1959: Rêunion au Vièr Châté

 Rêunion au Vièr Châté

 

La rêunion mensuelle eut lieu l'29 dé mais au Châté d'Mont Orgueil, et bieau qué ch'fûsse eune saison embarassante au mains 80 membres lus y rêunidrent.

 

Lé Président fit la beinv'nue ès gens présents et duthant l'couothant d's affaithes deux nouvieaux membres fûdrent êlus: ch'est un coupl'ye qu'ont 'té hors pays pour bein d's années. V'la tchi fait pliaisi ès membres d'ichin d'saver qué du monde qui r'veinnent vaie lus île natale peuvent acouo pâsler lé vièr patois.

 

Tandis qué j'tions acouo tous ensemblye lé Sieur Billot èrmercyit l'Sieur Joe Dorey pour nos aver ieus au châté, et en même temps lî dit un p'tit cadeau d'la part dé L'Assembliée, et l'Sieur Dorey dit tchiques mots en r'merciements.

 

Les siens qui fudrent tchoeuthus assez ramontîtent lé c'min et not' dguide fit eune mangnifique description d'la p'tite Chapelle, et d'hors sus l'herbe i' nos explitchit lé jeu qu'les gens du temps passé jouaient pour lus diverti. Auprès aver remonter les d'grès passé l'pits nou fut vaie la veue du vaîsiné et d'la mathe St. Catherine. ch'fut bein amusant d'ouï deux bouans Jèrriais comme lé Sieur Dorey et Mait' Ph. Ahier à dischuter lus veues entouor les difféthenetes chose qui s'arrivîtent quand lé brise-lames fut bâti. I'n faîsait pon eune arsion à chutte hauteur ichîn et j'erdescendîmes pour aller aver eune tassée d'café et eune bouochie à mange à un café tout près.

 

Annonces

 

Lé Président annoncit l'Sèrvice Annuel à la Chapelle dé Sion l'28 dé juin, l'excursion à Granville et l's alentours lé 22 d'juillet et la visite dé La'Assembliée d'Dgernésiais l'2 septembre, et les membres sont consilyis dé r'garder pour les annonces dans la gâzette pus tard.