1954: Les Visiteurs

Les Visiteurs

Touos l's'ans à chutte saison ch'est la même chose ichin siez nous. Y n'y'a qu'un sujet d'conversâtion et ch'est les visiteurs. Quant à mé, je s'sais content d'pâslé de tchiquechose important et intérêssant comme le prix des patates, les belles bêtes que nous a veu ès shows, les bêtises que nous a veu les juges faithe, le drôle de temps qu'j'avons yeu dérnièthement et ouèsque les pihannes ont dispathu. Etout y'a la politique et la belle manièthe que les Chantgniers et même les Officiers du Connêtablye ont pour arrangi les disputes entre les jeune mathiés.

Mais pour le temps la Merrienne ne veur pas ouï un mot de tout chonna. Tout ch'qu'y l'intérêsse ch'est les visiteurs, et en dêjeunant, en dînant, en b'vant l'tais et en soupant ou n'pâsle que d'chonna.

Hier au sé ou s'y r'mint, et mé tch'éthais voulu fumé ma pipe dans ma grand'chaise en r'pos, et ou m'racontit qu'oulle avait veu une demie-douzaine de femmes pâssé la maison, et "crai-le s'tu veur, Ph'lip," ou dit, "n'y'avait pas un habit réspectablye dans tout l'lot. Y taient toutes habillyies en brais."

Eh bein mais, Merrienne," j'l'y dit, "si s'trouvent pûs confortablyes en brais, pourtchi pas?"

"Oh, ch'est d'même," ou s'fit, "eh bein voudrais-tu m'y vais?"

"Damme, nânin," Merrienne, " j'l'y dit, "mais dans chu monde châtchun s'pliait, et n'y'a autchune louai tch'empêche une femme ou une fille de s'prom'né dans les routes en brais. J'admets que dans l'temps pâssé chonna n'éthait pas tait permint, mais ach'teu qu'les femmes ont même pûs d'libérté que l's'hommes, tchèsqu'y s'en va l'empêchi d'faithe autchune chose tchi lûs veint dans la tête. N'y'a pas moyen, ma vieille, et y faut aussi bein s'y résigni."

"Y'a autre chose," ou dit: "j'ai ouï que dans nos Etats ach'teu le tourisme est considéthé notre preumièthe industrie, et que l'fermage ne conte pas pour hardi quand il est tchéstchon d'la prospéthité d'l'île. Une belle affaithe, si ch'est vrai."

"Nânin, Merrienne," j'l'y dit, "ch'est du gniolin. Il est vrai que l'tourisme est tchiquechose que nou n'peut pas ignioré d'nos jours, mais quand l'fermage tchêrra, Jerri tchêrra étout. Ch'est les patates tch'ont tréjous gardé l'île en allant, et ch'est ocquo d'même au jour d'agniet. Quant ès visiteurs ch'est bein seux tch'y dêpensent hardi d'sous ichin."

"Oh, tu crais," ou dit, "eh bein, mé, j'n'en s'y pas si seuze. Par chein qu'nou m'a dit, une grande partie d'nos visiteurs n'ont pas seulement l'moyen d'péyi pour un taxi quand y s'trouvent sûs la cauchie, et vont trouvé lûs louages portant lûs bagages à la main. Et au sé, accordant à un moussieu qu'tu connais et que j'rencontrit avant hier, si vont dans une aubérge pour deux ou trais heuthes, y n'dêpensent que l'prix d'un vêrre de bièthe."

"Quant à chonna je n'sais pas," j'l'y dit, "car j'n'ai pas l'habitude de fréquenté l's'aubérges au sé, car si j'm'y méttais, tu'éthais bein vite tchiquechose à dithe. Mais, avec chonna, y faut adméttre, Merrienne, que hardi des boutitchiers en Ville éthaient bétôt à freumé lûs portes si les touristes ne v'naient pas."

"Chonna s'peut," ou dit, "mais quand j'fut en Ville Sam'di y'avait un flianchet d'visiteurs dans la Rue d'Drièthe à r'gardé chein tch'était exposé dans les f'nêtres, mais j'n'en viyait pas hardi tch'est bein gêné."

"Vèthe," j'm'accordit," mais malheutheusement y'a tchiques férmiers étout tch'y savent chein qu'ch'est l'mal au ventre qu'nous attrape quand y'a trop d'anxiêté."

"Ch'là s'pouôrrait," ou dit, "mais y'a tréjous les marchands à lûs aidgi en hivé. Ch'n'est pas d'mauvais gâs, les marchands."

"Tchiquefais," ou dit- "tchiquefais!"

"Tchiquefais!"

Ph'lip

12/6/1954