La Tête-nue à Chewed-ear (4)

 (siette et fîn)

Et Chewed-ear sé r'trouvit dans la minsère - fallait don achet'eu,

Mettre unn' pèrruque, ou les teindre, pour les changi d'couleu'!

Enfin i crut qué ch'tait unn' punition, pour aver mal agi,

Et qu'i f'rait mus dé s'en r'aller, tout d'un coup, drait sièz-l'i

Pour payi Guinneyveer et l'Syndicat, et lus conter coumment

I l'avait èsprouvè à les tromper ov sa saletè d'Onguent!

Il 'tait tout prêt à s'erpenti, quand dans san vier chervé

I l'y vint unn' brave idèe... les shâres su Syndicat... pourtchi pas l's achater?...

Lé jour d'ôprès i' r'vint sièz l'i, la tête finnement râsèe,

Et i vit qu'les membres du Syndicat paraissaient bein gênès,

I faîsaient tous gris minne, et né riaient pon coumme d'amors,

Car les shâres avaient baissi, unn' fais lé bouan'houmme hors;

Et quand Chewed-ear ervint, la tête occouo nue et bein polie,

Ils 'taient prêts à l'y vendre tout - n'importe à tchi prix!...

Pour chent dolleurs i l'en r'parit - et, unn' fais qu'i l'en fut l'maître,

I virent, pus tard, lé vier malin laissi touôs ses qu'veûx craître!

Et touôs les gens dé Nuggetsville, jusqu'au jour d'annièt,

Vos cont'ront la farce au vier Chewed-ear, et coumme lé Syndicat fut jouè!

J.P.

1913

"The Baldness of Chewed-ear" Robert W. Service