1979: D'èrtou en Jèrri

 D'èrtou en Jèrri

 

Le Ménage ès Feuvres,

St. Ouën.

Lé 19 dé mai, 1979

 

Moussieu l'Rédacteu,

 

Eh bein, bouannes gens, m'èrvéla en Jèrri acouothe eune fais. J'veins d'faithe eune pétite touannée du bord dé La Ville La Bas et d'Grosnez. En allant ava La Rue d'La D'vise, en c'mîn pour La Ville La Bas, j'pensais à m's anchêtres tch'avaient vressé ches mêmes quémîns pour trais chents ans d'temps - probabliément pus - car un Pièrre Le Feuvre est mentionnée en 1309 dans l's Extentes.

 

Y'a quatre ou chînq maîsons dans chutte Rue d'La D'vise à ch't heu, mais i' n'y'en avait pon eune quand j'tais mousse. La fanmil'ye Garde démeuthait dans la preunmié maîson à gauche en arrivant à La Ville La Bas. À drouaite ch'tait Mary Ann Benest (1838-1913), veuve dé Jean L'Feuvre (mênommée "La Gran' Junment" ou "La Grand' Sellotte"), tchi d'meuthait dans la maîson dans tchi qu'ma Manman patèrnelle, Ann Le Feuvre (1841-1925), fille de Pièrre Le Feuvre et d'Marie Maugi, sa femme, avait 'té née. Oulle est acouo là, chutte vielle maîson, et lé d'vant n'a pon changi. Ch'tait là qué l'Sieur Le Moignan, décédé à ches drein, d'meuthait l'année pâssée.

 

Endrait et au but d'la rue, ch'tait Charles Vibert tchi d'meuthait là (j'pâle dé y'a pus d'huiptante ans, sans doute). I' n'avait pon d'mains, l'Charles Vibert, et il allait par les c'mîns vendre du paîsson. Les gens m'ttaient les sou dans sa pouchette et prannaient l'change au bésoin. J'crai bein vouos aver dêjà dit comment tch'il avait pèrdu ses mains, mais pour les jannes tchi n'ont pon liu l'Jèrriais longtemps, j'm'en vais vouos raconter l'histouaithe. Dans chu temps-là, la p'tites cârriéthe à côté du Châté d'Gros Nez 'tait ouvèrte, et Charles Vibert avait creusé eune minne atout sa barre à minner (les Jèrriais l'appelaient un "jumper" en Angliais). Ayant mîns la poudre et la fusée dans l'creux, il y mînt l'alleunmette mais ou r'fûsit d'sauter. Lé Sieur Vibert c'menchit à rêmouer la poudre atout sa barre et la minen sautit et soûfflyi sa barre et ses deux mains en l'air en même temps!

 

I' faut penser tch'il 'tait dû, l'Sieur Vibert. Auve lé sang tchi coulait d'ses deux pouangnets, i' marchit jusqu'à La Fèrme [...] l'Hôpita en ville dans san hèrnais. Ch'est quâsi încriliabl'ye qu'eune pèrsonne pûsse pèrdre tant d'sang sans pèrdre la vie, mais i' pathaît tch'i' r'était par les c'mîns dans p'tit d'temps.

 

Touannant à drouaite à La Ville La Bas dans La Route dé Gros Nez, la préchaine maîson 'tait otchupée par eune Missis Bartlett. Oulle allait à l'Églyise dé St. George rédguliéthement et 'tait tréjous un mot en driéthe dé toute la congrégâtion quand nou r'citait les priéthes auprès l'Minnistre. Sén "Amen" 'tait tréjous un amen d'extra à la fîn des priéthes!

 

Pus liain, ch'tait l'couôthîn Cap'taine Edouard Le Feuvre (1832-1918) à La Fèrme d'Gros Nez. Un mangnifique naviguant tch'était Cap'taine au long cours à l'âge dé vîngt-tch'ieune an. Et d'l'aut' côté d'la fèrme 'tait la maîson otchupée par mes vièrs anmîns Fraînque et Eva L'Mèrquand, décédés dreinement.

 

En touannant à drouaite dans La Route dé Gros Nez, chutte fais en c'mîn pour Portînfé, nou veint à La Ruette du Vaû Bacelyi tchi mène au Vaû Bacelyi même où'est qu'ieune des deux fèrmes 'tait otchupée par un Sieur Le Gresley. Continnuant dans la Rue du Vaû Bacelyi tchi mène dé la ruette au Carrefour à Saulx, y'avait Bon Air à gauche, et pis nou s'trouvait à Portînfé où'est qué l'Sieur (pus tard Chent'nyi) Francis Hamon gardait boutique, et qué l'Sieur Ph'lippe Hamon et sa femme (la "Tante Vine" Le Feuvre) 'tait à fèrme.

 

Ervénant sus mes pas et touannant à gauche au Carrefour à Saulx dans La Rue des Palliéthes, j'oublie tch'est tch'était à la preunmié fèrme à gauche, mais j'crai qué ch'tait un Vibert. Dé l'aut' côté d'la rue ch'tait eune Miss Maugi, couôtuthiéthe, tchi d'meuthait là, et pus liain, à gauche, 'tait la fèrme appelée "Woodlands" à ch't heu où'est qué l'Sieur Harry L'Boutilyi fèrmait, et i' cachait eune beusse pour aller en ville touos les sanm'dis. Si ma mémouaithe n'est pas fautive, lé prix d'aller et r'tou 'tait un ch'lîn par pèrsonne.

 

Pus liain, ch'tait des Sieurs Vibert tch'étaient propriêtaithes des fèrmes dé châque côté, et pis nou s'trouvait à La Pointe auve la fèrme dé Maît' Douard Le Boutilyi et la cheinne du Sieur Ph'lippe Powell.

 

Et m'èrvélà au Ménage ès Feuvres, auve "N.W. View" d'l'aut' côté d'la rue, où'est qu'Jean L'Cornu d'meuthait dans l'temps. Tchi mémouaithes du temps pâssé, et tchi bonheu d'pouver r'siéthe les pas d's anchêtres dans les vièrs quémîns tch'il' ont si bein connus dans l'temps jadis!

 

George d'La Forge