolli Fern Skylark'. Entré-jonge siez Couilliard pour en d'vizé?"
J'pépiais d'entré, mais, quand nous a sinné, faut tâchi d'stitchi a sa patholle - mais ch'est tchiq' fais bin du. Et ch'qui y'avait d'piethe, ch'est que quand i' fut seu que j'tais teetolleur, ch'tait[es*] tchi s'en vindrait m'en offri deux d'gouts? Tchi bouans garçons, tout d'même, que nos fermiers! Coumme ils ont l'tcheu sus la main - quand nou peut pon dithe oui!
Mais pâslons d'boeus. Touos d'bouans boeus; et les juges avaient deu sué hardi a lus job. Les juges de la Class I finissaient justement quand j'entri dans la Féthe, et ils 'taient a distribué les ribans. J'fut un mio èstounné d'lus décision. A m'n'avis, s'ils avaient mins "Cowslip's Oxford" deux ou très [broques*] pus bas, ch'éthait 'té mus - a m'n'avis! Chu boeu la s'n'îtha dans sen dos d'vant tchinze ans d'ichin, dites que j'vos l'dit! V'la ch'que ch'est que d'jugi des boeus dans eunne Féthe-à-bêtes; y'a du ponsi! M'n'idée est qu'il en volli hardi dans l's'envithons tandi qu'ils 'taient a jugi la Class I.
N'y'a rin a r'dithe sus "Sunray Son" qu'eut l'preumié prix dans la Class II. Ch'est un bieau boeu, un raide bieau boeu, coumme nou n'en vet pas touos l's'ans. Ch'est pas l'bouochi qui l'étha, ch'tîna.
Les viers boeus 'taient a lus tout-seu dans l'Marchi-ès-Français, et pas pus a lus aîse qui n'fallait. Pas d'run pour les faithe proumné d'vant les juges; et n'y'avait pas assez d'moulée-d'scie sus l'aithe; tout l'temps j'avais peux d'les vaie s'drotchi et s'rompre un d'jéthé ou s'teurtre eunne èspaule, ou s'èslouèssi eune cône. Ch'fut Moussieu Pérrée qu'eut les deux premiers prix - j'm'en allais quazi dithe, coumme d'amor - et sinon qu'i' n'avait pas yeu la chose d'amné "Fern's Noble Golden," il éthait "sweepé" touos les prix. Nou m'a dit qu'Moussieu Pérrée c'menche a s'ennyié d'chu coummerce la. I' voudrait vaie tchiq'un faithe un èsfort pour l'empêchi de v'nin tréjous preumi partout!
Et pour en fini, ch'tait quazi tous d'bouans boeus, Mèscredi passé. Ch'n'est pas èstouonnant! Au prix qu'est l'bran, y'a a perdre sus les bêtes de s'conde qualité; ch'est pour cheunna qu'les bouochiers en trouvent tant. Et les vaques qui s'en vont étout à la bouochell'lie; n'y'en étha bétot pus assez pour fourni du lait ès villais. Et mé qu'en voudrais pus qu'd'amor viyant qu'j'ai sinné contre la litcheu. J'n'ai pas d'chance!
Piteur Pain
Evening Post 13/4/1916
[illiêsibl'ye/illegible*]
No comments:
Post a Comment