Tch'est tchi s'pâsse en Jèrri?

 Tch'est tchi s'pâsse en Jèrri?

 

Ottawa,

Ontario,

Canada

Le 21 d'avri, 1979

 

Moussieu l'Rédacteu,

 

La gâzette du preunmyi d'mar veint d'arriver. En r'gardant les décès, j'vai qué Moussieu l'Révérend John dodds, dé la Chapelle Wesleyenne, n'est pus. J'veurs exprînmer mes r'grets et condoléances à Mde. Dodds. Un charmant moussieu, l'Révérend Dodds. J'les rencontris, li et sa danme, siez l'Sieur Le Bro, ès Potithons à Ste. Mathie, et j'ai tréjous r'tîns un bouan souv'nîn d'lus expressions d'bouanne av'nue, prîncipalement comme j'tais un êtrangi. J'sis seux qué l'trépas d'Moussieu Dodds est eune séthieuse pèrte pour les congrégâtions Méthodistes Wesleyennes.

 

Eune întérêsante gâzette, la cheinne du preunmyi d'mar. À c'menchi, j'vai qué sus treize annonces dé naissances i' n'y'a pon un seul vièr nom Jèrriais, et i' n'y'a pon un nom Jèrriais dans les huits pèrsonnes des quat' engagements annoncés. Né v'là acouo eune aut' preuve qué les Jèrriais dispathaîssent à grands pas dans l'Île.

 

J'vai, étout, qué les grôsses têtes dé conmèrce sont d'avis qué ch'n'est pon logique d'êtablyi des pèrmîns d'travailli. J'avais pourtant pensé qué v'là tch'éthait empêchi las populâtion dé continnuer à augmenter, mais i' faut qué j'èrconnaîsse qué jé n'sis pon à même d'en jugi comme i' faut, n'étant pon sus les lieux.

 

L'articl'ye du Greffyi Dorey tchi nouos dit comment qu'lé Jury d'Assises est constitué est mangnifique. Lé procédé est hardi bein explyitchi, et j'sis d'avis, comme l'est Moussieu Dorey  qu'un Jury d'vîngt-quat' pèrsonnes vaut mus qu'iun d'douze. V'là tchi ramémouaithe lé temps qué j'tais Commis Vicomtre, justement d'vant la grand' dgèrre dé 1914-18. Ch'tait Moussieu d'Rozé, Reginald Raöul Lempriéthe, Ecuier, tch'était Vicomte dans l'temps. J'êcrivais les billes d'avertissement pour les pèrsonnes chouaîsies pour constituer l'Jury, et ch'tait l'Vicomte et mé tch'allaient les "sèrvi" à châque pèrsonne à domicile un mio partout dans les pâraisses.

 

Moussieu Lempriéthe avait un moto d'fabrique Renault à deux pliaiches à l'ouvèrt, atout eune capote en taile, couleu d'kaki, tchi sé t'nait en pliaiche atout des ribans d'tchui (comme des brides) qué nou houtchait dans des bliouques exprès ès côtés du tchèrpent du moto quand fallait s'abriter en cas d'vent ou d'plyie. Moussieu Lempriéthe cachait l'moto bouan rond dans les routes dé campangne, et j'aimais hardi aller auve li. (Sans doute, Moussie d'Rozé avait un pus grand moto au Mangni que sa Danme cachait lyi-même.)

 

Jé d'scendais d'livrer (nou disait "sèrvi") la bille à domicile. I' fallait s'faithe seux dé la sèrvi à la pèrsonne avèrtie pour qu'ou n'eûsse pon d'estchuse pour né pas s'présenter en Cour d'Assise en temps et lieu lé jour voulu. Oulle 'tait arrêtée et mînse à l'amende s'ou n'sé présentait pon. Lé Vicomte Lempriéthe, un charmant et distîndgi moussieu, feunmait des cigarettes "State Express" et il en avait tréjous ieune au bé en cachant l'moto.

 

L'articl'ye sus les fieux d'Jèrri par Madanme Joan Stevens, FSA, vaut la peine dé liéthe. Ch'est un mangnifique résumé d'un sujet tchi dait aver d'l'întéthêt pour touos les Jèrriais, et jé n'connais pon autcheune pèrsonne tchi peut en faithe eune miyeu "conférence" aussi bein comme Madanme Stevens.

 

Eune chose tchi m'a fait hardi d'pliaîsi est d'liéthe qué la langue Française vînt sus l'tapis dans L's Êtats l'aut' jour, et qu'au mains quat' membres, les Mêssieux Pierre Horsfall, Reg. Jeune et Edgar Betchet et Moussieu l'Bailli li-même, prîndrent la pathole. Est-ch'qué ch'n'est pon r'mèrquabl'ye qué y'a si p'tit d'membres dé nouot' Chambre Législative tchi peuvent faithe un discours en langue Française? Absolument i' dait y'en aver pus d'quatre? J'ai tréjous ouï qué l'Juge Francis Vibert Le Feuvre, dé mémouaithe respectée, fut iun des dreins, si pas l'drein, à présenter un projet dé louai en Français; ch'est en tchi ch'n'est pon au jour d'aniet qué la langue Française, officielle aut'fais, en pèrd dans L's Êtats.

 

J'tais quâsi surprîns d'vaie qu'les membres su Sŷnode dé l'Églyise en Jèrri pathaîssent satisfaits qué l'nombre d'Minnistres s'en va êt' rêduit dé vîngt à dgiex-sept. Né v'là chein qu'j'en avons par aver à aller en Angliétèrre pour des Minnistres. N'est-i' pon temps dé nouos r'mett' dans l'Diocèse dé Coutances! Mais, quand j'y pense, i' sont à court dé prêtres en Nouormandie étout. Eune miyeu solution es'sait d'êtablyi un Diocèse des Îles dé la Manche et d'êl'ver nouos êfants à aller à l'Êcole du Dînmanche et à l'Êglyise pour lus donner l'goût d'la prêtrise. Dé même, nou pouôrrait s'gouvèrner sé-même et garder l'Êglyise en allant.

 

J'n'aime pon vaie nouos mangnièrs à vendre dans la gâzette. Ch'n'est pon des Jèrriais tchi l's acatent. Né v'là l'chein d'Vînchelez dé Haut tchi s'en va changi d'main acouo eune fais. Où'est tch'est l'temps qué des bouans vièrs noms comme dé Carteret, Malet, Lempriéthe, Lé Cornu, etc., ornaient nouos seigneûthies et mangnièrs?

 

George d'La Forge