1964: en Australie et à la Nouvelle Zélande

 La rêunion mensuelle

 

La rêunion mensuelle eut lieu vendrédi, l'28 dé mai, dans la Salle d'Agritchultuthe, St. Hélyi, et eune chentaine dé membres lus y réunîtent.

 

Dévant yiéthe lé rapport dé la derniéthe rêunion, lé Président d'mandit ès membres pour eune minute dé silence en mémouaithe dé Madame Rondel et la Démouaiselle Noël.

 

Lé rapport dé la rêunion du mais d'avri fut liut et adopté, et deux nouvieaux membres futent êlus.

 

À la Nouvelle Zélande

 

Après qué la correspondance avait té lyue, lé Président fit la beinv'nue au Sieur E.J. Le Feuvre, qui v'nait nos donner une séthée en nos raccontant entouare san viyage en Australie et à la Nouvelle Zélande avec lé Sieur George Le Feuvre. I' sortîtent dé Southampton lé 20 d'novembre, 1963, abord lé Canberra, et i' traversîtent la Baie dé Biscaie sans prendre grand exercise! Il' arrivitent à Naples auprès quatre jours, et tandis qu'il' 'taient là i' visititent les ruinnes dé Pompéii. I' vîtent lé Mont Vésuvé et à Stromboli i' y'avait un éruption d'un volcan. Traversant la Canal dé Suez il' arrivîtent à Colombo lé 4 dé décembre, et là il' vîtent une mosquée bouddhiste. Aprés tchiques jours en mé, il' attèrrîtent à Freemantle, épis à Melbourne, où-est-qu' lé Sieur E.J. Le Feuvre rencontrit san fréthe et la famille. Les deux fréthes né s'étaient pas rencontrès pour 31 ans, et nou peut s'înmaginer qu'i'y'avait d'la jouée, et d'la fête, et du catchet, et comme Noë s'appréchait, la chaleur dévait monter par-dédans comme déhors!

 

Après la nouvelle année, les v'yageurs s'en futent en Nouvelle Zélande, à North Island. Ichîn à Roturua i' vîtent les sources caudes, dé ieau tréjous bouillyante, et la terre alentou est caude assez pour y tchuithe un bouan dîner. Ichîn étout il' vîtent les Maoris, les vrais natifs dé la Nouvelle Zélande.

 

Dans l'South Island, à Picton et Nelson, lé pays était vraiment magnifique - dé belles bouaîs'sies, des rares flieurs, et des montagnes. Dans ches cantons i'y a des Jèrriais, et les Méssieux l'Feuvre 'taient bein contents d'en rencontrer, aussi bein comme les siens dé là-bas, qui 'taient si contents d'en rencontrer qui v'naient justément dé tchitter lus p'tite Île i' n'y avait que tchiques sémaines!

 

Une Grande Surprînse

 

Lé Sieur Le Feuvre nos dit qu'un jour il' 'taient entrains dé d'mander à un jeune couplye pour des renseign'ments entouor eune “bus”, quand la dame sé touânnit et lé r'connut, en l'nommant! Il eut une grande surprînse, ch'tait une jeune St. Pierraise!

 

Il' r'vîntent à Freemantle et après tchiques jours lus en futent pour Singapore et Penang et, après, par avion a Bangkok. Ichîn i'y' avait bein des choses intérêssantes, les douzaines dé templyes, lé “marchi flyottant”, les p'tites rues remplyies d'monde de toutes les nations. I' y a bein des précautions à prendre ichîn, car les gens n'sont pon trop partichulièrs entour lé mangi! Après aver ertouanner à Colombo, les deux Jèrriais r'embêrtchîtent en route pour Southampton sus l'Canberra, un baté bein confortablye.

 

Après ch't întérêssant discours, lé Sieur Le Feuvre nos montrit dé portraits en couleur, qu'il avait prîns, mais qui nos faisaient envie dé prendre une longue vacance etout! Chutte partie du monde n'est pas acouo trop gâtée par la vie moderne dé l'Ouest.

 

Des portraits

 

Lé Senateu P. Romeril nos montrit des portraits qu'il avait prîns lé jour dé la visite dé L'Assembliée en France, l'annee passée, et l'jour du dîner de L'Assembllaïe d'Guèrnésiais au mais d'janvyi.

 

La Dlle. F. M. Hacquoil, dé la part des membres, èrmercyit lé Sieur Le Feuvre pour san magnifique discours et les portraits, qui tout ensemblye nos avait donné une séthée hardi întérêssante, et en même temps ou' r'mercyit lé Senateu Romeril pour ses portraits, qui ram'naient dé bouannes mémouaithes.

 

Lé Député Quérée annoncit lé Service Annuel à la Chapelle d'Ebénèzer pour Dinmanche lé 28 dé juin, a 3 heuthes, et la visite a l'Abbaye dé la Lucerne pour mardi, l'25 d'Août.