La Tête-nue à Chewed-ear (2)

 (siette)

Bein seûre qué d'vant longtemps dans tout lé vaîsinai,

Les gens vinrent à entendre chein qu'Guinneyveer dfaisait,

Et tous les siers au manière dé Club qué l's hoummes avaient par là,

I'n'faisaient qué dé d'vîser, rire, et dé dischuter entouôre chounna;

Enfin y'ieun dît ès aûtres:- "La p'tite femme travaille bein du sus la tête au vi,

Mais ou n'gâgn'ra jâmais ses mille dolleurs, sans tchiq's'uns à y'aîdji:

Si j'formions unn' Compagnie entré nous, pour prendre laffaire en main,

Nous, jé pouôrrions p't'être en r'parer, si c'h'est qu'ou n'y peut rein?

Ch'est unn' spéchulâtion, et pour la shâre à Guinneyveer là d'dans

I'l'y dounn'rons chent dolleurs pour c'menchi, - et, j'en gâgn'rons chinq chents!

Et jé jouorons bein lé vieux - i n's'ra pon longtemps nueue tête,

Grâce au Chewed-ear Jenkins Hirsute Propagation Syndicate!" -

 

Unn' drôle dé diabbe coumme chett' là, amusit tant les gens

Qué les sous pour stèrter lé Syndicat, furent trouvés  dans p'tit d'temps;

Un Comitè fut bein vite noummè pour aller vais Guinneyveer,

Et l'Président, dans un biaû discours, l'y conti toute l'affaire:

L'y, in mio dèscouoragie qu'oprès tout san travâs

Sur la vielle nuque à Chewed-ear, et qu;les qu'veux n'craissaient pas,

Sé fît seûre des chent dolleurs, et entre yieux un' accord fut signè

Sus un dotchûment bein arrangi, et solidement scèllé.

I happirent sus l'coup, lé vier Chewed-ear, et y'i'ôtirent san chapé,

Ils examinirent sa tête ov des lunettes, et l'èspaisseu d'sa pé,

Et chaque membre du Comité s'en fut sièz-l'i content et satisfait,

S'vantant à tout lé monde, du succès dé lus projet!

 

I l'achatirent un tâs d'Hailinne, du Tchatch'em, et pour s'asseûrer de bein faire,

I l'eurent occouo dé la Graisse d'Ourse, du Rhum et du Syro d'Capilaire.

Et pis touôs les bénits jours, lé Comité, sans seul'ment y mantchi,

V'nait s'exercer à tour dé bras, sus la tête au pouôre vi;

S'i' criyait, ou voulait s'saûver, i frumaient vite la porte.

Et tou' à tou' i versaient et frottaient - châtchun dé sa sorte!

(à siéthe...)