1980: Dans l'Nouvieau Monde

 Dans l'Nouvieau Monde

 

San Antonio,

Texas, USA.

 

Lé 25 d'octobre, 1980

 

Moussieu l'Rédacteu,

 

Ch'n'est pon aîsi d'rêaliser tch'i' n'y'a qué quat' jours dépis qué j'tais en Jèrri à vailli d'ma becque en Jèrriais d'un temps péthissabl'ye. Ch'tait probabliément du temps d'même tchi fit Napoléon Bonaparte appeler iun des mais d'san calendri républicain "Pluviose". À ch't heu, m'èrvélà au Texas en Améthique où'est qué jé n'oui qué d'l'Angliais à la mode Améthitchaine mais où'est qué j'peux joui d'eune tempéthatuthe dé septante-deux dégrés Fahrenheit à l'ombre, et du bieau solé.

 

Eune chose tch'est bein cèrtaine: I' travaillent bein dû à londgieu d'jour et niet, ches mangnifiques nosses. I' sont dévouées à lus tâche dé souangni et d'soulagi les malades, et i' n'y'a rein tchi né f'thont pon dans l'couothant d'lus jour et niet d'travas, et ch'n'est pon eune aîsie tâche dé souangni un tas d'vieillards tchi n'peuvent à peine bouogi et tchi sont tchiquefais roupilleurs. Et pis y'a l'affaithe dé faithe et r'dêfaithe un tas d'lyits touos les jours viyant qu'les malades vont et veinnent tout l'temps. ch'est r'mèrtchabl'ye dé vaie deux d'ches nosses, ieune dé châque côté, faithe un liet dans un clyîn d'yi, nou peut dithe. Criyiz-mé, bouannes gens, i' méthitent bein lus gages, ches bouannes nosses. À m'n idée, i' n'peuvent pon êt' payies d'trop.

 

J'ai r'gret d'n'aver pon ieu l'temps d'êcrithe à r'mèrcier touos l's anmîns tchi m'envyîdrent de flieurs, des cartes et des présents quandi qué j'tais dans chutte mangnifique hôpita, mais y'en avait tant qué j'n'en éthais janmais finni en temps pour lé r'tou en Améthique. J'mîns eune annonce dé r'mèrcîments dans la "Post" et j'espéthe qu'ou fait lieue par touos ieux. Et j'vouos r'mèrcie acouo eune fais, mes chièrs anmîns, pour vouot' générôsité, vouot' bouanté et vouot' întéthêt à m'n êgard, et j'vouos asseûthe qué j'en sis bein èrconnaîssant.

 

J'avais pensé qu'auve lé pâssage dé ma huiptante-neuvième année et m'n êtat d'santé il 'tait temps d'tchitter à env'yer ches lettres à la gâzette, mais Moussieu l'Rédacteu m'a grâcieusement d'mandé d'continuer, ch'est en tchi m'y r'vélà! Mais n'ayiz pon d'peux d'm'êcrithe à m'dithe qué jé r'dote si ou vouos en êt' apèrchus, car ch'est un trait à tchi qu'nou peut s'attendre d'un vyi dans sa nénantième année!

 

Ichîn, j'sommes en êlection, et tout l'monde sénon les politiciens ieux-mêmes sont enn'yés d'êcouter l'bargouaîchîn et les promêsses d'un tas d'candidats tchi n'pouorront janmais accomplyi eune fais êlus. Nou sé d'mande pourtchi qu'un politicien n'peut tout sîmpliément dithe, "J'espéthe pouver accomplyi tel et tel, mais jé n'peux pon cèrtifier tch'i' mé s'sa possibl'ye dé l'faithe!" Au mains ché s'sait un p'tit discours honnête tchi vaudrait toutes les promêsses împossibl'ye d'accomplyissement.

 

V'là tchi m'ramémouaithe l's êlections entre les Louothièrs et Rôsièrs à St. Ouën quand j'tais mousse. I' n'y'avait pon grand chouaixc entre les candidats affaithe dé capacité, car ch'tait rare tchi lus l'vaient à dithe autcheune chose dans L's Êtats sénon "Pour" ou "Contre". Mais dans ma fanmil'ye, pour bein qué ch'fûsse un Louothi tch'en gângnîsse, la prospéthité d'l'Île 'tait asseûthée! Ch'est danmage qué ch'bn'est pon si sîmpl'ye pour les Êtats-Unis au jour d'aniet. Et nou créthait, pourtant, qu'un pays tchi peut env'yer d's astronautes à la leune dév'thait pouver trouver des candidats dé capacité extraordinnaithe pour l'office dé Président. Mais ch'est l'contraithe. Est-ch'qué ch'n'est pon încompréhensibl'ye?

 

George d'La Forge