Thursday 12 May 2016

1938: Colorado Beetle

Leptinotarsa fg03Eune articl'ye pus à co surréaliste du Caouain d'1938:

A somewhat surreal tale by GW de Carteret from 1938:
Quand l'brit s'rêpandit i' y a tchique temps que l'Colorado Beetle avait envahi les Mintchais et était à mangi les ormers et qu'nou pouvait ramasser ches insectes-là à chivethées sus la grève à St. Malo, certains d'nos fermiers furent bain gênès car i' réalisithent qu'i' y avait grand dangi qu'i' vinsse en Jêrri et deux d'entre ieux voulithent s'asseûther sis la chose n'était pas hardi exaggethée, ch'est pourtchi i' s'décidithent d'aller vaie pour ieux-mêmes.

Ch'tait Charles Halledoque et Dâvi Meurdron de dans iune des pâraisses d'amont.

Quand ils annoncithent à lus femmes chein qui s'proposaient d'faithe i' rencontrithent une sérieuse opposition.

Missice Meurdron dit à Dâvi, "Tu t'en vas rester ichin! J'm'en vais t'en baîlli mé ses extchursions à St. Malo! Tu m'prends pour une innocente, don? Je n'sais tchi sorte d'extchuse que tu pouorrais inventer pour aller t'promener en France sans mé!"

La femme à Halledoque l'apostrothyi à peu près dans les mêmes termes, mais i' l'envyi s'faithe quatorze et la mins au défi de l'empêchi d'faithe le viage.

Là d'sus ou s'en fut trouver sa vaisine Sophie Meurdron et opprès qu'les deux fammes eurent iun une conférence illes annoncithent à lus hommes qu'illes lus donn'aient permission mais seulement à condition qu'illes îthaient avec ieux.

Chenna n'était pas du goût à nos deux pêrrots et Dâvi Meurdron, qu'a tréjous 'té un menteux de prumié classe, lus dit comme chenna, "Mes pouôres filles, ch'est impôssiblye! Ch'est les Autorités qui nous ont chouaîsis pour y aller, et je lus avons même suggéré que j'voudrethion vos emmener avec nous mais i' nos l'ont d'fendu, en nos disant que ch'tait une mission bain importante et bain d'licate et qu'i' ne nos fallait autchun encombrement.

Les femmes ne purent trouver autchune raîponse à ch't ardgument-là et i' furent obligies d'céder.

Arrivés à St. Malo nos deux garçons ne furent pas longtemps devant qu'de lus rendre dans un bistro et opprès aver c'mandé lus consommation ils entrithent en conversation avec la patronne.

Sans autchun préambule Dâvi li d'mandi: "Avous le Colorado Beetle ichin?"

"Non Monsieur," ou lî raîponni, "je regrette de vous dire que la jeune Angliaise qui portait un nom semblable et qui habitait ici l'année dernière, n'est plus chez-moi, je crois qu'elle est maintenant à Nantes."

Charles Halledoque, que prétend être pus versé dans l'français que s'n amin Meurdron, vins à san s'cours.

"Man copain veurt dithe "Doryphore," Madame."

"Ah! Dora Faure non plus! Celle-là par exemple! Un marchand de vin me la enlevée et ils sont partis au midi de la France. Mais si ces messieurs désirent -

Mais Charles l'interrompi, - 'Nennin, nennin, Madame, je r'vaindrons vos r'vaie à saîssé, mais notre mission dévant toutes choses. Je sommes à la r'cherche de la p'tite bête qui mange les patates. Pouvous nos enseigni le c'min pour la grève?"

La patronne était arrivée à la conclusion que nos deux héros étaient un couplye d'lunatiques et ou s'emprêssi à lus montrer le c'mîn qui conduisait à la mé.

Ils empruntithent une frouque sus le c'min et s'minrent en travas à touâner l'vrèt de sus l'pliain dé St. Malo jusqu'à quâsi Paramé.

Meurdron viyait des "Beetles" partout, li mais Halledoque li dit, "Sacré imbécile, tu n'vai pas que ch'n'est pas aut'e chose que des sauticots comme j'en avons des milles en Jèrri. Nos grèves en sont pliaines et à St. Cliément i' vainnent la nièt jusque dans la route."

Mais Meurdron n'était pas satisfait. I' n'voulait pas ervenin en Jerri sans aver veu le Doryphore et i' continui à fourgonner l'vrèt jusqu'à chein que la saie le poussi à abandonne rla partie et s'en r'venin à la ville de St. Malo.

Opprès aver dîné à lus hôtel i' firent une ronde dans les difféthents bistros pour tâchi de rencontrer tchique habitant d'la campagne qui pourrait lus fourni renseignement quant à l'existence de l'însecte qu'i' cherchaient et à la fîn i' s'trouvithent en présence d'un farceux qu'offri de mettre une masse d'information à lus disposition, moyennant sans doute qu'i' fusse bain abreuvé duthant san récit.

Et i' lus raconti de toutes les sortes, comment que l'insecte fut introduit en France en prumié lieu, comment qu'i' s'propageait, tchi pliantes qu'il aimait ou qu'i' n'aimait pas, tch'est qu'étaient les miyeurs moyens pour le dêtruithe et enfin lus prouvi qu'il 'tait un expert dans la science.

Mais Halledoque avait ses soupçons et li d'mandi cârrêment s'il avait jamais veu un êchantillon du Doryphore.

L'autre li admins que nennin, mais i' connaissait un gardinyi à vingt lieues de St. Malo, qu'en avait souaidisant trouvé iun sus un brocoli, mais quand les autorités le souminthent à un expert de la région, ch'tis chin, opprès un examen minutieux, avait prononcé que ch'tait un hanneton.

Nos garçons décidithent que ch'tait perdre lus temps de continuer lus entchête et Dâvi Meurdron qu'était compliétement estchinté par le travas qu'il avait fait dans la grève, aithait voulu aller s'couochi, mais Halledoque ne vouli pas en ouï pâler.

"Je voudrais vaie la négresse de tchi que l'Caouain fut si êprins quand i' passi par ichin l'autre jour," qu'i' dit, "Je comprends qu'ou danse dans un café de tchique carre par ilo et comme je n'ai jamais dansé avec une négresse, je voudrais en aver l'expérience."

Je n'sis pas disposé à continuer man récit. Je pouorrais certainement vos en raconter pus long, mais je sais que Sophie Meurdron et Râchèle Halledoque liaisent tréjous les articlyes du Caouain et je n'voudrais pas sus autchun compte causer du disacord dans lus familles.

Caouain
Les Chroniques de Jersey 23/7/1938

No comments: