1959: Visite de L'Assembliaie d'Dgèrnésiais

 Visite de L'Assembliaie d'Dgèrnésiais

 

Le 2 d'septembre fut un jour mémorablye pour les membres dé L'Assembliée d'Jèrriais, car il' eûtent lé pliaisi d'aver passant 50 membres dé L'Assembliaie d'Dgèrnésiais à passer un jour auve ieux. Lé temps 'tait parfait et l's arrangements allîdrent comme sus rouollette.

 

Auprès aver fait la beinv'nue ès Dgèrnésiais - parmi ieux lus Président, l'Juge W. Sarre, l'Juge A. Falla, l'Sieur A. Bichard, Député J. Le Noury et sa danme, Mme. D. Heaume, la Trésôriéthe, et l'Sieur F. Heaume, et Mme. W. Langlois - la compagnie dé passant 150 membres montîtent en charabancs pour lé Pavilion à West Park où-est que j'feunmes bein servis auve du café et eune bouochie. La veue ichîn dé d'sus a terrace 'tait superbe; la mé 'tait si bliue auve lé soleil à lithe dessus.

 

À l'Eglyîse dé St. Brélade

 

À dgiex heuthes et d'mie nou sé r'mins en route lé long d'la côte jusqu'à St. Aubîn et, auprès, amont l'Mont des Vaux pour l'Eglyîse dé St. brélade. Ichîn les gens d'valîdrent pour vaie la Chapelle ès Pêtcheurs, et la belle ancienne eglyîse. Lé Sieur M.C. Green nos fit un magnifique discours entouor ches deux bâtisses 'chîn - un discours bein întérêssant, sustout considéthant qué l'Sieur Green avait 'té prîns en sursaut. Les siens qui 'taient întérêssis fûdrent visiter l'Chim'tiéthe des Allemands qui jouaint l'Chim'tiéthe dé Pâraisse.

 

Lé Mangni d'St. Ouen

 

À onze heuthes un quart j'erfillînmes par La Marquanderie et La Route Orange pour La Pulente et La Route des Mielles: ichîn l'long y eut hardi dé r'mèrques sus les tas d'vrai sé. Le temps 'tait trop court pour faithe lé tou' par lé Pulec, et j'pâssinmes par lé Mathais d'St. Ou pour aller visiter l'Mangni.

 

Acouo eune fais l'Sieur Green avait d'tchi bein întérêssant à nos raconter. Lé prenmié discours fut en d'hors dé la Chapelle et les gens passitent à travers pour la visiter. En faisant l'tou du Mangni le Sieur Green nos explyitchait les difféthantes périodes qué chaque partie avait 'té bâtie. À la fin du tou' Madane de Carteret nos ouvrit la grand' porte et nos învitit à vaie la grand' allée et la belle montée, et l'portrait du ch'va qui prînt eune si grande partie dans l'histouaithe dé la fanmille au temps passé.

 

L'dîner à La Belle Etoile

 

Comme s'arrive souvent, le temps s'passait trop vite et i' fallit ermonter en vaituthe pour lé dîner, filant par la grand' route lé travers dé Ste. Mathie et d'St. Jean. J'feunmes servis d'un magnifique erpas et, auprès, l'Sieur billot prposit la santé d'La Reine, nôt' Duchêsse, et nos fit un court discours qui fut bein à propos. I' dit comment qué ch'tait un grand pliaisi pour les Jèrriais d'entrét'nîn nos amis dé Dgérnésy et lus r'touanner l'complyiment qu'il' nos avaient fait i'y a deux ans. Auprès aver ermèrcié l'Sieur Green pour ses fanmeux discours, i' proposit la santé d'L'Assembliaie d'Dgèrnésiais. Lé Juge Sarre, en rêponnant, ermercyit l'Sieur Billot, et auprès aver fait l's apologies dé lus Ségrétaithe, lé Sieur Albert Heaume, qui n'pouvait pon être auve nous, dit comment qu'il appréciait la campagne ichîn; ch'tait un pliaisi dé vaie qu'ou n'tait pas couverte dé bâtisses, et il espéthait qu'ou restéthait d'même à l'av'nîn. Moussieu Sarre nos dit étout qué fallait ermèrcier les ségrétaithes et touos les siens qu'avaient arrangi un si bouan jour, et l'seul mal-au-tchoeu qu'il avait ch'tait "D'aver veu un Dgèrnésiais amathé dans un couril"! (Un âne à la tèrrée.) Moussieu sarre finit en proposant la santé dé nout' Assembliée.

 

Un tou' d'campagne

 

À deux heuthes et d'mie j'nos r'mînmes en c'mîn pour la Route du Nord et travers des ruettes pour Rozel, avaut l'Mont du Câtel et er'ramonter par le Mont du Gros Rocher pour lé Mangni d'Rozel, où-est que Mme. Bolitho 'tait à nos faithe la beinv'nue.

 

Sus l'herbe en d'hors dé l'ancienne Chapelle, la Danme du Mangni nos dit comment qué v'la tchi lî faisait grand pliaisi d'nos aver, et nos dit comment que l'temps passé les gens lus rêunissaient à la même pliaiche, mais qué dans l'couothant d's années qué l's Intéthêts et les conversations avaient si changi. Les bieaux bouai du mangni fûdrent bein admithés; ch'tait vraiement un bieau portrait d'être là, tout près du vivyi, eune si belle arlévée.

 

La Hougue Bie

 

En route acouo eune fais - chutte fais par l'Eglyise dé St. Martin pour la Hougue Bie, et ichîn les gens pouvaient visiter lé Musée d'Agritchultuthe, la tombe et les deux chapelles et, auprès, béthe du thée et mangi des vièrs fricots dé Jèrri - des mèrvelles, d'la gâche dé pâté, etc., qué les membres avaient fait. Un coup l'thée fini, les Mêssieux G. Le Masurier, B. Amy, J. Richard, G. Perchard et H. de la Mare nos amûsîtent auve des chansons en Jèrriais, auve lé Sieur G. Le Breton au piano.

 

Ermèrciements

 

Lé Juge Falla, iun des Vice-Présidents dé Dgèrnésy, èrmercyit touos les siens qu'avaient arrangi un si bouan jour; ch'tait tout à fait eune occasion spéciale pour ieux dé pouver visiter les bieaux mannièrs, et en effet il' appréciaient tout ch'qu'ils avaient veu.

 

Lé Sieu Billot rêponnit en disant qué ch'avait 'té un pliaisi pour les Jèrriais dé pouver entré-t'nîn L'Assembliaie d'Dgèrnésiais.

 

Ch'fut un magnifique jour pour tous, ch'est bein seux, mais les danmes des deux mannièrs aîdgîdrent hardi par lus bouanne compliaisance, et méthitaient d'être ermèrciées aussi bein comme les danmes qui fournîtent lé mangi, les siennes qui prepathîdrent et servîtent le thée, les mêssieux qui nos amusîdrent et touos les siens qu'aîdgîtent sus autchun sens. À ch't heu i' n'reste qu'à espéther qué j'pas'sons tous un autre jour ensemblye dans tchique temps.

 

1959